FILIPENSES 1
1
Alillachu capanguichi nishcami
1Caitaca Pablopash, Timoteopash, Jesucristota servijcuna cashpami, Cristo Jesushuan shujlla tucushpa, Filipos pueblopi causanajuj, Diospajlla causajcunaman escribinchi. Cangunata ricushpa yachachijcunamambash, ayudajcunamambashmi escribinchi. 2Ñucanchi Taita Diospash, Apunchi Jesucristopash ninan juyaita, casilla ali causaiguta cangunaman carachunmi munanchi.
Pabloca, crijcunamandami Diosta mañashca
3Cangunata yariashpami, ñuca Taita Diostaca pashi nishpa mañajunilla. 4Ima horas Diosta mañajushpapash, tucui cangunamandaca cushijuihuanmi cutin cutin mañajuni. 5Ali villaita villangapaj tandanajushpa callarishca punllamandapacha cunangamanmi, ñucaman alita rurashcanguichi. 6Shina alita rurachun callarichij Diosca, Jesucristo tigramui punllacamanmi, ashtahuan aligutapacha pactachinajuchun, ushaita caranga. Chaitaca alimi yachani. 7Cangunata cashna yarinaca ñucapica ali cajpimi, tucui shunguhuan juyashpa ninandapacha cushijuni. Prezu tiajujpi mandajcunapajman ñucata apajpipash, ali villaica napacha llullachu nishpami, shinllitapacha villajuni. Dios ninanda juyashpa caramujujtaca, ñucahuanllatami japinguichi. 8Jesucristo ninanda juyajunshnami, ñucapash tucui cangunataca ninanda juyajuni. Chaitaca, Taita Diosca chashnapachami nishpa villangallami. 9Ashtahuan juyarishpa, imaguta yachajunapipash, aliguta yarishpa yachajuna ushaita carachunmi, Diostaca mañajuni. 10Shina yachajushpami, imatapash aliguta ruranata yariaj causanguichi. Shina causashpami, Cristo tigramui punllapica, ima nalitapash na rurashca cashpa, na juchachi tucunguichi. 11Jesucristo cangunaman ushaita carajpimi, imatapash cashcatapacha rurashpa, fucushca granota jundachinshna, ninanda japinguichi. Chaimandami Taita Diostaca, punchapambagumi cangui nishpa, ninanda alicachinguichi.
Ñucapaj causaica, Cristopajmi nishcami
12Huauquicuna, panicuna, caita yachachunmi munani: Caipi ñuca ima tucujujpipash, ali villaica maipi cashpapash, ashtahuan ashtahuanmi uyarijun. 13Cristomanda caipi prezu tiajujtaca, jatun mandajpaj cai huasipi tucui soldadocunapash, shujcunapash tucuillami yachan. 14Shinallata chaupi yali crijcunami, ñuca prezu tiajujtaca yachan. Chaimandami ashtahuan shinlli tucushpa, Apunchi Jesusmandaca na manllashpa, Diospaj Shimitaca cushijushpa ashtahuan villanajun.
15Huaquingunaca, ñucapash chashna cashcaiman yashpa ñucata fiñashpa rimanamandallami, Cristomandaca villanajun. Ashtahuangarin shujcunaca, ali munaihuambachami villanajun. 16Caishujcunaca, paicuna alicachi tucungapaj munashpallami, ñuca prezu tiajujpi ashtahuan llaquichingapaj, Cristomanda nali shunguhuan villanajun. 17Ashtahuangarin shujcunaca, ñucata juyaimandami villanajun. Ali villaica, napacha llullachu nishpa villajushcamanda, ñuca prezu tiajujtami yachan. 18Ñucata fiñashpa villashcapash, imapash na canllu. Ali shunguhuan cashpa, nali shunguhuan cashpapash, Cristomandami villanajun. Chaimandami ninanda cushijuni. Ashtahuan cushijusharami.
19Canguna Diosta mañashcamanda, Jesucristopaj Espíritu ñucata ayudajpi, caimanda llujshinataca yachanipachami. 20Chaimandami ñuca munashpa yarijushcashna, imapipash na pingai tucusha. Cristo ñucaman ushaita carashcata yariashpami, pundamandapacha ricuchircani. Chaitaca causashpapash, huañushpapash, ashtahuan juyaillagutapachami cunambipash ricuchingapaj munani. 21Shinamandami ñucaca causajushpapash, Cristopajlla causajuni. Huañushpapash, pai carasha nishcatami japigrisha. 22Ashtahuangarin Diospajta rurangapaca, cai causaipi causajushpami ali canga yanimi. Shina cajpimi, maijanda agllaitapash na ushani. 23Causanapash, huañunapash ñucapaca ali cajpimi, ishcanditallata munani. Cristohuan causagrinacarin, ashtahuan aligupacha cajpimi, huañungapajpash munani. 24Shina cajpipash cangunamandaca cai causaipi causanami, ashtahuan ali canman yajunimi. 25Chashna yariajushpami, nara huañunataca yachani. Canguna crishcatapash, ashtahuan aliguta catishpa cushijuchunmi, tucui cangunahuan ashallatapash causashcaiman yajuni. 26Cangunapajman cutin ñuca tigramujpimi, ñucamandaca Cristo Jesushuan juyailla ninandapacha cushijunguichi.
27Cristomanda ali villaita yachajushcashna, aliguta causapanguichi ninimi. Cangunapajman shamushpapash, na shamushpapash, canguna crishpa shujllashnalla tucushpa, alipacha catinajun nijta uyangapajmi munani. Ali villaita crishpa, tucuilla shujllashnalla tucushpa, imagutapash ninanda ruranajun nijtapash, uyangapajmi munani. 28Cangunata nalicachijcunataca, imatapash na manllanachu canguichi. Paicunaca, chingaita chingagrinatami ricuchinajun. Ashtahuangarin cangunaca, ña quishpirishcatami ricuchinguichi. Chaitaca, Taita Diosmi caramujun. 29Cristomandaca, na paita crinatalla Diosca carashcachu. Ashtahuangarin paimanda llaquita apanatapashmi carashca. 30Chaimandami cangunapash, ñucapash chai llaquitallata apanajunchi. Llaquita ñuca apajujtaca, ñami pundallata ricurcanguichi. Cunambash, chai llaquita ñuca apajujtaca yachanguichimi.
Currently Selected:
FILIPENSES 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.