Matiu 17
17
ẠJizos anmia
(Mạk 9.2-13; Luk 9.28-36)
1Odiiny aḍughul-otu reten, kụ ạJizos ạtuugh Pita rꞌaJems rꞌạJon umor phọ ọdi bịn ạmagh kụ aḍiemiom bịdi ọghi ọsiiny eegum dị ẹkel ạnyu. 2Kụ ọdi anmia pạ aghisigh phọ ạbidi, kụ arisigh ọdi ạmu ịdipho erumuḍio, kụ ibura phọ ọdi ekitonu ẹḅaal forororo ịdipho ạḍiḅaal. 3Kụ bịdi ọmiin Mozis rꞌIlaija dị rọkaaphan rꞌọdi. 4Kụ aPita ạḅeni Jịzos mọ, “Ọmoogh-we, ịduon yira odi bọ sịen, mọ nạ kameera ni ọbo ẹnighe ni dị yoor kọlogh ịraar arogbogo, oniin ọlo ạna, oniin ọlo aMozis, kụ oniin ọlo Ilaija.”
5 #
Emi 22.2; Ạsuo 2.7; Azay 42.1; Mat 3.17; 12.18; Mạk 1.11; Luk 3.22;
Dut 18.15
#
2 Pit 1.17, 18 Ọdi odi rạkaaph ghan kụ ọotu dị rạmu asoorom bịdi aghoph, kụ ẹḍogh ẹḍua pạ ọotu phọ, kụ ẹḅem mọ, “Ọphon kụ ogina Ọony ạmi dị mị ạphomoghian, ọpo ạkar bọ ụḅeeraan ịmi iboom. Ịnaghanan nyọdi.”
6Kụ mem dị ạbumatuan phọ ọnaghan bọ ẹḍogh phọ, bịdi uḅololo ni, kụ iḍighi ni ruugu esi ạbidi. 7Kụ ạJizos aru ạḅogh bịdi kụ ạḅeni mọ, “Iḅerenu, kékiilaan.” 8Kụ bịdi opoophe ghisigh ạbidi bịn ọnon oye ụ́miin mun, emuton Jịzos.
9Ịdipho bịdi ọḍua bọ ạnyu eegum mọ rosoor, kụ ạJizos ạto ạḅeni bịdi mọ, “Kẹ́kaaph ịpe nyina ẹmiin bọ ẹḅeni oye, tụtu Ọony phọ Oye aḅetenu esi aḍuugh phọ.”
10 #
Mal 4.5
Kụ ạbumatuan phọ opuru nyọdi mọ, “Iḍighi ika kụ ạbutughemia iilogh phọ ọḅem bọ mọ Ilaija kụ kạpur atu phọ?”
11Kụ ạJizos mọ, “Igey ni, Ilaija kụ kạpur atu ạasa oomo ạraraar. 12#Mat 11.14Kụ mị rịḅeni ghan inyina mọ Ilaija maru ni, kụ bịdi nyọdi elegh ụ́logh, kụ uḍighi ni nyọdi ịlo ẹḅeeraan bịdi. Ịdipho kẹn kụ ẹdi kọmiine Mọony phọ Oye.”
13Pọ kụ amem dị ạbumatuan phọ ọnaghan mọ ọdi ạghaaph ịlo ạJon oburogh mụum mọ kụ ạḅeni bọ bụno.
ẠJizos aakonom mọony dị ọkaraph uwaloor ạrol ẹmhu
(Mạk 9.14-29; Luk 9.37-43a)
14Bịdi otu bọ ọteeny ḍita awe phọ, kụ oniin oye aru akpuḍian ghisigh ạJizos kụ ạḅeni mọ, 15“Oye phọ, nmạ mọony phọ ạmi ighirigiir. Ọdi rasiphi isughuna iboom. Rạ́gba ghan mem omeel osuma ologhi ạnian rꞌologhi ạmuum. 16Mị ụsighe nyọdi aruomonaan bụmatuan phọ ạna, kụ bịdi útue uukonom.”
17Kụ ạJizos ạḅem mọ, “Sey, ọphon phọ, ọghen ọdo ọkaraph oghiil dị omeeraam ụ́moogh! Mịna rꞌanyina kọḅile ọtolan ika? Mị kạḅile ạkparam ika esi anyina? Ịsighe mọony phọ iruom.” 18Kụ ạJizos ạḅaam ọkaraph uwaloor phọ, kụ ọkaraph uwaloor phọ amite loor ọony phọ ạḍua. Mem mem mọ ạmuphe bịn ọony phọ aḍum.
19Kụ ạbumatuan phọ oru ọteeny Jịzos esi ọman, kụ opuru mọ, “Iḍighi ika kụ yoor útue bọ uporogh ọkaraph uwaloor phọ?”
20 #
Mat 21.21; Mạk 11.23; 1 Kọr 13.2 Kụ ạJizos ạḅeni bịdi mọ, “Loor ẹmoogh omeeraam mọ anyina. Mị ạkar rịḅeni ghan inyina mọ eḍighi ịyaar dị nyina ẹmoogh omeeraam dị aghom ịdipho ekpo ạmustad kụ ẹḅeni ẹeḅaraph phọ ẹphen mọ, ‘Tuphuronu ạghi ẹnon esi,’ bịn kẹtuugh ni ịdipho eḍighi. Ịyaar dị kịkparanaan inyina ílho. [ 21Ịnon ịikpo dị kọsighe kụ oporoghom ọdo uwaloor phọ ọphon ílho, emuton ịiḅereghi rꞌọkaagh ẹḍogh.]”
ẠJizos ạḅile ạkaaph akol ḍuugh phọ ọdi
(Mạk 9.30-32; Luk 9.43b-45)
22Ạbumatuan phọ roru Galili ookpomoghan, kụ ạJizos ạḅeni bịdi mọ, “Kọḅogh ni Mọony phọ Oye ọngo ịikpo awe, 23kụ bịdi okiigh nyọdi, kụ roghiigh nyọdi ḍughul otu dị kemuneniom ịraar kụ ọdi aḅetenu esi aḍuugh phọ.”
Kụ ikpo ọnhu phọ ịphen ẹngo bụmatuan phọ oboom ọto.
Ịlo iisogh Otu Ịiḅereghi phọ
24 #
Ẹḍua 30.13; 38.26 Mem dị ạJizos rꞌạbumatuan phọ ọdi osi Kạpaniom, bụphe rọbonyi ghan bọ iisogh ịsiphe Otu Ịiḅereghi phọ ụteeny ni Pita kụ opuru mọ, “Ọtughemia phọ anyina rasogh aani ghan ni iisogh Otu Ịiḅereghi phọ ḍụghum?”
25Ọdi ạphagharanaan mọ ii.
Kụ aPita roḍigh ologhi otu, bịn ạJizos ạphurom nyọdi apuru mọ, “Saimon, edi aani ika ologhi ạna? Bụanhian kụ rosogh ghan bọ iisogh kọngo bụdaam ẹmha ịsien aḅirini phọ — ạbuo ẹmha phọ ḍụghum, kụ aruuruen?”
26APita mọ, “Aruuruen.”
ẠJizos mọ, “Ọo, pọ ạbuo ẹmha phọ kụ rósogh ghan. 27Mị ụ́wa lọ yira koḍighi ịlo kepin iloghi awe phọ ạbuen. Esi ịduon phọ, kịa ẹpe ọphiiny phọ atebeeny ḍịḅaph, kụ ẹḅel ena lọ ekpoph ḍịḅaph phọ ạna, pogh pạ ologhi ọnhu phọ ọdi, nạ kạmiin ni ikpoki dị kẹmanam ịlo ạmi rꞌịlo ạna. Kụ ạsighe ạghi asoghom.”
Currently Selected:
Matiu 17: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS