1 Tesalonicenses 2
2
Tesalónica markacho Pablo wilakushqan
1Wawqi panikuna, manami manakaqlapaqtsu qamkunaman shapäkamushqä. 2Musyashqaykinöpis qamkuna kaqman noqakuna manaraq chayamuptï Filipos#Hech. 16.19-24. markacho ashlimashpan pasaypami nakatsipäkamashqa. Qamkuna kaqchöpis tsaynölami conträ sharkapäkushqa. Tsayno kaptinpis Tayta Diosnintsimi yanapamashqa ali wilakuyninta mana mantsakuypa wilakärinäpaq.#Hech. 17.2-4.
3Noqakuna manami pitapis lutanta yachatsinä kashqatsu ni pitapis sakyanä kashqatsu ni pitapis lutanta criyitsinä kashqatsu wilakurkaykä. 4Tsaypa trukanqa ali wilakuyninta wilakärinäpaq Tayta Dios kachamashqa kaptinmi wilakurkaykä. Manami runakuna munashqantatsu wilakurkaykä, sinöqa Tayta Dios munashqantami.#Gál. 1.10. Payqa shonquntsi imata yarpashqantapis musyaykanmi.
5Musyashqaykinöpis chaskikamänayki kashqa manami qamkunata alabashqätsu. Tayta Dios musyanmi pitapis mana sakyapakushqäta. 6Tsaynöpis manami runakuna alabamänanta munartsu qamkuna kaqcho wilakärishqä.
7Jesucristupa apostolnin kaykarqa gastükunapaq qamkunatami manakärïman karqan. Manakärinäpa trukanqa wawanta maman kuyashqannömi qamkunatapis kuyapäkushqä. 8Tsayno kuyarmi Tayta Diospa wilakuyninta imaykanöpapis wilapar wanunäpaqpis listu karkaykarqä.
9Wawqi panikuna, ¿manaku yarpapäkunki qamkuna kaqcho Tayta Diospa wilakuyninta wilakärinäpaq kikïkuna arushqäta? Gastükunapaq yarpachakärinaykita mana munarmi tsakaypa junaqpapis pasaypa utikashqäyaq arupäkushqä.#Hech. 18.3; 2Tes. 3.8. 10Qamkunapis y Tayta Diospis musyanmi qamkuna kaqcho kar pay munashqanno alilata rurar santu kawapäkushqäta. 11Tsaynöpis musyapäkunkimi tsurinkunata taytan kuyashqanno qamkunata kuyapäkushqäta. 12Tsaymi qamkunata ruwakurqä, shakyätsirqä y tantiyatsirqä Tayta Dios munashqanno kawapäkunaykipaq. Paymi qayashushqanki mandashqancho imayyaqpis paywan kawapäkunaykipaq.
13Tayta Diospa ali wilakuyninta wilapaptï manami runakunapa yarpaynin kashqantatsu yarpapäkushqanki, sinöqa Tayta Diospa wilakuynin kashqantami. Tsayno tantiyarmi lapan shonquykiwan chaskikärishqanki. Wilakuyninta mayarmi tantiyakärishqanki pay munashqanno kawapäkunaykipaq. Tsaymi imaypis Tayta Diosta agradëcikärï.
14Wawqi panikuna, marka mayikikuna nakatsishushqaykinölami Judeacho kaykaq wawqi panikunatapis Israel runakuna nakarkaykätsin. 15Tsay runakunami Señor Jesucristutapis wanutsipäkurqan. Tsaynölami Tayta Diospa profëtankunatapis unay aylunkuna wanutsipäkurqan. Tsayno runakunami noqakunatapis Judeapita qarqamashqa.#Hech. 9.23, 29; 13.45, 50; 14.2, 5, 19; 17.5, 13; 18.12. Paykunaqa manami Tayta Dios munashqannötsu kawarkaykan. Tsaynöpis manami munapäkuntsu Tayta Diospa ali wilakuyninta runakuna chaskikärinanta. 16Tsaymi mana Israel runakunata wilapaptï tsapata churapan mana salvakärinanpaq. Tsayno karmi mas jutsayuq rikakurkaykan. Tsayno kashqanpitami juiciu junaqcho paykunata Tayta Dios fiyupa castiganqa.
Tesalónicaman Timoteuta Pablo kachashqan
17Wawqi panikuna, qamkuna kaqpita aywakärishqäpita patsami mana tinkushqantsitsu. Tsaymi qamkunapaq lakikur imaykanöpapis watukuq kutimuyta munarkaykä. 18Noqa Pablo atska kutimi kutimuyta munashqä. Itsanqa mana shapäkamunäpaq Satanásmi tsapata churapämashqa. 19Tsayno kaptinpis qamkunami premiuta chaskishqä corönä karkaykanki. Tsaymi Señornintsi Jesucristo kutimuptin paypa nawpancho qamkunapita pasaypa kushikärishaqpaq. 20Qamkunapita rasunpami Tayta Diosta alabar kushikärishaq.
Currently Selected:
1 Tesalonicenses 2: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.