CANTARES 1
1
Cazarashca huarmipish, Jerusalenpi causac solteracunapishcantashcamanta
1Cai cantoca tucui cantocunamanta yalli sumacta Salomón ruhuashca cantomi.
Huarmi cantashca
2¡Cambac shimihuan ñucata muchaiyari!
Cambac cuyaica mishqui vinotapish
yalli sumacmi.
3Cambac shutica mishquilla
ashnacucta tallishca shinami.
Chaimantami carihuan manarac
chayarishca solteracunaca cuyan.
4Ñucata pushaiyari.
Cantaca catishpa callpashunllami.
Jatun mandacmi paipac huasiman aparca.
Huarmicuna cantashca
¡Canhuanca yallita sumacta cushicushun!
Can cuyashcataca, vinotapish yallimi
yuyaricushun.
Chaimantami cantaca cuyancuna.
Huarmi cantashca
5Jerusalenpi causaccunalla,
ñucaca yana cashpapish sumacmi cani.
Cedar llacta carpa huasicuna shina,
Salomonpac lienzo paño shina sumacmi cani.
6Yana cashcamanta ama ricuracuichicchu.
Ñucataca intimi yanayachirca.
Ñuca mamapac huahuacunami ñucata piñashpa,
uvas chagrata cuidachun churarca.
Chaimantami ñucapac uvas chagrataca
mana cuidarcani.
7Ñuca tucui shunguhuan cuyashcalla,
¿maipitac ovejacunata michinguiyari?
Chaupi punzhaca,
¿maipitac ovejacunata samachinguiyari?
Cambac ricsishcapac ovejacunahuan
mana chingarishpa purisha ninichu.
Chaimanta huillaiyari.
Cusa cantashca
8Tucui huarmicunamanta
yalli sumac huarmilla,
can mana yachashpaca,
oveja sarushcata ricushpa
michina chuclla cuchuman cati rishpa,
chaipi cambac malta chivocunata michiyari.
Cusa cantashca
9Ñuca cuyashcalla,
canca Faraonpac carretacunata aisac
huarmi caballocuna shinami cangui.
10Cambac ñahuica zarcillocuna chaupipica
mai sumacmi ricurin.
Cambac cungapish huallca chaupipica
sumacmi ricurin.
11Cullqui botón churashca
curi zarcillotami,
canman ruhuachishun.
Huarmi cantashca
12Jatun mandac mizapi tiyaricpica,
ñuca nardoca
mishquillatami ashnacurca.
13Ñuca cuyashcaca ashalla mirrata
ñuca pechopi churashca shinami.
14Ñuca cuyashcaca En-guedi pueblopi
tiyac, uvas chagra chaupipi
huiñashca alheña sisa shinami.
Cusa cantashca
15¡Ñuca cuyashcalla,
canca yallita sumacmi cangui!
Canca yallita sumaimanami cangui.
Cambac ñahuicunaca
ishcai palomacuna shinami.
Huarmi cantashca
16¡Ñuca cuyashcalla,
canca yallita munana sumacmi cangui!
Cusa cantashca
17Ñucanchic camaca sisacuna mandashcami,
huasi vigacunaca cedro, ciprés caspicunami.
Currently Selected:
CANTARES 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.