2 TESALONICENSES 1
1
Alillachu capanguichi nishcami
1Caitaca Pablohuan, Silvanohuan, Timoteohuanmi, Tesalónica pueblopi tandanajuj crijcunaman escribinchi. Cangunaca, Taita Dioshuan, Apunchi Jesucristohuanmi canguichi. 2Ñucanchi Taita Diospash, Apunchi Jesucristopash ninan juyaita, casilla ali causaiguta cangunaman carachunmi munanchi.
Taita Diosca juchata rurajcunataca, Cristo tigramujpimi llaquichinga
3Huauquicuna, panicuna, cangunamandaca punllandi Taita Diosta pashi ninapacha cajpimi, chashna mañanajunchilla. Cangunaca, ashtahuan crishpa, caishuj chaishuj ninan juyaita charishpa, shujcunatapash juyanajujpimi, shina mañanajunchilla. 4Cangunaca, catiriashpa llaquichijpipash, na ñapash fiñarishpa, alipacha crishpa, ali shunguhuanmi jatun llaquicunata apanajunguichi. Chaitaca, Taita Diospajlla tandanajuj crijcunaman villashpami, cangunamandaca cushijunchi. 5Shina llaquita apashpami, chai llaquichijcunataca Taita Diosca na yangamanda llaquichina cajta ricuchinguichi. Taita Dios mandajuj llactaguman rinalla cangapajmi, llaquitaca apanajunguichi.
6Taita Diosca, imatapash cashcatapacha ruraj cashcamandami, cangunata llaquichijcunataca, imashna ninanda llaquichishcashnallata paicunatapash tigrashpa llaquichinga. 7Cunambi canguna jatun llaquita apashcamandaca, ñucanchindimi Diosca samachinga. Apunchi Jesús jahua pachamanda paipaj ninan ushaita charij angelcunandi, tigramujpimi, chaica pactanga. 8Punchapamba nina chaupipi pai tigramushpami, Taita Diosta na rijsijcunataca llaquichinga. Shinallata ñucanchi Apunchi Jesucristomanda ali villaita na cazujcunatapashmi llaquichinga. 9Paicunaca, Apunchi Jesús ninan ushaihuan punchapamba tiajuj ñaupajmandami, caruta shitai tucushpa, chingaita chingashpa llaquita apanajunga. 10Pai shamui punllapica, paipajlla causanajuj tucui crijcunami, punchapamba shamujujta ricushpa, paitaca punchapambagumi cangui ninajunga. (Cangunapash, chashnapachami nishpa ñucanchi villajpi crishcamandami, chaipica tandanajushca canguichi).
11Ñucanchi Taita Dios cangunata cayashca cajpimi, pai munashcashna causachun cangunamandaca, punllandi mañarianajunchilla. Shinallata paipaj ushaihuan paita crishpa, imatapash aliguta rurashpa pactachinajuchunmi, cangunamanda Diostaca mañanajunchi. 12Ñucanchi Taita Diospash, Apunchi Jesucristopash ninanda juyajpimi aliguta causashpa, Apunchi Jesucristotaca punchapambagumi cangui ninajunguichi. Shinallata Jesucristota crij cajpimi, cangunataca ninanda alicachinga.
Currently Selected:
2 TESALONICENSES 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.