NÚMEROS 1
1
Sinaipi cashpa israelcunata quillcashpa yupashcami
1Mandaj Diosca Sinaí urcupi caj shitashca pambapimi, Dioshuan tupanacuna carpa huasipi Moiseshuan rimarca. Egiptomanta israelcuna llujshimushca ña ishqui huata, ishqui quilla, chai quillapaj punta punllapimi Moisestaca cashna nirca: 2“Israelpaj huahuacunataca familiapuracunatapish, cada yayacunapaj huasi ucupuracunatapish tucui c'aricunapaj shuticunata cada quiquinta quillcashpa yupai. 3Macanacuiman llujshipaj caj israelcunataca Aaronhuan tucushpa, ishqui chunga huatata charijmanta huichiman tucuicunata quillcanguichij. Paicunataca cada mirgata churanguichij. 4Cancunahuanca cada aillumanta shuj pushaj cachun. Chaicunaca cada yayacunapaj huasi ucupuracunata pushaj cachun. 5Cancunahuan cajcunapaj shuticunaca:
Rubén aillumantaca, Sedeurpaj churi Elisur cachun.
6Simeón aillumantaca Zurisadaipaj churi Selumiel cachun.
7Judá aillumantaca Aminadabpaj churi Naasón cachun.
8Isacar aillumantaca Zuarpaj churi Natanael cachun.
9Zabulón aillumantaca, Helonpaj churi Eliab cachun.
10Josepaj churicunamanta: Efraín aillumantaca, Amiudpaj churi Elisama cachun. Manasés aillumantaca, Pedasurpaj churi Gamaliel cachun.
11Benjamín aillumantaca, Gedeonipaj churi Abidán cachun.
12Dan aillumantaca, Amisadaipaj churi Ahiezer cachun.
13Aser aillumantaca, Ocranpaj churi Pagiel cachun.
14Gad aillumantaca, Deuelpaj churi Eliasaf cachun.
15Neftalí aillumantaca, Enanpaj churi Ahira cachun” nircami.
16Chaicunaca tucui tandanacushca ñaupa yaya aillucunamanta mirarishcacunata pushajcunami carca. Paicunallatajmi huaranga huaranga israelcunata pushajcuna carca.
17Moisespish, Aaronpish paicunata ayudachun shutichishpa churashca runacunahuan tucushpami, 18huatapaj ishqui quilla, chai quillapaj punta punllapi tucui israelcunata tandachirca. Chaipimi paicunaca familiapuracunatapish, cada yayapaj huasi ucupuracunatapish ishqui chunga huatayujmanta huichiman caj c'aricunapaj shuticunata cada quiquinpajta quillcarca. 19Moisesca Mandaj Dios mandashca shinallatajmi, Sinaí shuti shitashca pambapica yuparca.
20Israelpaj punta churi Rubenpaj huahua huahuacunataca cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca. 21Rubenpaj aillumanta yupashcacunaca, 46.500mi carca.
22Simeonpaj huahua huahuacunatapish cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca. 23Simeonpaj aillumanta yupashcacunaca, 59.300mi carca.
24Gadpaj huahua huahuacunatapish, cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca. 25Gadpaj aillumanta yupashcacunaca, 45.650mi carca.
26Judapaj huahua huahuacunatapish, cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca. 27Judapaj aillumanta yupashcacunaca, 75.600mi carca.
28Isacarpaj huahua huahuacunatapish, cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca. 29Isacarpaj aillumanta yupashcacunaca, 54.400mi carca.
30Zabulonpaj huahua huahuacunatapish, cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca. 31Zabulonpaj aillumanta yupashcacunaca, 57.400mi carca.
32Josepaj churi, Efrainpaj huahua huahuacunatapish cada yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca. 33Efrainpaj aillumanta yupashcacunaca, 40.500mi carca. 34Josepaj churi, Manasespaj huahua huahuacunatapish ñaupa yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca. 35Manasés aillumanta yupashcacunaca, 32.200mi carca.
36Benjaminpaj huahua huahuacunatapish, ñaupa yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca. 37Benjaminpaj aillumanta yupashcacunaca, 35.400mi carca.
38Danpaj huahua huahuacunatapish, ñaupa yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca. 39Danpaj aillumanta yupashcacunaca, 62.700mi carca.
40Aserpaj huahua huahuacunatapish, ñaupa yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca. 41Aserpaj aillumanta yupashcacunaca, 41.500mi carca.
42Neftalipaj huahua huahuacunatapish, ñaupa yayamanta mirarimushcacunataca, cada familiatami ishqui chunga huatayujmanta huichiman caj c'aricunataca cada quiquinpaj shuticunata quillcarca. Macanacuiman llujshipaj caj tucuicunatami quillcarca. 43Neftalipaj aillumanta yupashcacunaca, 53.400mi carca.
44Tucui c'aricunatami Moiseshuan, Aaronhuan, Israel aillucunata pushajcunahuan tucushpa quillcarca. Chaicunaca cada aillumanta shuj pushajmi carca. 45Macanacuiman llujshipaj caj israelcunataca, ishqui chunga huatayujmanta huichiman cajcunatami tucuicunata quillcarca. 46Cada familiatami, ch'ican ch'icanta quillcarca. Tucuicunata tandachishpa yupajpica, 603.550mi carca.
Levitacunata imallata ruranacunapi churashcami
47Leví familiacunataca caishuj aillucunahuan tandachishpaca mana quillcarcachu. 48Mandaj Diosmi Moisestaca cashna nishca carca: 49“Levipaj huahua huahuacunallata paicunahuanca ama yupangui. Paicunapaj shuticunatapish caishuj israelcunahuanca ama tandachishpa quillcangui. 50Ashtahuanpish levitacunataca Dioshuan ari ninacushca quillcata huaquichina carpa huasita, chaipi Diospajta ruranapaj imalla charinacunata, chai carpa huasipi tucui imalla tiyajcunatapish ricuchun churangui. Diospaj carpa huasita, chaipi tucui imalla tiyajcunatapish paicunami apajcuna canga. Tucui chaicunata rurashpami Diospajta rurangacuna. Paicunaca Diospaj carpa huasi muyundijpi paicunapaj carpa huasicunata shayachishpa causachuncuna. 51Diospaj carpa huasita shujtajman apana tucujpica, levitacuna pascashpa apachun. Diospaj carpa huasita ña maipi shayachina tucujpica, paicuna shayachichun. Manapish levita caj c'uchuyashpaca huañungami. 52Caishuj israelcunapish cada aillu, quiquin aillupuralla paicunapaj carpa huasicunata shayachishpa tiyarichun. Quiquin bandera c'uchupi paicunapaj soldadocuna maipi canpi tiyarichun. 53Levitacunaca Dioshuan ari ninacushca quillcata huaquichina carpa huasi muyundijpi, paicunapaj carpa huasicunata shayachishpa tiyarichun. Tandanacushca israelcunapaj jahuaman Mandaj Dios p'iñarishca ama shamuchunmi paicunaca chaipi cuidangacuna”.
54Mandaj Dios Moisesta mandashca shinallatajmi, israelcunaca tucuita rurarca.
Currently Selected:
NÚMEROS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.