JOB 31
31
Job imata yuyacushcata huillashcamanta
1Ñuca ñahuihuan ima millaita
mana ricungapacmi ari nircani.
Shina cashpaca, ¿ima nishpatac,
carihuan manarac chayarishca
solterataca chapashayari?
2Ñuca chaita ricucpica Diosca
jahua pachamanta,
¿imatatac cunga?
Tucui ruhuac Diosca ¿ima
japinatatac jahuamanta cunga?
3¿Diosta mana manchaccunamanpish
juchata ruhuaccunamanpish
manachu llaquicunaca tiyanga?
4¿Manachu Diosca ñuca imalla
ruhuashcatapish, ñuca chaqui
sarushcatapish ricucun?
5Mana allita ruhuashpa
purishca cacpi, mana allita
ruhuangapac ñuca chaqui
callpashca cacpica,
6Dios cashcatatac pezac balanzapi
pezashpa ñuca ima pandata
ruhuashcata ricuchun.
7Alli ñanmanta caruyashca cacpi,
ñuca ñahui ricushcata
shungupi yuyarishca cacpi,
ñuca maquihuan mapayashca cacpica,
8ñuca tarpushcatapish
shuccuna micuchunlla.
Ñuca tarpushcatapish
pitishpa shitachunlla.
9Shuc huarmita ñuca shungupi
munashca cacpi,
shuc huarmita inquitangapac
chapac cashca cacpica,
10ñuca huarmipish
shuc carihuan cachunlla.
Shuctac caricunapish
paihuan chayarichunlla.
11Chai juchacunata ruhuashca
cashpaca taripashpa llaquichishcami
caiman carcani.
12Chai juchacunaca tucuita rupachic
shinami canman carca.
Ñuca charishcacunatapish
tucuimi rupachinman carca.
13Ñucata servic carihuan,
huarmihuan piñarishpa,
paicuna japina cashcata
mana cushca cashpaca.
14Dios ricungapac shamucpica,
¿imatashi ruhuaiman carcani?
Pai imata tapucpica,
¿imatashi cutichiman carcani?
15¿Manachu ñucata mamapac huicsapi
callarichic Diosllatac
paicunatapish ruhuarca?
Diosllatacmi tucuita ruhuarca.
16Huacchacuna mañashcata
mana cushca cacpi,
viuda huarmicunatapish
yarcaihuan huañuchun
saquishca cacpi,
17taita mama illac huahuacunaman
mana carashpa ñucalla micushca
cacpica llaquichichunlla.
18(Ñucaca huambramanta
pachami shuc taita shina
paicunataca huiñachircani.
Ñucaca ñuca mamapac huicsapi
tiyarishca pachamantami
viuda huarmicunata
ña pushac carcani).
19Ñuca ricucushca jahua
maijanta churana illac huañuchun
saquishca cacpi,
catallina illac purichun
saquishca cacpica llaquichichunlla.
20Paicuna imahuan
mana tapari pudicpi,
ñuca ovejacunapac
millmahuan catachishca jahua
ñucata mana tucui shunguhuan
pagui nishca cacpi,
21taita mama illac huahuata
pueblo pungupi ñuca maquihuan
mana ayudashca cacpica,
22¡ñuca hombrosmanta rigrapish
paquirishpa urmachunlla!
Mucumantapish tullu chicanyachunlla.
23Ñucaca Dios llaquichinatami
mancharcani.
¡Jatun Diospac ñaupapica,
maitatac ricuri pudiman carcaniyari!
24Curipi ñuca shunguta
churashca cashpaca,
shinallatac alli curita:
“Canmi ñuca shuyanaca cangui”
nimanmi carcani.
25Ñuca charishcacuna
achca cashcamanta, ñuca
maquihuan achcata japishcamanta
cushicushca cashpa,
26inti achicyachicpi,
quilla achicyachicpi,
chapashca cashpa,
27chaicunata ñuca shungupi
adorashca cashpa,
carumanta maquihuan
muchashca cashpaca,
28llaquichishcami caiman carcani.
Chaicunata ruhuashca cashpaca,
Mandac Diostami cungariman carcani.
29Ñucata piñac llaqui tucucpi,
paita llaqui japicpica
mana cushicushpa asircanichu.
30(Paita llaqui japichun nishpaca,
ñuca calluhuanca ima mapata
mana rimarcanichu).
31Ñuca serviccuna: “¿Maijantac
aichataca mana nicta,
manarac micunguichic?”
nishpaca, mana tapurcachu.
32(Carumanta shamuccunatapish
mana canzhapi saquishpami,
ucuman yaicuchi carcani).
33Ima millaita mana
pacalla ruhuarcanichu.
Mana allita ruhuashcataca
ñuca shungupi mana pacarcanichu.
34Mana achca gentecunata
manchashcamantachu,
mana ñuca familiacuna
piñanata manchashcamantachu,
ñuca huasi ucupi upalla saquirishcani.
35¡Ñuca mañashcata
maijan uyashpachari alli canman!
¡Tucuita ruhuac Dios
ñuca mañashcata cutichichun!
¡Ñucata piñacca quillcashpa
ñucata juchanchichun! nishpami
ñuca shutitaca quillcani.
36Chaitaca ñuca hombrospimi
apashpa puriman.
Coronata shinami umapi churariman.
37Ñuca imalla ruhuashcacunataca,
shuc mandac shinami paipac ñaupapi
tucuiman huillaiman.
38Ñuca allpacuna ñucata
piñashpa caparishca cacpi,
chaipi tiyac huachucuna
huacashca cacpi,
39mana pagashpa chaipi
ima pucushcacunata
micushca cacpi,
chai allpayucta shungupi
llaquichishca cacpica,
40trigo huiñanapac randica
cashacuna huiñachunlla.
Cebadapac randica yanga quihuacuna
huiñachunlla» nircami.
Job huillashcacunaca
caillapimi tucurin.
Currently Selected:
JOB 31: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.