SANTIAGO 1
1
TUCUI CRIJCUNAMAN ESCRIBISHCAMI
Alillachu capanguichi nishcami
1Taita Diosta, Apunchi Jesucristota servij Santiagomi cani. Caiman chaiman rishca causanajuj chunga ishcai Israel aillucunatami, alillachu capanguichi nini.
Ali yachaica, Taita Diosmandami shamun
2Ñuca juyashca huauquicuna, panicuna, shuj shuj llaquicunata japishpapash, ninanda cushijushpa causanguichi. 3Crij cashpa llaquicunata apanaca, na ñapash fiñarishpa causanatami yachachijun. Chaitaca yachanguichimi. 4Ashtahuangarin na ñapash fiñarishpa causanami, tucuita aligutapacha yachachijun. Shina causashpami ima pandatapash na rurashpa, alipacha crij, imagupash na illajpi, tucuita charinguichi.
5Canguna purapi ali yachaita maijambash na charishpaca, Taita Diostami mañana canguichi. Paica carangapachami. Pimambash na mitsashpa, ashtacata caramunga. 6Ashtahuangarin na ishcai shungu tucushpa, alipacha crishpa mañachun. Ishcai shungu tucushpa mañajcunaca, mama cucha yacuta huaira caiman chaiman shitajunshnami. 7Maijambash chashna mañashpaca, Jatun Dios imagutapash carajpi chasquinataca ama yajuchun ninimi. 8Ishcai shungu tucushpa mañaj runaca, imata rurashpapash, aliguta causaitaca na ushanllu.
9Na jariyashpa purij crijcunaca, Dios jatumbi churajpi cushijuchun ninimi. 10Ashtahuangarin ninanda charij cajpi Dios quichujpica, cushijuchun. Ninan charij runaca, jihua sisa chaquinshnami tucuringa. 11Indi llujshimushpa ninanda rupajpica, jihuaca chaquinllami. Shinallata sisa urmajpica, chai juyailla tiajushcapash tucurinllami. Shinallatami ninanda charij runapash, pai tucuita rurajushcatapash saquishpa tucuringa.
Llaquicuna shamujpica, mishanami canguichi
12Nali munai shamujpipash na chaita ruraj runaca, ninandami cushijun. Nali munaita shinlli tucushpa mishashpaca, causaita causagrinata ricuchij coronatami japigringa. Chaitaca, paita juyajcunamanllami Taita Diosca carashapacha nijushca. 13Nali munai maijandapash japijpica, ama caitaca Taita Diosmi carahuan yajuchun ninimi. Taita Diosca, nali munaitaca na charishpami, nali munaitaca pimambash na cujun. 14Ashtahuangarin nali munaica, gentecunapaj shungupimi tiajun. Shina cashpami pita cashpapash, nalita rurachun yarichishpa urmachijun.
15Chai nali munaita rurajpimi, juchaca ninanda miran. Chai juchata ashtahuan rurajpi mirashpami, huañuiman apajun.
16Ñuca juyashca huauquicuna, na pandarinachu canguichi. 17Taita Diosca, jahua pachamandami juyailla aliguta imatapash na pandashpa rurachun caramujun. Paica, jahuapi punchayachijcunata ruraj Taitami. Paica, na shuj tucushpa chashnallatami. Paitaca, ima llandupash na yanayachi ushanllu. 18Diosca, pai munashpami, na llullashpa villajuj Shimimanda mushujta huacharinata ñucanchiman caramurca. Shinamandami, pai rurashcacunapaj punda ñucanchi tiagrichun munashca.
Diospaj Shimitaca, pactachijcunami cana
19Shina cashcamanda ñuca juyashca huauquicuna, panicuna, imaguta cashpapash tucuicunallatami aliguta uyajcuna, aliguta yarishpara rimajcuna, na ñapash fiñarijcuna cana canguichi. 20Pipash fiñarishpaca, imatapash cashcatapacha rurachun Taita Dios munashcatami na pactachijun. 21Shinamandami mapata ruranatapash, nalitalla ruranatapash, tucuilla jichuna canguichi. Shina jichushpami, Diospaj Shimita cangunapaj shungupi tarpushcashna tiajujtaca, ali shunguhuambacha chasquina canguichi. Chai Shimimi, cangunapaj almataca quishpichi ushan.
22Ashtahuangarin Diospaj Shimitaca pactachijcuna caichi, na yanga uyashpalla purijcunachu cana canguichi. Uyashpalla purinajushpaca, cangunallatami umachirinajunguichi. 23Diospaj Shimita uyashpapash na pactachijushpaca, paipaj ñavita espejopi ricurij runashnami. 24Paica, paipaj ñavita imashna cajta ricurishpaca rinllami. Chai jipaca, imashna cashcatapash cunganllami. 25Ashtahuangarin huatashcashna causanajujmanda cacharichij Diospaj na pandashpa mandashca Shimita uyashcata shungupi alicachishpaca, na cungashpami pactachinga. Shina pactachishpaca, imata rurashpapash ninandami cushijunga.
26Canguna purapi maijambash ali crijmi cani nirijushpapash, pai rimajuj jallutapash na jarcai ushashpaca, paipaj shungupillatami umachirijun. Shina crijmi cani nijushcapash, yanga yangami. 27Taita Diospaj ñaupajpi tucui shunguhuambacha ima mapapash illaj crij canaca, cashnami: Taita mama illaj huahuagucuna, sapalla huarmigucuna jatun llaquipi cajpica ricugrinami. Cai pachapi imapash nalihuan mapayanamandaca, cuidarishpami causana.
Currently Selected:
SANTIAGO 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.