DEUTERONOMIO 1
1
Horeb urcupi cajpi, Mandaj Dios imatalla carasha nishcatami, Moisesca israelcunaman yarichishca
1Cai shimicunaca, Jordán yacu chimba ladopi cashpa, Puca Cucha chimba purapi Arabá shuti jichushca pambapi, tucuilla israelcunaman Moisés villashca shimicunami. Parán, Tofel, Labán, Hazerot, Dizahab shuti pueblo ladollacunapimi villajurca. 2Horeb shuti urcumanda, Seir shuti urcuta rishpa, Cades-barnea shuti puebloman chayangapaca, chunga shuj punllacunapi chayanami carca. 3Egiptomanda llujshishcapash, chuscu chunga huata tucujpi, chai huatapajllata chunga shuj quilla callari punllapimi, cashna tucurca: Israelcuna tucui imatalla ruranajuchun, Mandaj Dios mandashcashnallatami Moisesca paicunaman villajurca. 4Amorreocunata jatun mandaj, Hesbón shuti pueblopi causajuj Sehón shuti runatapash, Edrei shuti, Astarot shuti pueblocunapi causaj, Basán llactata jatun mandaj Og shuti runatapash mishashca jipami, Moisesca chashna villajurca. 5Jordán yacu chimba ladoman tiaj Moab shuti llactapi cashpami, Moisesca cai mandashcacunata cashna nishpa yachachi callarirca:
6“Ñucanchita Mandaj Taita Diosca, Horeb shuti urcupimi, cashna nishpa villajurca: ‘Cangunaca, cai urcupica ñami unaita causashcanguichi. 7Cangunaca, amorreocuna causanajuj urcucunaman, chai ladopillata tiaj tucui llactacunaman tigrashpa richilla. Chai llacta ladolla tiaj Arabá shuti llactapi, urcupi, pugru pambacunapi, Neguev shuti jichushca pambapi, mama cucha ladollapi causanajuj cananeocunapaj llactapi causagrichilla. Líbano llacta ladopi tiaj Eufrates shuti jatun yacu ladocaman rishpa causagrichilla. 8Ricuichi, chai llactataca ñucami cangunapaj maquipi churarcani. Chai llactataca, Mandaj Taita Dios ñucami, cangunapaj ñaupa taita Abrahamman, Isaacman, Jacoboman, paicunapaj jipa miraicunamambash carashami nishpa juramenturcani’ nircami.
Juezcunata churashcatami villajun
(Éx. 18:13-27)
9Chai huatacunallatami, cangunaman cashna nishpa villarcani: ‘Cangunataca, na ñucalla pushai ushanichu. 10Cangunata Mandaj Taita Diosmi, cangunataca ashtacatapacha mirachishca. Ricuichi, shinamandami cunanga, jahua pacha luzerocunashna, ashtacapacha canguichi. 11¡Cangunapaj ñaupa taitacunata Mandaj Taita Diosllata cangunataca, cunan tiashcamandaca, huaranga viajecaman ashtahuan mirachipachun! ¡Shinallata imashna nishcashnallata, cangunataca bendiciapachun! 12Cangunapaj llaquicunata, cangunapaj llashachijuj llaquicunata, canguna fiñanajushcataca, ¿imashnata ñucalla alichishayari? 13Cangunata mandaj cachun churangapaj, cangunapura aillucunamanda alipacha yachajushcacunata, ali yuyaita charijcunata, imata ruranatapash alipacha yachaj runacunata apamuichi’ nircanimi.
14Shina nijpimi cangunaca: ‘Can nishcata ruranaca alimi’ nishpa tigrachircanguichi.
15Shina nijpimi, cangunapaj aillu puramandaca, alipacha yachajushcacunata, imata ruranatapash alipacha yachaj runacunata agllarcani. Paicunatami, cangunata mandaj cachumbash huaranga runacunata, patsaj runacunata, picha chunga runacunata, chunga runacunata, mandaj cachumbash churarcani. Shinallata cangunapaj aillu puracunata mandachumbashmi churarcani. 16Shina churashpami cangunapaj juezcunataca, cashna nishpa mandarcani: ‘Imata cashpapash cangunapaj huauqui puracunataca, aliguta uyanguichi. Maijan runata cashpa, cangunapaj huauquicunata cashpa, shuj llactamanda runata cashpapash, imatapash cashcatapacha rurashpa alichinguichi. 17Imatapash ricushpa alichinapica, na ñavipi ricushpalla alichinachu canguichi. Jatun nishcacunatapash, yangallacunatapash, chashnallatami ali ricushpa alichina canguichi. Pitapash na manllanachu canguichi. Chaita ricushpa alichinaca, Taita Diospajmi. Canguna na alichi ushashcatalla, ñucapajman apamunguichi. Chaitaca, ñuca uyashpa alichishallami’ nishpami mandarcani.
18Chai huatacunallatami, canguna tucui imatalla ruranataca mandajurcani.
Chunga ishcai runacunami, pacalla chapangapaj rishca
(Núm. 13:1-33)
19Horeb shuti urcumanda llujshishpaca, canguna ricushca chai tucui jatun pambata, manllanayai jichushca pambatami purircanchi. Ñucanchita Mandaj Taita Dios mandashcashnallatami, amorreocunapaj urcu ñanda shamurcanchi. Chashna shamushpami, Cades-barnea shuti pueblocaman chayamurcanchi. 20Shinamandami cangunataca, cashna nircani: ‘Amorreocunapaj urcumanmi chayamushcanguichi. Cai llactatami, ñucanchita Mandaj Taita Diosca ñucanchiman cararca. 21Ricuichi, cai llactataca cangunata Mandaj Taita Diosmi, cangunaman cararca. Cangunapaj ñaupa taitacunata Mandaj Taita Dios imashna nishcashnallata vichai rishpa japichilla. Na manllanachu canguichi, na shaijunachu canguichi’ nircanimi. 22Shina nijpipash cangunaca, ñucapajman tucuilla shamushpami, cashna nihuarcanguichi: ‘Nucanchita ñaupashpa rishpa llactata rijsichun, runacunata cachashunchi. Paicuna tigramushpami, maijan ñanda ñucanchi vichai rinatapash, maijan pueblocunamanra chayanatapash villaj shamunga’ nihuarcanguichimi.
23Shina nishcacunaca ali uyarijpimi, canguna puramanda chunga ishcai runacunata, cada aillucunamanda shuj runata agllarcani. 24Paicunata cachajpi rishpami, urcuta vichai rishpa, Escol shuti pugru pambaman chayagrirca. Chaiman chayashpami, llactata rijsishpa purinajurca. 25Shina purinajushpa, chai llactapi fucushcacunata ñucanchiman apashpa tigramushpami, cashna nishpa villanajurca: ‘Ñucanchita Mandaj Taita Dios, ñucanchiman carashca llactaca aligumi’ ninajurcami. 26Shina nijpipash vichai ringapaj na munashpami purinajurcanguichi. Ashtahuangarin cangunata Mandaj Taita Dios mandashcatami, na cazurcanguichi. 27Shinallata cangunapaj carpacunapica, cashna nishpami nalicachishpa parlanajurcanguichi: ‘Mandaj Diosca, ñucanchitaca na ricunayachinllu. Ashtahuangarin amorreocunapaj maquipi churashpa tucuchingapajmi, Egipto llactamandaca llujchimushca. 28¿Ñucanchica, maimanda vichai rishunyari? Ñucanchi huauquicunapash cashna nishpa villashpami, ñucanchi shungupi manllaita curca: Chai gentecunaca, ñucanchita yali ashtaca, ninan jatun runacunamari. Chai jatun pueblocunaca, muyundi jatun pircacunatami charin. Shinallata Anac shuti manllanayai jatun runapaj miraicunatapashmi, chaipica ricurcanchi ninajurcami’ nircanguichimi.
29Shina ninajujujpimi, cashna nircani: ‘Na manllarinachu canguichi. Chai runacunataca, na manllanachu canguichi. 30Cangunata ñaupashpa rijuj cangunata Mandaj Taita Diosmi, cangunamandaca macanajunga. Egiptopi tucui imatalla cangunamanda, cangunapaj ñaupajpi rurashcashnallatami ruranga. 31Cangunata Mandaj Taita Dios pushamushcatami, jichushca pambapica ricurcanguichi. Shuj taita, paipaj churita marcashpa pushamunshna tucui ñambi cuidashpa, cai pushtucaman chayachimushcatami ricurcanguichi’ nircanimi. 32Shina nijpipash cangunaca, cangunata Mandaj Taita Diostaca, na crishpami purircanguichi. 33Paimi, carpacunata shayachishpa canguna maipi tiarinata ricuchingapaj, ñanda ñaupashpa rijurca. Tutapica, canguna ñanda richun ninahuan ricuchishpami ñaupajurca. Punllapica, fuyuhuanmi ñaupajurca.
Israelcunatami Taita Diosca llaquichishca
(Núm. 14:20-35)
34Mandaj Diosca, canguna rimashcata uyashpami, ninanda fiñarishpa, cashna nishpa juramenturca: 35‘Paicunapaj ñaupa taitacunaman carashami nishpa juramentushca juyailla llactataca, cai nali mirai gentemandaca maijan runallapash na ricungachu. 36Jefone shuti runapaj churi Caleb runallami, chai llactataca ricunga. Pai purijushca llactataca paimambash, paipaj miraicunamambashmi carasha. Paillami, Mandaj Dios ñucata ali cazushpa catijurca’ nircami.
37Cangunamandami Mandaj Diosca, ñucahuambash ninanda fiñarishpa cashna nihuarca: ‘Cambash, chai llactamanga na yaicunguichu. 38Nun shuti runapaj churi Josuemi, canda ayudashpa purijun. Paimi, chai llactaman yaicunga. Chai llactata, paillata israelcunaman cuna cashcamandaca, ali yuyaicunata paiman cungui. 39Cangunaca, cangunapaj jari huahuacunataca, macanajushpa quichushpami apanga yashpami causarcanguichi. Cunambica alitapash, nalitapash nara yachaj cambaj churicunami, chai llactaman yaicunga. Chai llactata paicunaman cujpimi, paicunapaj cachun japinga. 40Ashtahuangarin cangunaca, Puca Cuchaman rina ñanda jichushca pambaman tigraichilla’ nihuarcami.
Horma shuti pueblopimi mishai tucunajushca
(Núm. 14:39-45)
41Shina nijpimi cangunaca, cashna nishpa tigrachircanguichi: ‘Ñucanchica, Mandaj Diosta fiñashpami juchata rurashcanchi. Ñucanchica, ñucanchita Mandaj Taita Dios imashna tucuita mandashcashnallatami, vichai rishpa macanajugrishun’ nircanguichimi. Cangunaca, macanajunacunata tucuicuna japishpami, macanajungaj urcuman vichai ringapaj alichirircanguichi. 42Chaimandami Mandaj Diosca, cashna nihuarca: ‘Macanajungapaca, na vichai rinachu canguichi. Ñucaca, na cangunahuan canichu. Cangunata fiñajcunahuan ama mishai tucungapajmi, na rina canguichi ningui’ nihuarcami.
43Chaita cangunaman villajpipash, na uyangapaj munashpami purinajurcanguichi. Ashtahuangarin Mandaj Dios mandashcata na cazushpami purinajurcanguichi. Jatun tucushpa na cazushpa yalishpami, chai urcuman vichai rircanguichi. 44Ashtahuangarin chai urcupi causaj amorreocuna cangunata tuparingapaj llujshimushpami, millai balun chuspicunashna catinajurca. Seir shuti urcupi mishashpaca, Horma shuti pueblocamanmi catinajurca. 45Shinamandami chaimanda cutin tigramushpaca, Mandaj Diospaj ñaupajpi huacarcanguichi. Ashtahuangarin pai Mandaj Diosca, canguna huacanajujtaca na uyarcachu, rinritapash na mañachircachu. 46Shinamandami cangunaca, Cades shuti pueblopi, tauca huatacunata causarcanguichi. Tucui chai huatacunatami, chaipi causarcanguichi.
Currently Selected:
DEUTERONOMIO 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.