JOB 34
34
Dios ima shina cashcata Eliú huillashcamanta
1Eliú rimashpa catishpaca:
2«Alli yachaccunapish,
alli yuyaita chariccunapish
ñuca rimashcata alli uyaichic.
3Ringrica imata nicushcatami uyan.
Calluca micuna imalaya
cashcatami yachan.
4Cashcata ruhuanata acllashunchic.
Ñucanchicpurapi ima alli cashcata
ricsishunchic.
5Chaica Jobca:
“Ñuca cashcata ruhuac cacpipish,
Diosca ñuca japina
cashcataca quichurcami.
6¿Ñuca alli yuyaricushcataca
pacashpachu llullasha?
Manapish ima juchata
ruhuashca cashpapish
maita mana jambiripac
ungüihuanmi cani” nirca.
7¿Pitac Job shinaca tiyangayari?
Paica yacuta ubiac shinami
burlashpa asin.
8Millaita ruhuaccunahuanmi
yallita apanacurca.
Diosta mana cazuccunahuanmi purirca.
9Chashna cashpami paica: “Runaca
Diospac munaita ruhuashpaca,
ima allita mana japinchu” nirca.
10Chaimanta alli yuyaita chariccuna
caita alli uyaichic.
¡Mana allita ruhuana munaica
Diosmanta carupi cachun!
¡Millaita ruhuanapish
tucuita ruhuac Diosmanta carupi cachun!
11Paimi runamanca
pai imata ruhuashca shina
cuna cashcata cunga.
Runa ima shina causashca shinami cunga.
12Diosca pitapish mana yanga
juchanchishpami cashcata ruhuanga.
Tucuita ruhuac Diosca
ima japina cashcatapish
mana quichungachu.
13¿Pitac cai pachataca
paipac randi mandachun churarcayari?
¿Pitac cai pachapi
tucui tiyashcacunataca
paiman mingarcayari?
14Runapi causaita cuc samaita
churashpapish paillatac chai
samaita quichucpica,
15tucui gentecunami chingarishpa
allpallamantac tigranman.
16Can allita entendishpaca
caita uyashpa ñuca rimashcata
allita yuyari.
17¿Cashcata ruhuanata Dios piñashpaca
mana mandai pudinmanchu?
¿Tucuita ruhuac, cashcata
ruhuac Diostaca llaquipi
churanguimanchu?
18Jatun mandactaca:
“¿Millaita ruhuacmi”
ninallachu canga?
Pai churashca mandaccunataca,
“¿Diosta mana manchaccuna”
ninallachu canga?
19Paica jatun mandaccunatapish
mana ñahuita ricushpalla
allita ruhuan.
Paica paipac maquihuan
ruhuashca cacpimi,
huacchacunamanpish, chariccunamanpish
chashnallatac ruhuan.
20Chaupi tutami runacunaca
cungailla huañuncuna.
Yallita alli nishca runacunapish,
tucuita ruhuac Dios maquihuan manapish
huactacpimi chingaringacuna.
21Runa maita puricpipish
Diosca chapacunmi.
Chaqui sarushcatapish
tucuitami ricucun.
22Mana allita ruhuaccuna
miticuchunca amsa puyupish,
amsa tutapish mana tiyanchu.
23Diosca paipac ñaupapi
runa imamanta juchanchishca cachunca
mana punzhata churanchu.
24Sinchi tucushcacunatapish
mana llaquishpami llaquichinga.
Paicunapac randica
shuccunatami churanga.
25Diosca tucui millaita ruhuashcata
ricushpaca shuc tutallami
tucuita llaquichinga.
26Tucuipac ñaupapimi mana
allita ruhuaccunataca chugrichinga.
27Paicuna Diosmanta caruyashpa,
pai imata ruhuachun nishpa
mandashcacunata shucllapish
mana yuyarishcamantami
chashnaca ruhuanga.
28Chashna ruhuacpimi huacchacunapish,
llaquihuan caccunapish llaquirishpa
Diospac ñaupaman uyaricta caparirca.
29Dios upalla saquicpica,
¿pitac llaquichi pudingayari?
Pai ñahuita pacacpica,
¿pitac catishpa ricui pudingayari?
Paica jatun llactatapish,
shuc runatapish chai
shinallatacmi ricucun.
30Millaita ruhuac runa chai llactapi
causaccunata ama pandachishpa
mandachunmi, chashnaca ricucun.
31Chaica, Diostaca: “Ñucaca ñami
yallita llaquita apashcani,
cantaca ña mana ashtahuan
piñachishachu.
32Ñuca mana ricushcacunata
yachachi, ñaupaman mana alli
ruhuashcacunata, ña mana ashtahuan
ruhuashachu” ninami cangui.
33Diostaca can imata ruhuashcamanta,
¿can munashcata ruhuachunchu munangui?
Paimi can japina cashcataca cunga.
Chaita chasquina cashpapish,
mana chasquina cashpapish canmi ningui.
Shinashpaca can imata yuyarishcata
ñucaman huillai.
34Alli yuyaiyuc gentecunapish,
ñucata uyacuc yachaisapa runapish,
ñucataca:
35“Jobca mana alli yachashpami rimacun.
Pai rimashca shimicunaca
jaicapi mana yuyaita cunchu” ningacunami.
36Jobca mana allita ruhuac
runacuna shinami rimashpa cutichin.
Chaimanta pai imata yuyarishcataca
allimi ricuna can.
37Paica juchata ruhuashca jahuami
mana cazurca.
Ñucanchictapish piñashpami
maquicunata huactarca.
Diostapish yallitami piñachishpa
rimarirca» nirca.
Currently Selected:
JOB 34: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.