Iiḍighi 10
10
APita rꞌạKonilios
1Oniin uwo ẹmhu ạbuo ẹgham dị oghol mọ ạKonilios ạrol li ẹpe Sizaria. Ọdi ạda oniin okuron awe ẹkpigh aḍita ẹgham ạbuo Itali. 2Ọdi rꞌoomo ọto kꞌọdi uḍighi ni we aruukuan dị ọlogh ni eegu Ẹnaan. Anmo ghan ni inmo bụo aJu phọ, ósoph ghan mem ọoḅereghi Ẹnaan. 3Eniin aḍio ịraar asuo ootaany, kụ ạmiin ikon, dị ọokpaany Ẹnaan aru ạmagh nyọdi mọ, “Kọnilios!”
4Kụ ọdi ạnmagharan aphogh, rꞌeepuph kụ apuru mọ, “Ọmoogh-we, ịduon phọ ika?”
Kụ ọokpaany phọ ạḅeni nyọdi mọ, “Ịiḅereghi phọ rꞌinmo phọ ạna mẹteeny ni Ẹnaan ọdi ạsighe rạatughianam nyịna. 5Nụun arom we ọghi Jọpa ọmagh Saimon, ọpo ọta bọ mọ aPita! 6Ọdi atugh kꞌoye dị oghol mọ aSaimon, ọpo rạkponyon ghan bọ ruzu ịnam mọ. Otu ọdi odi oogbom ọphiiny.” 7Ọokpaany phọ ạḅeni bọ nyọdi rọḍua, kụ ạKonilios ạmagh ịyal ạnmuny-otu ọdi rꞌoniin ọnyo ẹgham, oye aruukuan dị akori ghan nyọdi, 8kụ ạghaaph oomo phọ ịpe emite bọ, kụ arom mọ bịdi ọghi Jọpa.
9Rẹḅaal ḍịeri phọ aḍio phọ bịdi oten rọki, ọtol ropogh ẹmha phọ, kụ aPita ạsiiny ạnyu otu phọ ogbo ootaany ịlo ọoḅereghi. 10Kụ ọkoony asiph nyọdi, kụ ạwa eḍien olhe. Rọsa ni eḍien phọ, bịn ạmiin ikon. 11Kụ ạmiin dị okuaḍio phọ aghughuronu, kụ ọkpooghi inya aruukuna ịyaar dị ẹghigh oboom oopa ukpe ọkpaaghi rosoore sịen ade phọ. 12Sịphe phọ oomo ịnam inya asike, rꞌịlo rekuura sịen aḅirini phọ, rꞌịnun okuaḍio phọ ịrol li. 13Kụ ọdi ạnaghan ẹḍogh dị ẹḅem mọ, “Pita, ḅetenu! Kiigh ạa!”
14Kụ aPita mọ, “Ọmoogh-we, kị́duon. Kꞌekulha mị kạ̋aghan ịyaar lọ eḍighi ḅạphanya.”
15Kụ ạḅile ạnaghan dị ẹḍogh phọ ẹḅem mọ, “Ẹlo Ẹnaan mẹḅaalami, kákol ghan mun mọ ạḅaphanya!” 16Kụ emite ịduon phọ ịraar amem, bịn egina amem ọsighe oopa phọ ọphon phọ oḅulemi ẹpe kꞌạke.
17Kụ aPita odi raakia ghan ẹmhu ịpe ọdi ạmiin bọ, bịn pọrono awe phọ ạKonilios arom bọ moopuruan ọmiin kꞌaSaimon ọmeregha ọnhu-aḍibuo otu phọ. 18Kụ ọmagh opuru mọ aSaimon, ọpo ọta bọ mọ aPita, atugh ni sịen.
19APita odi ni rạatughian ịpe ọdi ạmiin bọ, kụ Uwaloor Iigbia phọ ạḅeni nyọdi mọ, “Ịraar awe rọwa ni nyịna. 20Nụun asoor, ạdaph bịdi ạghi! Kạ́moogh iikia, ịdi eḍighi bọ mị kụ urom ni bịdi.” 21Kụ aPita asoor ạghi ạḅeni we phọ mọ, “Mị kụ oye phọ nyina rẹwa bọ. Nyina ịtu ika kụ eru bọ?”
22Kụ bịdi mọ, “ẠKonilios oniin uwo ẹmhu ạbuo ẹgham kụ urom iyoor dom. Ọdi ogey oye dị ạlogh ni eegu Ẹnaan, dị oomo ạramha aJu phọ kụ rọkaaph ghan ni koghol. Oniin ọokpaany Ẹnaan kụ aru ạḅeni mọ ọdi arom oru ọmagh nyịna mọ tue, mọ ọno ạnaghan ịlo nạ kạkaaph.” 23Kụ aPita ạmagh bịdi ạlogh otu ạmuneeny.
Rẹḅaal kụ ọdi ạdaph bịdi ạghi, kụ buniin ạbuo ạsiosi phọ ạJopa ọdaph aani nyọdi. 24Rẹḅile rẹḅaal, kụ bịdi ọghi osi Sizaria. Kụ ạKonilios maakpomoghi oomo eghun ọdi rꞌạrighiri ọdi rakori ghan bịdi. 25Kụ aPita rạki osi, kụ ạKonilios ạghi akpuḍian rạda aruwol ọdi ooseeny ọdi. 26Kụ aPita ạpham nyọdi ạmeremi kụ ạḅem mọ, “Ḅetenu ạmeera! Mị phọ oye aani ni.” 27Kụ bịdi rọkaaphan ni kụ aPita aḍigh ologhi otu phọ, kụ ạmiin ịbadi awe dị ookpomoghan, 28kụ ạḅeni bịdi mọ, “Tọ nyina elegheri ni mọ iigbia ni dị ọlo aJu kaaḍikuan rꞌaruuruen. Kụ Ẹnaan miḍeenaan ịmi mọ kútoph oye ogbeph ukol mọ ạḅaphanya. 29Ịduon kụ iḍighi kụ mị úkel bọ oru phọ, mem mọ orom bọ uruom ịmi. Kụ mị rapuru mọ ụtuan eeghe kụ nyina erom bọ iruom ịmi?”
30Kụ ạKonilios mọ, “Rꞌarodon inya aḍughul-otu ọdo amem mọ ạmuen, mị odi kꞌạmi rạaḅereghi ghan ịiḅereghi ịraar asuo ootaany, bịn mị ạmiin oye dị aḍighinaan iiloghoḍian ibura, dị ạmeera esomanan ạmi, 31kụ ụmagh ịmi mọ, ‘Kọnilios, ịiḅereghi phọ rꞌinmo phọ ạna Ẹnaan mẹsighe ni ẹetughianam nyịna. 32Tom ọghi Jọpa ọmagh Saimon phọ ọpo ọta bọ mọ aPita phọ. Ọdi atugh kꞌaSaimon phọ ọpo akponyon ghan bọ ruzu ịnam mọ. Otu ọdi odi oogbom ọphiiny.’ 33Ịduon kụ iḍighi kụ mị arom bọ aruom kụ nạ maḍighi bọ eeḅi atu. Kụ nyịidipho aḍita ayoor odi risigh Ẹnaan ọnaghan oomo ịpe Ọmoogh-we phọ ạḅeni bọ nyịna mọ kạaph phọ.”
APita ạkaaph ọghaaph
34 #
Dut 10.17
Kụ aPita ạtagharan ọnhu ọdi kụ ạḅem mọ, “Pụruku mị malhoghoma mọ Ẹnaan rẹ́logh ghan oye ịiseeny. 35Kụ tọrobo eelhe, oye lọ ạlogh nyọdi eegu kụ raakuan, kụ ọdi Ẹnaan kẹloghoma. 36Nyina elegheri ni dom mọ Ẹnaan erom bọ we phọ Ịzirel, mọ ạJizos Kraist Ọmoogh-we aḅirini phọ mạsighe ẹepho atuomonaan bịdi. 37Nyina elegheri ni iboom mọ ịpe emite bọ oomo aJudia, emiigh kꞌaGalili mem mọ ạJon awurogh bọ we mụum mọ. 38Nyina elegheri ni ịpe Ẹnaan ẹsighe bọ Uwaloor Iigbia phọ rꞌịnyaam ẹngo Jịzos ọlo ạNazeret phọ. Ọdi ạḍua ghan ni ẹmha ạgba ẹmha aḍighi yogh iiḅi rꞌookonom oomo phọ ạbuphe Eru ẹeḅaghami ghan bọ. Ẹnaan ịrolonaan ni nyọdi. 39Yoor kụ ụmiin bọ oomo phọ ịpe ọdi aḍighi bọ ẹpe eelhe phọ aJudia, rꞌẹmha aJeruselem, ọpo bịdi osin bọ loor oreeny phọ oghiigh. 40Kụ ḍughul otu dị emuneniom ịraar Ẹnaan eḅeton nyọdi sịphe aḍuugh phọ, kụ emeera mọ ọdi amite ni egaan. 41Oomo aweye kụ nyọdi ụ́miin, ipel iyoor phọ Ẹnaan ẹsaḅar bọ. Yoor phọ rꞌọdi kụ ulian ọḅile ọphugholan mem mọ dị aḅetenu bọ sịphe aḍuugh phọ. 42Kụ ọdi ạto ạḅem mọ yoor ọghaaph ọḅeni weye oḍeenaan ghan mọ ọphon kụ ọdi Ẹnaan meḍighi oogboom ịiruen ạngo bụdi odi rꞌạbulo momuughu. 43Oomo ariil phọ ụghaaph ni ịlo ọdi, mọ tọrobo oye lọ ameeraam esi aḍien phọ ọdi kạmoogh ni ọsar ịkaraph ọwilenaan.”
Uwaloor Iigbia phọ masoorom aani ruuruen phọ
44APita odi rạkaaph ghan ịphen phọ, bịn Uwaloor Iigbia phọ asoorom oomo ạbuphe rọnaghan bọ ọghaaph phọ. 45Kụ ẹpherogh bụo aJu phọ momeeraam bọ dị ọdaphan Pita ọḍua ẹpe Jọpa oru, esi dị monmoom aani ruuruen Uwaloor Iigbia phọ. 46Bụen ụnaghan dị aruuruen phọ rọḅa ọnon ọnhu dị ụ́naghan koboom Ẹnaan, kụ aPita ạghaaph amitiom mọ, 47“Oye odi ni ḍụghum, dị kamirighan mọ kúburogh we phọ ạbuen mụum, bụen Uwaloor Iigbia phọ masoorom bọ ni ịduon ayira?” 48Kụ ọdi ạto mọ owurogh bịdi mụum esi aḍien phọ ạJizos Kraist, kụ bịdi ọoḅereghian nyọdi mọ ạḅile ạrolan bụno ịyal-ikpo aḍughul-otu.
Currently Selected:
Iiḍighi 10: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS