ZACARÍAS 2
2
Huascahuan medic runamanta
1Chai quipami huichailla ricushpaca, shuc runa medina huascata maquipi apashpa shayacucta ricurcani. 2Shina ricushpami chai runataca:
—¿Maimantac ricungui?— nircani.
Shina tapucpimi paica:
—Jerusalenta medishpa, quingraimanpish, sunimanpish mashnata medic cashcata ricungapacmi ricuni— nirca.
3Ñucahuan parlac ángel ña ricpimi, shuc ángel paihuan tupangapac shamurca. 4Shina shamushpami ñucahuan parlashpa ric angeltaca: «Callpa rishpa chai mosota:
“Jerusalenpi achca gentecuna,
achca animalcuna tiyashcamantami
muyundi pirca illac canga.
5Ñucaca Jerusalén muyundi
nina rupacuc
pirca shinami casha.
Ñucapac sumaimana
achic nicuctami Jerusalén
chaupipi ricuchisha.
Chaitaca Mandac Dios ñucami nini”
ninmi ningui» nirca.
Mandac Dios runacunata quishpichishcamanta
6Mandac Diosca: «¡Uyaichic,
jahua lado llactamanta
llucshishpa callpaichicyari!
Ñucami cancunataca
cai pacha chuscu ladocunaman
shic-huashpa cacharcani.
Chaitaca Mandac Dios ñucami nini.
7¡Sionlla, cunanca Babilonia
llactamanta miticushpa
llucshichicyari!
8Maijanpish cancunata
llaquichicca ñuca ñahui muruta
tucsic shinami llaquichin.
Ñucata jatunyachishca quipami
cancuna ima charishcata
quichuccunapac llactacunaman
cachasha.
Chaitaca tucuita Mandac Dios
ñucami» nini.
9Mandac Diosca:
«Ñuca cancunata piñashpa,
llaquichicpica, quiquin
serviccunallatacmi
ima charishca quichushpa
llaquichinga» ninmi.
Chashna ruhuacpimi,
ñucataca Mandac Dios
cachashcata yachanguichic.
10Mandac Diosca:
«Sión llactapi causaccunalla,
ñucaca cancunapac chaupipi
causangapacmi shamuni.
Chaimanta cushicushpa
cantaichicyari.
11Chai punzhapica achca
llactacunami Mandac Dios
ñucapacman tandanacunga.
Paicunaca ñuca
acllashcacunami canga.
Ñucaca cancunapac chaupipimi
causasha» ninmi.
Chaita ricushpami,
Mandac Diosllatac
cancunapacman ñucata
cachashcata yachanguichic.
12Mandac Diosca Judá llactataca
herencia allpata shinami,
jucha illac llactapi
paipaclla cachun chasquinga.
Jerusalentapish cutin acllangami.
13¡Mandac Diosca
pai causana jucha illac
pushtumantami shamun!
¡Chaimanta cai pachapi
tucui causaccuna upalla caichic!
Currently Selected:
ZACARÍAS 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.