Matewuzhu 2
2
Othotola wa ajuwi a matthottowa
1Paata ya Yinsa ovokoliwa Belemu ya Yudeya yenzi ya mfwalume Herooti, ajuwi alankhiye okhu lintthamuwaawo njuwa khuta Yeruzaleemu. 2Khuuzela yoori: “Mwaana ntteetthe otu avokoliweeyo mfwalume wa mayaahuuti ori vayi? Fweeyo noona ntthottowa lawe okhu lintthamuwaawo njuwa nateela omwaaputu.”
3Wakathi mfwalume Herooti asiiliyeevo epo zaya, khwiiya wooshukulikha, na atthu ooshi a Yeruzaleemu. 4Aphano khuwaakusanya mahaakhimu a tiini ooshi na anamanozela a kano, khuwoozela vayi aari weettelaawo ovokoliwawo Al-Masiihu. 5Yo khunjipu yoori: “Belemu ya Yudeya, maana napiyu aatikha yoori:
6“ ‘Weeyo Belemu,
ya nti wa Yudeya,
weeyo hatha vattitthiiru khahi owoohafwiifweya
khwa sitati khuulu za Yuuda,
maana khwa weeyo onteela opuwa mfwalume
anttelaaye oweettettisa atthu aka a Ezirayiilu.’ ”
7Herooti khuwaakhuwela ajuwi sirini khuwoozela wakathi laapuwiyeeyo ntthottowa nttho. 8Aphano khuwaaruma Belemu awoozaka yoori: “Mwilawe mweekese ojuwa saaneene monkoni wa mwaana oto, amana mwinsikana, mwite mwikuuze yoori na miiyo kilawe kamwaaputu.”
9Paata ya onsiila mfwalume yo khusala alawa, ntarikhi khoona ntthottowa nttintthile ooniyeeyo okhu lintthamuwaawo njuwa, khulokoza khulawa khweemela puuro etile aariivo mwaana. 10Noorutela woona ntthottowa ntthile, khwiiya ofurahi venkivene. 11Khuvira nnyupa mphule khunsikana mwaana na mamaawe, khukokhora khumwaaputu. Nawiisha, khufukula maphuta aya khumwinkha tthuvo: weero, ovupa, na mafuttha oonukhela. 12Khuuziwa muulottha yoori ahirutele wa Herooti, khurutela owaya khwa tarikhi kiina.
Otthirela Misuri
13Paata ya ajuwi olawa, nlayikha la Mbwana khumpuwelela Yuusufu muulottha khumuuza yoori: “Olankhe, onthuule mwaana oto na mamaawe, otthirele Misuri. Weekhale ottuukho mpakha miiyo kiwuuze, maana Herooti onteela omweekesa mwaana oto yoori amuule.” 14Aphano ye khulankha, khunthuula mwaana na mamaawe osikhu, khweetta Misuri. 15Ottuukho eekhaliyeeyo mpakha Herooti ofwa. Khwa etthiipo khuretteya etile Mbwana alupiyeeyo khwa napiyu yoori: “Kankhuwela mwanaka aari Misuri.” 16Herooti ooniyeevo yoori attettekhiwa ti ajuwi, khwiiya wookatipukha, khuruma wuuliiwa aana ooshi a nyaakha miwiri zeettaka vathi, Belemu na miti zawaattamanana nkhama wakathi otthuupo ooziweeyo pi ajuwi. 17Aphano khurettikhana epile zaalupiweeyo ti napiyu Jeremiiya:
18“Khusiileya huula nti wa Raama
ya olila na ojikhupanyisa nwulweene;
aari Rakeele awaalilelaka aana awe akatthalaka ozurwiwa,
mwaasa wa ooshi ofwa.”
Orutela Ezirayiilu
19Paata ya Herooti ofwa, nlayikha la Mbwana khumpuwelela Yuusufu muulottha Misuri, 20khumuuza yoori: “Olankhe, onthuule mwaana na mamaawe, olawe Ezirayiilu, maana apale aari otakhaaye omuula afwa.” 21Ye khulankha, khunthuula mwaana na mamaawe, khweetta nti wa Ezirayiilu. 22Ila noosiila yoori Arikileewu mwaana wa Herooti ti asalaniyeeyo ofwalume wa papaawe, khwiiya wa woova weettawo. Nawuuziwa muulottha, khweetta nti wa Kalileya. 23Khusala eekhala sitati eniitthiwaaye Nazareeti, yoori erettikhane epile zaalupiweeyo pi manapiyu araka: “Ye onteela wiitthiwa Nnazare.”
Currently Selected:
Matewuzhu 2: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.