3 JUAN 1
1
Alillachu capangui nishcami
1Crijcunata mandaj rucu cashpami, ñuca juyashca Gayo shuti huauquiguman, caitaca escribini. Candaca, tucui shunguhuanmi juyajuni.
2Juyashca huauquigu, canga tucui shunguhuanmi Diosta catijungui. Shinallata tucui ima ruranapipash, cambaj cuerpopash, ali cachunmi munapani. 3“Na llullashpa villajuj shimita crishpami, aliguta causajun” nishpami, caishuj huaquingunaca ñucapajman shamushpa, canmanda villahuarca. Shina villajpimi, ninanda cushijurcani. 4“Na llullashpa villajuj Shimita ñuca huahuacunashna causanajushpa, aliguta catinajun” nijta uyashpami, ninandapacha cushijuni.
Gayo shuti runaguca, cushijushpa mingachij cajpimi alicachishca
5Juyashca huauquigu, canga crijcunata servishpami, aliguta rurajungui. Na rijsishca crijcunamangarin, ashtahuan aligutami rurajungui. 6Paicunami, can imashna juyashcataca, caipi tandanajushca crijcunaman villarca. Taita Diosta servijcuna cajpimi, pai munashcashna ashtahuan purichun, imagupaj illajpipash ricushpa carashpa cachapangui nini. 7Cristota juyaimanda villashpa purijcuna cashpami, na crijcunapaj maquimandaca, imatallapash na japinajun. 8Shina cajpimi ñucanchica, paicunaman imagutapash caranata charinchi. Shina carashpami, na llullashpa villajuj Shimita ashtahuan villachun ayudanchi.
Diótrefes shuti runaca, mingachijcunata jarcajmi cashca
9Tandanajuj crijcunamanmi, ña escribimurcani. Ashtahuangarin Diótrefes shuti runaca, paicunata mandangapaj yaicushapacha nishpami, ñucanchi rimashcataca na cazujun. 10Chashna cajpimi ñuca rishpaca, ñucanchita llullashpa nali shimita huasha parlashcata tapuchingapaj, paita cayachun cachasha. Paica, na chaitalla rurajunllu. Ashtahuangarin shuj crijcuna chayajpipash, na mingachinllu. Maijan mingachingapaj munajcunatapash, napacha mingachinachu nishpami, tandanajuj crijcunamandapash llujchishpa cachajun.
Demetrio shuti runaguca, aligutami causajushca
11Juyashca huauquigu, imatapash nalita ruranataca ama catishpa, ashtahuangarin aliguta rurashcata catingui. Maijan cashpapash aliguta rurashpa causajushpaca, Taita Diospajmi. Ashtahuangarin maijan cashpapash nalita rurashpa causajujca, Taita Diosta na ricushcachu.
12Demetrio shuti runataca, tucuicunami alicachishpa parlanajun. Na llullashpa villajuj Shimita catishpami, paica aliguta causajun. Ñucanchipash, paitaca alicachinchimi. Ñucanchi villashca shimipash, na llulla cajtaca, cangunallata yachanguichimi.
Aliguta causapanguichi nishpami tucuchishca
13Canman escribinataca, ashtacatami charini. Tintahuan, plumahuan escribishpalla yachachingapaca na munanichu. 14Ashtahuangarin canda ricungapajmi, uchalla ringapaj munani. Chaipimi, chimbapura ñavi ñavi ricushpa parlanajushun.
15Casilla ali causaita charichunmi munani. Canda alipacha rijsijcunapash, alillachu capangui ninajunmi. Ñucanchipaj alipacha rijsijcunatapash, alillachu capanguichi ninajunmi nipangui.
Currently Selected:
3 JUAN 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.