ZACARÍAS 4
4
Curi candeleromantapish, olivos yuracunamantapish
1Ñucahuan parlacuc ángel cutimushpami, shuc sueñucuc runata riccharic shina ricchachirca. 2Chai ángel tapushpaca:
—¿Imatatac ricungui?— nirca.
Shina tapucpimi ñucaca:
—Aceiteta churana curi candelerota, cutin chai jahuapica canchis lamparacunatapish, canchis tubocunatapishmi ricucuni. 3Candeleropac ishcai ladopica olivos yuracuna, shucca alli ladoman, shucca lluqui ladoman shayacuctami ricuni— nircani.
4Ashtahuan ñucahuan parlacuc angelta tapushpaca:
—Ñuca mandaclla, ¿caica imatac?— nircani.
5Shina nicpimi angelca:
—¿Manachu ima cacta yachangui?— nirca.
Shina nicpimi ñucaca:
—Ñuca mandaclla, mana yachanichu— nircani.
6Shina nicpimi paica:
«Tucuita Mandac Diosca Zorobabeltaca:
“Caitaca mana soldadocunahuan,
mana sinchi cashcahuanchu
mishangui.
Ashtahuanpish ñuca
Espirituhuanmi mishangui.
7Jatun urculla,
Zorobabelpac ñaupapica,
¿imatac cangui?
¡Canca Zorobabelpac
ñaupapica pugru
pambami tucungui!
Paimi ucupi cac
rumita llucchinga.
Shina llucchicpica:
‘¡Sumacmari, sumacmari!’
nishpami caparinga” ninmi.
8Chaimantami Mandac Dios
ñucata rimashpaca:
9“Zorobabelmi ñucapac
huasi callari rumitaca churarca.
Paillatacmi tucuchinga.
Chaita ricushpami,
Mandac Diosllatac ñucataca
cachashcata yachanguichic.
10Cai huasita ruhuai callari
punzhapi ‘Mana caipacmi’
niccunaca Zorobabel
plomadata charicucta
ricushpaca cushicungami” nirca.
Chai quipaca angelca:
“Chai canchis lamparacunaca
Mandac Dios paipac ñahuihuan
tucui cai pachata
ricucuctami nisha nin”
nirca» nirca.
11Ñuca ashtahuan tapushpaca:
—Candeleropac ishcai ladopi, shucca alli ladoman, shucca lluqui ladoman shayacuc olivos yuracunaca, ¿imatatac nisha nin?— nircani.
12Cutinllatac tapushpaca:
—Curi aceite shina llucshicuc ishcai curi tubo ladopi cac ishcai olivos ramacunaca, ¿imatatac nisha nin?— nircani.
13Shina nicpimi angelca:
—¿Manachu ima cacta yachangui?— nirca.
Shina nicpimi ñucaca:
—Ñuca mandaclla, mana yachanichu— nircani.
14Shina nicpimi angelca:
—Caicunaca tucui cai pachata Mandac Diospac ñaupapi, aceiteta cahuishca ishcai runacunatami nisha nin— nirca.
Currently Selected:
ZACARÍAS 4: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.