LUCAS 1
1
Cai librotaca, Teófilo shuti runamanmi escribishca
1Ñucanchi purapi, ima juyailla rurashcacunata, chashnapacha cajta yachashcatami, taucacuna aligutapacha callarimanda escribishpa churangapaj callarishca. 2Paicunapaj ñavihuan callarimanda imata rurajta ricushcacunami, chaitallata ñucanchiman yachachinajurca. Paicunaca Diospaj Shimita villashpami, Diospajta ruranajurca. 3Ñuca escribingapajpash ali cana cajpimi, callarimanda imata rurashcacunata manñamandapacha aliguta tapushpa purijurcani. Chaicunatami, aligutapacha churashpa, alicachi tucushca quiquin Teofiloman escribishpa cachamuni. 4Canman chaicunata alipacha yachachishca cajpipash, chai yachashcacunaca chashnapacha cajta ashtahuan aliguta yachachunmi escribini.
Bautizaj Juan huacharinatami, ángel villashca
5Judea llactata jatun mandaj Herodes mandajui punllacunapimi, Zacarías shuti cura causajurca. Paica, ñaupa Abías shuti cura purami carca. Zacariaspaj huarmica, Elisabet shutimi carca. Paica, ñaupa Aarón shuti curapaj mirai purami carca. 6Paicunaca, cusandi huarmindimi, Taita Diospaj ñaupajpica imatapash cashcatapacha rurashpa causajcuna carca. Jatun Dios rurachun mandashcacunatapash, tucuita pactachijcuna cajpimi paicunataca, pipash na juchachi ushan carca. 7Elizabetca, huahuaguta na tarij huarmimi carca. Chashnami paicunaca, huahua illaj ishcandi rucuyanajurca.
8Zacarías cura puracunaca, Taita Diospaj ñaupajpi paipajta rurana punllapimi, cashna tucurca: 9Imata ruranata ñucapaca urman nishpami, suerteta ruranata curacunaca yacharca. Chashna ruranajujpimi Zacariaspaca, Jatun Diospaj huasi ucuman yaicushpa, altarpi inciensota cushnichina urmarca. 10Inciensota cushnichijujpica, tucuilla gentecunami Diosta canllapi mañanajurca. 11Chaipica, Jatun Dios cachamushca shuj angelmi, inciensota cushnichina altar ali ladoman ñapash shayarishpa, Zacariasman ricurirca. 12Chai angelta Zacarías ricushpaca, ninandami manllarishpa musparirca. 13Shina manllarijujpimi angelca, cashna nirca:
—Zacarías, ama manllarichu. Can mañashcataca, Taita Diosca uyashcami. Shinamandami, cambaj huarmi Elisabetca, shuj jari huahuaguta ungunga. Chai huahuagutaca, Juandami shutichingui. 14Chai huahuaguhuanga, ninandapachami cushijungui. Chai huahuagu huacharishcamandaca, ashtacacunami ninanda cushijunajunga. 15Paimanmi Taita Diosca, ninan ushaita caranga. Paica, vinotapash, sidratapash na ufiangachu. Paica, mamapaj vijsapi cajpillata, Diospaj jucha illaj Espíritu jundami canga. 16Shina cashpami ashtaca israelcunata, paicunata Mandaj Taita Diospajman tigrarichun yachachijunga. 17Taita Diosca, paipaj Espiritutapash, paipaj ushaitapash Eliasman carashcashnami, Juanmambash caranga. Shina cashpami Jatun Diospaj punda shamushpa, taitacunapaj shungutaca huahuacunata juyachun alichinga. Shinallata na cazujcunatapash, imatapash cashcatapacha rurajcunashna aligutapacha yarishpa purichunmi yachachijunga. Chashna rurashpami, Quishpichij shamujpica, alipacha chasquinalla shuyanajuchun, gentecunataca alichijunga— nijurcami.
18Shina nijpimi Zacariasca, angelta cashna nishpa tapurca:
—Can villajushca pactanataca, ¿imata ricushpata yachapasha? Ñucapash rucumari cani, ñuca huarmigupash ña payagumari— nircami.
19Shina nijpi ángel tigrachishpaca, cashnami nirca:
—Ñucami, Taita Diospaj ñaupajpi shayaj Gabriel cani. Paimi, canman cai ali mushuj villanacunata villachun cachamuhuarca. 20Paillatami, pai munashca punllapi pactachimunga. Ñuca villajpi can na crishcamandami, canga huahua huacharingacaman, na rimai ushashpa upa tucugringui— nircami.
21Zacariasta canllapi shuyanajuj gentecunaca:
—¿Imashpata Diospaj huasi ucumandaca, na ucha llujshimun?— nishpami manllarinajurca.
22Diospaj huasi ucumanda llujshimushpa, na rimai ushajpica, ucupimi imapash muscuipishna ricurishcanga ninajurcami. Chashna upa cashpami, maquihuan ricuchishpalla villajurca.
23Diospajta rurana punllacuna tucurijpica, Zacariasca huasiman tigrarcallami. 24Chai punllacunapaj jipami, paipaj huarmi Elisabetca, vijsayu tucurca. Chai huarmica, maimambash na llujshishpa, picha quillacaman huasi ucupilla tiajushpami, cashna nijurca:
25—Pipash ama ashtahuan nalicachishpa ricuhuachunmi, Jatun Diosca cunambira llaquishpa, chashna carahuashca— nijurcami.
Jesús huacharimunatami, ángel villashca
26Sucta quillapimi ángel Gabrieltaca, Galilea llactapi tiaj Nazaret shuti puebloman, Taita Diosca cachamurca. 27Chai angelmi, jarihuan nara tacarishca María shuti cuitsaguman villangapaj shamurca. Chai cuitsaguca, ñaupa taita Davidpaj mirai José shuti runahuanmi, cazarangapaj ari nirishcalla carca. 28María tiajuj huasi ucuman yaicushpaca, angelca cashnami nirca:
—¡Diosmi candaca ninanda juyajun, cushijui! Jatun Diosca canhuanmi. Canga, huarmi puracunapica, bendiciai tucushcami cangui— nircami.
29Ashtahuangarin Mariaca, angelta ricushpaca chashna nijpimi: “¿Imashpashi cashna nihuan?” yashpa, ninanda manllarirca. 30Shinamandami angelca, cashna nirca:
—María, ama manllarichu. Canga, Taita Diospaj ñaupajpica alimi ricurishcangui. 31Cunanga, vijsayu tucushpami, shuj jari huahuaguta ungugringui. Chai huahuagutaca, JESÚS shutita shutichingui. 32Paica, ninan ushaita charijmi canga. Paitaca: ‘Jahua pachapi causajuj Diospaj Churimi cangui’ ninajungami. Mandaj Taita Diosca paimanmi, paipaj ñaupa taita David mandashpa tiajushcataca cunga. 33Paimi, Jacobopaj mirai israelcunataca, causaita causaicaman mandajunga. Pai mandanaca, napacha tucuringachu— nijurcami.
34Shina nijpimi angeltaca, Mariaca cashna nirca:
—¿Imashnata chashnaca cangayari? Nara cusayu canica— nircami.
35Shina nijpimi ángel tigrachishpaca, Mariataca cashna nirca:
—Diospaj jucha illaj Espíritu cambajman cachamunga. Jahua pachapi causajuj Diospaj ninan ushaihuanmi candaca, fuyushna llandunga. Shinamandami, Jucha Illaj Huahuaguta ungungui. Paitaca: ‘Taita Diospaj Churimi cangui’ ninajungami. 36Ricui, cambaj familiapura Elisabetpash, paica paya cashpapash, jari huahuagutami ña sucta quillata vijsayu tucushca. Paitaca: ‘Huahuata na tarinata yachaj huarmimi’ ninajunmi carca. 37Taita Diospaca, imata na rurai ushanllapash na tianllu— nijurcami.
38Shina nijpimi Mariaca, cashna nirca:
—Ricui, Jatun Diosta servijca, caipimi capani. Can villashcashna, Diosca ñucaman carahuachun— nircami.
Shina nijpimi angelca, paipaj ñaupajmanda anchurishpa rirca.
Elisabet huarmiguta ricungapaj, María rishcatami villajun
39Chai punllacunallatami, Judá llacta urcupi tiaj puebloman Mariaca rijurca. 40Chai puebloman chayashpaca, Zacariaspaj huasiman yaicushpami, Elisabet huarmigutaca: “¿Alillachu tiajupangui?” nirca.
41Elisabet huarmiguta María alillachu tiajupangui nijhuanmi, Elisabetpaj vijsa ucupi huahuaguca cuyurirca. Elisabetca, Diospaj jucha illaj Espíritu jundashcami carca. 42Shina cashpami Mariataca shinllita rimashpa, cashna nijurca:
—Candaca, tucui huarmicunatapash yalitami, Diosca bendiciashca. Paillatami, cambaj vijsa ucupi huahuagutapash bendiciashca. 43Canga, ñucata Mandajpaj mamami capangui. ¿Imashpata ñucatara ricungapaj shamuhuangui? 44Can alillachu tiajupangui nijhuanmi, ñuca vijsa ucupi huahuaguca, cushijushpa cuyurirca. 45Canman villachun Jatun Dios cachamushcataca, pactachinapacha cashcata crishpami, ninanda cushijungui— nijurcami.
46Shina nijpimi Mariaca, cashna nijurca:
“Ñucaca tucui almahuanmi, Jatun
Diostaca ninanda jatunyachijuni.
47Ñuca espiritupash, ñucata Quishpichij
Taita Dioshuanmi ninanda cushijun.
48Diosta servij ñuca na valigutaca,
ninandami llaquihuashca.
Cunanmandapachami ñucataca, tucui jipa
miraicunapash alicachi tucushcami ninajuhuanga.
49Tucui Ushaita Charij Diosmi,
ñucapi tucuita cashna juyailla rurahuashca.
Paipaj shutica, jucha illajmi.
50Paita manllajcunapaca, pai llaquinaca mirai miraicunacamanmi.
51Diosca, paipaj ninan ushaihuanmi juyailla rurashca.
Shungupi jatun tucushpa jariyajcunataca, maitapashmi cachashca.
52Ninan ushaita charijcunataca, paicuna mandashpa
tiajujmandapash anchuchishpami, na jariyashpa
causajcunatara jatumbi churashca.
53Ninanda yarjachishpa purijcunamambash,
imagutapash llashajtami carashca.
Ashtahuangarin ninan charijcunataca,
imapash illajtami cachashca.
54Paita servij israelcunatami,
paicunata llaquij cashcata yarishpa ayudarca.
55Shina llaquinatami, ñucanchi ñaupa taita
Abrahamman, paipaj miraicunamambash,
causaita causaicaman yarijushallami nishpa villajurca” nijurcami.
56Mariaca, quimsa quillatashnami, Elisabetpaj huasipi causajushpa, paipaj huasiman cutin tigrarca.
Bautizaj Juan huacharishcatami villajun
57Ña unguna punlla pactajpimi Elisabetca, shuj jari huahuaguta ungurca. 58Taita Diosca paita jatunyachishpa, ninanda llaquishpa carashcata yachashpami, ladolla causajcunapash, familiacunapash, Elisabethuan ninanda cushijunajurca. 59Ña pusaj punlla tucujpimi, cashna tucurca: Huahuaguta circuncisión nishcata rurangapajmi apanajurca. Shina apashpami:
—Cai huahuagutaca, paipaj taitatashna Zacariasta shutichishun— ninajurca.
60Shina ninajujpimi, mamaca:
—Na chashnaca shutichinachu, Juandami shutichina capan— nirca.
61Shina nijpimi paicunaca, cashna ninajurca:
—¿Imashpata Juan shutitara munangui? Cambaj familia purapica, shujllapash chashna shutihuanga na tianllu— ninajurcami.
62Paicunaca maquihuan ricuchishpami:
—Cambaj huahuagutaca, ¿ima shutitata shutichishun?— nishpa, taitataca tapunajurca.
63Shina tapujpimi, tablaguta mañashpa: “Cai huahuaguca, Juan shutimi capan” nishpa, paipaj taitaca escribishpa ricuchirca. Chaita ricushpaca, tucuillami ninanda manllarirca. 64Shina rurashpallami Zacariasca, cutin rimai ushashpa, Taita Diostaca ninanda alicachijurca. 65Paipaj ladolla causajcunapash, tucuillami ninandapacha manllarinajurca. Chashna tucushcataca, Judea llactapi tiaj tucuilla urcucunapi causajcunapashmi, chai tucuita ninanda parlanajurca. 66Shina tucushcata uyashpaca:
—Chai huahuagu viñashpaca, ¿imashi tucunga?— nishpami, na cungashpa tucuicuna tapurinajurca.
Jatun Diosca paipaj ushaihuanmi, chai huahuagutaca cuidajurca.
Dios ima nishcatami, Zacarías villashca
67Juanbaj taita Zacariasca, Diospaj jucha illaj Espíritu junda cashpami, Dios ima nishcata cashna nishpa villajurca:
68“Ñucanchi israelcunata Mandaj
Taita Diostaca, aligumi cangui nishunchi.
Paimi, pai agllashca gentecunata ricungapaj shamushpa quishpichishca.
69Ninan ushaita charij Quishpichijtaca,
paita servij Davidpaj mirai puratami, ñucanchipajman cachamushca.
70Paipajlla causanajushpa, pai ima nishcata villajcunahuan
ñaupamandallata imashna villachishcashnallatami cachamushca.
71Ñucanchita fiñajcunamanda ñucanchita millanayachi
tucui runacunapaj maquimandapashmi quishpichishca.
72Ñucanchi ñaupa taitacunata llaquishpa,
paillata ari nishcata na cungashpa pactachingapajmi quishpichishca.
73Ñucanchi ñaupa taita Abrahamman
carashapachami nishpa juramentushpaca,
cunambi ñucanchiman carangapajmi, cashna nishca:
74‘Ñucanchita fiñajcunapaj maquimandaca quishpichishami.
Shinamandami ñucataca, na manllashpa servinguichi.
75Ñucanchi huañuna punlla chayangacamanmi,
imatapash cashcatapacha rurashpa, ñucapaj
ñaupajpica ñucapajlla aliguta causashpa,
ñucataca servinguichi’ nishcami.
76Can huahuaguca: ‘Jahua pachapi causajuj
Dios ima nishcata villajmi’ nijpimi puringui.
Canmi, Jatun Dios cachamujpi shamushpa purichunga,
ñanda alichishpa ñaupajungui.
77Shina ñaupashpaca: ‘Diosmi, pai agllashcacunapaj
juchacunata anchuchishpa quishpichinga’ nishpami villajungui.
78Ñucanchi Taita Diosca, ninandapacha
llaquishpami, indi punchapamba llujshimunshna,
jahua pachamanda ñucanchita ricungapaj shamushca.
79Huañunata manllashpa, yana yanapishna causajcunata,
michashna punchayachingapajmi, paica shamushca.
Casilla ali causaita ñucanchi charichumbash,
chai ñanda purichun ricuchingapajmi,
paica shamushca” nijurcami.
80Chai huahuaguca, Diosmanda aliguta yachajushpami viñajurca. Israelcunaman villangapaj llujshina punlla chayangacamanmi, jichushca pambacunapi paica causajurca.
Currently Selected:
LUCAS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.