JOB 39
39
1¿Canca sacha chivocuna
mashna quillapi huachacta
yachanguichu?
¿Canca taruga huachacucta
ricushcanguichu?
2¿Canca taruga mashna quillata
chichu puricta yupashcanguichu?
¿Ima quillapi huachanatapish
yachanguichu?
3Huachana nanai japicpica siririnmi.
Chashna siririshpa, huachashpami
nanaitaca pasachin.
4Chai animalpac huahuacunaca
sinchiyashpa catishpami
quihuata micushpa causancuna.
Chai quipaca mamamanta caruyashpami
mana cutincuna.
5¿Pitac sacha burrotaca
cacharishca purichun churashca canga?
¿Pitac chai animaltaca mana huatana
animalta ruhuashca canga?
6Ñucami chai animaltaca pi mana
causanapi causachun churarcani.
Chaimantami shitashca
pambacunapi causan.
7Chai animalca pueblopi causac
gentecunatapish burlanmi.
Shuc runa huashamanta caparishpa
caticpipish mana cazunchu.
8Chai animalca tucui urcucunatami
verdinlla quihuacunata mashcashpa purin.
9¿Sacha huagraca trabajashpa
canta servingachu?
¿Cambac huasipi pacaringachu?
10¿Chai huagrataca yugoshpa
yapui pudinguichu?
¿Chai huagrahuan pugru pambacunata
yapui pudinguichu?
11¿Chai huagra fuerzasapa
cashcamantaca yapungallami
yuyanguichu?
¿Tucui trabajota chai huagrahuan
tucuchi pudinguichu?
12¿Canca, chai huagra
cambac gavillata tandachishpa,
trillana erapi parbangami yuyanguichu?
13Pavo realmanca, ¿canchu sumac
color alascunata curcangui?
Avestruzmanpish,
¿Canchu sumac alascunata,
plumacunata curcangui?
14Avestruzca tiyu allpapimi
rurucunata huachashpa saquin.
Inti cunuchishpami,
mama ucllashca shinata ruhuan.
15Chaquihuan sarushpa paquinatapish,
sacha animalcuna sarushpa
ñutuchinatapish mana manchanchu.
16Pai mana huachashca shinami,
paipac huahuacunataca shitanlla.
Pai huachashcataca
yangalla cashcata yuyashpami
shitashpa saquinlla.
17Chaicunamanca ñucallatacmi
yuyaitapish, ima shina
entendinatapish mana curcani.
18Shina cashpapish,
jahuata volashpaca, caballotapish,
caballopi ric soldadocunatapish
mishashpami callpan.
19¿Canchu caballocumanca
fuerzata curcangui?
¿Canchu paipac cungapi
tiyac millmataca churarcangui?
20¿Shuc langostata shinachu
manchachinguiman?
Singahuan pucushpapish
sinchitami pucun.
21Caballoca yallita fuerzata
charishcamantami allpata
aspishpa cushicun.
Ima huañuchinahuan chapacucpipish
mana manchashpami tupagrin.
22Manchachisha nicucpipish,
mana manchashpami asin.
Espadata ricuchicpipish,
mana huashaman cutirinchu.
23Flechacunahuan shitacucpipish,
lanzacunahuan, jabalinacunahuan
chilin nichicucpipish,
mana manchanchu.
24Yallita piñarishpami
utcashpa cuchuyan.
Trompetapi tocacpipish
mana jarcarinchu.
25Ashtahuanpish cornetacunapi
tocacpica, mana cazushpa
asishpami shayacun.
Macanacuitaca carumantami mutquin.
Soldadocunata pushaccuna
caparishcatapish, macanacuipi
caparishcatapish uyanmi.
26¿Can yuyaita cucpichu
condorca jahuata volashpa,
alascunata chutashpa
ura ladoman callpan?
27¿Can mandacpichu angaca
urcu jahuaman rishpa cuzhata ruhuan?
28Chai animalca rumi quingraicunapi,
maita mana chayaipac rumi
urcu puntapimi causan.
29Chai jahuamantami aicha maipi
tiyactapish chapan.
Paipac ñahuica carupimi ricun.
30Huahua angacunaca
yahuartami sungan.
Mama angaca maipimi
ima huañushca tiyan,
chaipimi can» nirca.
Currently Selected:
JOB 39: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.