YouVersion Logo
Search Icon

Matiu 3

3
Yohane Toperiu mopahawe Ngkorana Pue
(Mrk. 1:1-8; Luk. 3:3-9,15-17; Yoh. 1:19-28)
1I tempo iti, maimi hadua tauna au rahanga Yohane Toperiu. Ia lao i pada wungi i tampo Yudea, hai mepongka mobambari Ngkorana Pue i tauna bosa, 2nauliangaahe, “Menosomokau hangko i dosami, lawi barapi mahae ina hawe poparentana Pue Ala i dunia.” 3Yohane itimi au natunggai lolitana nabi Yesaya hangkoia au manguli node:
“Ara tauna au monganga-nganga i pada wungi, nauli,
‘Ina hawe Pue!
Nipasilolonga raraNa,
Nipakanoto rara au ina Napoliungi.’ ”#Yes. 40:3
4Hampina Yohane rababehi hangko i wulu onta. Pampouna hangko i koli.#3:4 Hampina Yohane iti nodo hampina nabi Elia hangkoia. Peita: 2TD 1:8. Paandena kakomba hai tinaha. 5Bosa tauna au hawe mampeinao mampehadingi lolitana. Arahe hangko i wanua Yerusale hai hangko i humalele tampo Yudea. Ara worihe hangko i boea-boea au i wiwi owai Yarade. 6Maihe mopangaku dosanda, hai nariuhe i owai Yarade.
7Bosa wori tadulako agama Yahudi au rahanga toParisi hai toSaduki maihe mampoperiu i Yohane. Kanaitanda hawe, nauliangaahe, “Ikamu au motengko babehiami, moapari hai maikau? Ba nipehangu peisakau tekabaha hangko i karumpuna Pue Ala au ina morumpakau? 8Ane tou-tou menosokau hangko i dosami, nibabehimide babehia au maroa. 9Hai ineekau mampemahile, niuli, ‘Ikita ide, pemuleanake Burahima. Barake ina nahuku Pue Ala.’ Iti bara tou! Nipehadingi! Ane naunde Pue Ala, pemuleana Burahima peisa Napopewali hangko i watu ide. 10Ina hawe pehukuna Pue Ala! PehukuNa nodo owahe au masilolongami i patoa kau. Ope-ope kau au bara maroa wuana ina ratiwi hai ratende i lalu api.”
11Nauli mbuli Yohane, “Kuriukau hai owai, tanda pampenosoimimi dosami. Agaiana ina hawe hadua tauna au meliu kuasaNa hangko iriko. Mogalori mowosui peana kandupaNa, barana hintoto. Ia au ina moriukau hai Inao Malelaha hai api. 12Ia peisa rapandiri nodo hadua tauna au motapihi pare bona tepatani pare au moihi hai tepatani wori pare au wara. Pare au moihi napopesua i lalu tambaru, hai pare au wara natende i api.”
Yesu nariu Yohane
(Mrk. 1:9-11; Luk. 3:21-22; Yoh. 1:32-34)
13I tempo iti, Yesu hawe i owai Yarade hangko i tampo Galilea mai mampoperiu i Yohane. 14Agaiana Yohane, bara bai moriu, hai nauliangaa, “Katouana, ideri iko au hintoto Nuriu. Moapa hai Oiori au mai iriko?”
15Agaiana nahanai Yesu, Nauli, “NuriumoNa. Hintotomi au nubabehi ide bona tapabukei ope-ope peundeana Pue Ala.” Hangko indo, nariu mpuumi.
16Karoona Yesu rariu, mesoremi hangko i lalu owai. Unga pea tebungkahi langi, hai Ia moita Inaona Pue Ala nodo tadasi manggebodo mendaulu Iria. 17Roo nodo, rahadimi wotuna Pue Ala hangko i langi au manguli, “Ia idemi AnaNgku au Kupokakaia hai Kupokatana.”

Currently Selected:

Matiu 3: NPY

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy