OSEAS 1
1
Oseas shuti runapaj na cazuj huarmimandapash, huahuacunamandapashmi villajun
1Beeri shuti runapaj churi Oseas shuti runaguman, Mandaj Dios villashca shimicunami. Cai shimicunataca, Uzías, Jotam, Acaz, Ezequías shuti jatun mandajcuna, Judá llactata mandajui punllacunapimi villarca. Chai punllacunallatami, Israel llactataca, Joás shuti runapaj churi jatun mandaj Jeroboam shuti runa mandajurca.
2Oseasta villachun mandashca, Mandaj Diospaj shimicunaca, cashnami callarin: Mandaj Diosca, Oseastaca cashnami nirca: “Caimanda rishpa, jaricunahuanlla causaj huarmihuan cazaragri. Chai huarmihuanga, jaricunahuanlla causaj huarmipaj huahuacunata charigri. Cai llactapi causajcunaca, Mandaj Diosmanda anchurishpami huainayanajun” nircami.
3Shina nijpi Oseas runa rishpaca, Diblaim shuti runapaj ushi Gomer shuti huarmihuanmi cazararca. Chai huarmica, vijsayu tucushpami, shuj jari huahuaguta ungurca. 4Mandaj Diosca, cashnami nirca: “Chai huahuataca, Jezreel shutita shutichingui. Jezreel shuti pueblopi causajcunata huañuchishcamandami, cunanmanda asha punlla jipacunaca, Jehú shuti runapaj miraicunatapash tucuchisha. Israelcunata mandanatapashmi tucuchisha. 5Chai punllallatami, israelcunapaj arcotaca, Jezreel shuti pugru pambapi faquisha” nircami.
6Chai huarmica, cutin vijsayu tucushpami, shuj huarmi huahuaguta ungurca. Chaimandami Taita Diosca, cashna nirca: “Chai huahuataca, Lo-ruhama#1:6 Lo-ruhama nishpaca: «Na llaquishcacunami canguichi» nijunmi. shutita shutichingui. Israelcunataca, na ashtahuan llaquishachu. Ashtahuangarin paicunata llaquinataca, tucuillatami anchuchisha.
7Ashtahuangarin Judá llactapi causajcunataca llaquishami. Paicunataca, paicunata Mandaj Taita Dios ñucamandallatami quishpichisha. Arcohuan, espadahuan, jatun macanajuihuan, caballopi tiarishca soldadocunahuanga, na quishpichishachu” nircami.
8Lo-ruhama shuti huahuata, chuchumanda anchuchishca jipami, Gomer shuti huarmica cutin vijsayu tucushpa, shuj jari huahuaguta ungurca. 9Mandaj Diosca, Oseastaca cashnami nirca: “Chai huahuataca, Lo-ammi#1:9 Lo-ammi nishpaca: «Na ñuca agllashcacunachu canguichi» nijunmi. shutita shutichingui. Cangunaca, na ñuca agllashcacunachu canguichi, ñucapash na cangunapaj Taita Dios cashachu” nircami.
10Chashna cajpipash israelcunaca, mama cuchapi tiaj t'iyu alpashnami, na medi ushanalla, na cuentai ushanalla ashtacapacha canga. Maipimi paicunataca: “Cangunaca, na ñuca agllashcacunachu canguichi” nishca pushtupillatami: “Causajuj Taita Diospaj huahuacunami canguichi” ni tucunajunga. 11Judá shuti runapaj miraicunapash, israelcunapash tandanajushpami, shujlla mandajta agllanajunga. Tucui cai pachamandami vichai shamunajunga, Jezreelpaj punllapica jatunmi canga.
Currently Selected:
OSEAS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.