JOB 8
8
Diosca cashcata ruhuacmi nishpa Bildad huillashcamanta
1Suhitapuramanta Bildadca:
2«¿Ima horascamantac
chashna rimacugringui?
Can rimashca shimicunaca
manchana huaira shinami canga.
3¿Diosca allita ruhuanata
paquishcachu?
¿Tucuita ruhuac Diosca
cashcata ruhuanata paquishpachu,
mana allita ruhuashca?
4Cambac huahuacunami,
paita mana cazushpa juchallishca.
Chaimantami paicuna japina
cashca shinallatac llaquichishca.
5Can utca Diosta mashcashpa
tucuita ruhuac Diosman
perdonta mañashpa,
6allita ruhuashpa chuya causacpica,
paica cantaca huacaichingami.
Chashna causacpica,
can japina cashca shinallatac
cambac huasipipish can charishcata
ashtahuanmi mirachinga.
7Can utcapi ashallata
charishca cashpapish quipa
punzhapica ashtahuanmi charingui.
8Ñaupa punzhacunapi causac
taitacunaman tapushpa,
paicunapac taitacuna
yachashcata yachacuiyari.
9Ñucanchicca cainallamanta cashpami
imatapish mana yachanchic.
Ñucanchic causaica cai pachapica
llandu shinallami.
10Paicunami cantaca
yachachishpa sumacta rimanga.
Paicunami ima shina causashcata
achcata parlanga.
11¿Juncoca yacu guzu
illacpi huiñangachu?
¿Papiroca yacu mana tiyacpica
huiñangachu?
12Chai yuraca verdinlla cashpapish,
mana pitishca cashpapish
tucui quihuacunamanta yallimi
utca chaquin.
13Chashnallatacmi Diosta
tucui mana cazuccunaca tucun.
Shinallatacmi Diosta mana manchaccuna
imata shuyacushcaca chingarin.
14Paicuna imata shuyacushcapish
pitiric shinami chingarin.
Paicuna shunguta churashcapish
araña ahuashca shinallami.
15Chai ahuashcapi
taunallicpica urmanllami.
Chai ahuashcapi japiricpica pitirinllami.
16Millaita ruhuaccunaca intipi
verdinlla yura shinami can.
Ramacunapish huertata
tucui tapac shinami can.
17Sapicunapish rumi jahuatami
caita chaita ahuarishpa ricun.
Rumi allpaman chayashpami
sapiyashpa saquirin.
18Huiñacuc pushtumanta
pitishpa shitacpica, allpaca:
“¡Cantaca jaicapi mana
ricushcanichu!” ningami.
19Paipac cushilla causanaca
chashnami tucuringa.
Pai huiñashca pushtupica
shuctac quihuacunami huiñanga.
20Diosca ima millaita mana ruhuactaca,
mana saquinchu.
Mana allita ruhuaccunataca
mana ayudanchu.
21Canca cutinmi yallita asingui.
Cambac calluhuanmi
cushicushpa caparingui.
22Canta piñaccunaca
yallitami pingaichishca canga.
Diosta mana manchaccunapac
huasicunaca chingaringami» nirca.
Currently Selected:
JOB 8: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.