JOB 36
36
Eliú Dios jatun cashcata huillashcamanta
1Eliú rimashpa catishpaca:
2«Ñucaca Dios ima shina
cashcata canman yachachingapacca
ashtahuan charinimi.
Chaimanta ashata shuyai.
3Ñucapi tiyac yachaicunaca
carumanta shamuc shinami can.
Ñucata ruhuac ima shina cashcatami
canmanca huillasha nini.
4Ñuca rimashcacunaca mana llullachu.
Yuyaisapa runami canhuanca parlacun.
5Diosca imatapish ruhuacmi
tucui imatapish yachacmi.
Shina cashpapish pita mana
chicanyachinchu.
6Paita mana manchacmanca
mana causaita cunchu.
Ashtahuanpish llaquihuan
caccunamanca paicuna japina
cashcatami cun.
7Cashcata ruhuaccunataca cuidanmi.
Jatun mandaccunahuan
tiyarinapi tiyachishpami,
huiñaipac jatunyachin.
8Cadenacunahuan huatashca
cacpipish, llaquichic
huascacunahuan huatashca cacpipish,
9Diosmi paicuna imata
ruhuashcatapish, paicuna
mana cazushpa jatun
tucushcatapish huillanga.
10Paimi ama pandarishpa purichun,
ringripi rimashpa,
millaita ruhuanata saquichun mandan.
11Chaita uyashpa paita
servishpaca sumac punzhacunata,
huatacunata causashpami huañuicaman
cushicuihuan causanga.
12Ashtahuanpish mana uyashpaca
espadahuan huañuchicpimi
ima allitapish mana yachashpa
chingaringacuna.
13Shungupi millai yuyaita
chariccunaca paicunapac
shungu ucullapimi
piñarishpa mucuricuncuna.
Dios paicunata llaquichicpipish,
mana caparishpa mañancunachu.
14Paicunaca huambraracmi
huañungacuna.
Paicunapac causaica pinganayaipac
tucushpami tucuringa.
15Llaquihuan caccunataca Diosmi
chai llaquillahuantac quishpichin.
Llaquihuan capariccunamanca
Diosmi entendina yuyaita cun.
16Chashnallatacmi cantapish
llaqui causaimanta llucchishpa,
ima llaqui mana tiyac
pushtuman apashpa,
miza junda micunatapish cunga.
17Shina cacpipish, canca Diosta
mana manchaccuna shinallatacmi
llaquichishca cangui.
Taripashpa llaquichishcami cangui.
Chaimantaca mana quishpiringuichu.
18Chaimanta cambac charishcacunapi
shunguta churanamantaca cuidaringui.
Chai llaquimantaca imata cushpapish
mana quishpiri pudinguichu.
19Can yallita llaquihuan cacpica,
can caparishpa mañashcaca
imata mana ruhuangachu.
Cambac tucui charishcahuanpish
imata mana ruhuai pudinguichu.
20Ama tutayachun shuyaichu.
Tutapica gentecunaca maipi
tiyacushcamanta chingarinmi.
21Cutinllatac millaita
ruhuanamantaca cuidaringui.
Chai mana allita ruhuashcamantami
llaquita apacungui.
22Diosca tucuita ruhuac
jatunmi can.
Pai shina yachachicca,
¿pitac tiyangayari?
23¿Pitac pai imata
ruhuashcataca tapungayari?
¿Pitac paitaca: “Canca mana
allitami ruhuashcangui” ningayari?
24Pai imata ruhuashcamanta
paita jatunyachinataca
ama cungaringuichu.
Chai ruhuashcataca
tucui gentecunami alli nincuna.
25Chaicunataca tucui gentecunami
carullamanta cashpapish ricuncuna.
26Riqui, Diosca mai jatunmi.
Ñucanchicca mana ricsi pudinchicchu.
Paipac huatacunatapish
mana yupai pudinchicchu.
27Paimi yacumanta bauta
huichaiman apashpa
tamyata ruhuangapac yacuta tandachin.
28Chashnami puyupi tandarishpa
gentecunapac jahuapi tamyan.
29¿Pitac puyu maipi callarictapish,
maipi tucurictapish
yachai pudingayari?
Maimanta tulun nishpa
uyarimushcatapish,
¿pitac yachangayari?
30Riquichic, paimi paipac
jahuapi achicyachicta churarca.
Chai achicyachicmi mama cuchatapish
catac shina achicyachicun.
31Chaicunallahuantacmi
gentecunatapish mandan.
Shinallatac gentecunamanpish
micunata yallita caran.
32Paimi achic rayotaca
paipac maquihuan japishpa
pai munashcapi urmachin.
33Pai piñarishcataca
tulun nishcami huillan.
Millaita ruhuaccunata piñarishpa,
llaquichigricushcataca
manchaipac tamya huaira
shamushpami huillan.
Currently Selected:
JOB 36: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.