JUDAS 1
1
Allillachu canguichij nishcami
1Jesucristopajta ruraj Judas, Jacobopaj huauquimi cani. Dios Yaya cayashpa, jucha illajta rurashpa agllashcacunamanmi quillcani: Cancunataca Jesucristomi huaquichicun. 2Cancunamanca llaquij canata, sumajta causanata, c'uyaj canatapish mirachishca cachun ninimi.
Llullashpa pandata yachachijcuna ima shina tucunata huillashcami
(2 P 2.1-17)
3C'uyashcacuna, cancunapish ñucapish quishpichishca cashcamantami chai quishpichishcamanta quillcana yuyai shamujpi cancunamanca quillcasha nicurcani. Crijpimi jucha illajta rurashpa shuj cutin huiñaipaj quishpichirca. Chaitaca alli macanacuj shina shungumantataj alli catichun nishpami, yuyachishpa quillcanataj cajpi quillcani. 4Maijancunaca ñamari ñucanchijpurapi crichingapaj pacalla yaicushcacuna. Chaicunataca Diosca ñaupamanmi jatun llaquiman rinapaj cajcunami nishca. Paicunaca Diosta mana manchajcunami. Paicunaca cacharishcacuna shina millaita rurangapajllami, Diosca mana c'uyaipajtapish c'uyajmi nij tucuncuna. Mandaj shujlla Diostapish, ñucanchijta Mandaj Jesucristotapish mana tiyanchu nincunami.
5Cancuna yachashca cajpipish, caitami yuyachisha nini. Jatun Diosca, Egiptomanta israelcunata llujshichishca cashpapish, paicunapurapi paita mana crijcunataca huañuchircami. 6Angelcunapish mandaj cachun churashcallapi mana cashun nishpa, ashtahuanpish paicuna causacunmanta anchushpa rishcamantaca Diosca jatunta llaquichina punllacamami huiñaita mana llujshipaj amsapi prezu huaquichishca. 7Sodoma, Gomorra pueblocunapish chai c'uchullapi caj pueblocunapish chai angelcuna shinallatajmi tucushcacuna. Paicunaca huainayana yuyaillahuan cashpami, c'aricunapurallataj, huarmicunapurallataj mana rurana cashca pinganayaj millaita rurashcacuna. Chaimantami shujtajcunapish ama paicuna shina cachun yuyachingapaj, huiñaipaj ninahuan chaicunataca llaquichishca.
8Llullashpa yachachijcunaca muscunchij nishpami, chaicuna shinallataj paicunapaj aichata mapayachincuna. Mandaj Jesustapish yangatami rurancuna. Jahua pacha mandajcunatapish c'amincunami. 9Angelcunata jatun mandaj Miguelpish, Moisespaj aichata quichunacushpa rimanacucushpapish, diablotaca llaquichishpa ima millaita mana rimashcachu. Ashtahuanpish: “Jatun Diosmi cantaca llaquichinga” nishcallami. 10Chai pandata yachachijcunaca manapish yachashcatami c'amishpa rimancuna. Shinallataj ima shina cashpa alli canata yachashca jahuami animalcuna shina yuyai illaj tucushpa quiquin munashca shina millaita rurashpa chingarinaman ricuncuna.
11¡Aij, chashna rurajcunalla! Caín shinallatajmari mana allita rurashcacuna. Cullquita munashcamantaca Balaam shinallatajmari pandarishcacuna. Mana cazushcamantaca Coré shinallatajmari chingarishcacuna. 12Chaicunaca c'uyaimanta cancuna rurashca fiestacunapi jatun pinganayajta rurashpa cushicushpa micushpa ubyashpa mapayachijcunami. Michijcunapish paicunapaj allipajlla michijcunami. Yacu illaj p'uyuta caiman chaiman huaira apashca shinami. Cozichana punllacuna cajpipish grano illaj yuracuna shinami. Ishqui cutin huañushcacunami, sapimanta llujshichishcacunami. 13Paicunapaj rurashcacunaca mama cucha t'imburishpa puscuricuj shinami. Luzerocuna quiquin ñanta chingachishca shinami. Chashnacunapajca tucuita yalli huiñaipaj amsami ch'icanchishca shuyacun.
14Ñaupa yaya Adanmanta yaya Enoccamaca canchis yayacunami cashca. Enocmi Dios huillachijpi chai shina gentecunamantaca cashna nishca: “Jatun Diosca jucha illaj huaranga huaranga paipaj angelcunandij shamushpami, 15tucui paicuna imalla rurashcataca ricuchirca. Paicunamanca Diosta mana manchaj cashcamanta tucui imalla millaita rurashcacunata ima shina cashcatatajmi ricuchirca. Paita mana manchaj juchasapacuna, millai shimicunahuan paita c'amishcamantami llaquichirca” ninmi. 16Chaicunaca huashalla parlajcuna, juchachijcuna, quiquin munaita rurashpa cushicujcunami. Jatun tucushpa rimarijcuna, paicunaman imata cuchun nishpalla shujtajcunata canca allimari cangui nij tucujcunami.
Sinchita cunashpa yuyachishpa rimashcami
17Chaimanta c'uyashcacuna, apostolcuna ñucanchijta Mandaj Jesucristomanta ñaupaman imalla nishcacunata cancunaca yuyaipi canguichij. 18Paicunaca cancunamanca: “Q'uipa punllacunapica imapish Diospajlla cajcunataca chanzata rurajcunami tiyanga. Paicunaca millai yuyaicunallahuanmi causangacuna” nishcami. 19Chaicunaca crijcunata chaupijcunami. Aicha munaillahuan jundacunami, Diospaj Espiritutaca mana charincunachu.
20C'uyashcacuna, Jucha Illaj Espíritu yuyaita cushca shina Diosta mañashpa, cancuna Jesusta crishcapi sinchita catichij. 21Ñucanchijta Mandaj Jesucristo c'uyashpa cushca huiñai causaita shuyacushcataca pai cungacama Taita Diospaj c'uyaipi catiraichij.
22Maijancuna caita chaita yuyacujpica, alli cringacama yachachichij. 23Shujcunataca ninaman ricujta llujshichishpa quishpichichij. Caishujcunataca llaquijcuna caichij. Paicuna millaita rurashcacunapi mapayanataca manchaihuan caichij.
Diosta alli nishcami
24Tucuita rurai tucujca paipaj achij nicuj ñaupajpi jatunta cushicushpa ricuchingapajmi, mana urmashca ima mapa illajllata huaquichicun. 25Ñucanchijta Quishpichij, pailla tucuita yachaj Diostaca Jesucristomanta cunanpish huiñai huiñaitapish jatunmari cangui, mandajmari cangui, tucuita rurai tucujmari cangui nishca cachun. Chashna cachun.
Currently Selected:
JUDAS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.