JOB 1
1
Jobta llaquicuna japishcamanta
1Uz llactapimi Job shuti shuc runa causarca. Paica cashcata ruhuac, pi mana juchanchipac, Diostapish manchac, millaita ruhuanamanta anchurishcami carca. 2Paica canchis churita, quimsa ushitami charirca. 3Paipac haciendapica canchis huaranga ovejacunata, quimsa huaranga camellocunata, pichca patsac yunta huagracunata, pichca patsac burrocunata shinallatac achca serviccunatami charirca. Inti llucshina ladopi causaccunapurapica paimi tucuita yalli chayuc carca.
4Paipac churicunaca paicunapac huacharishca punzha pactacpica, paicunapac huasillapitacmi jatun micuita ruhuashpa, paicunapac quimsa panicunatapish paicunahuan micuchun, cayachun cachaccuna carca. 5Chai jatun micui punzhacuna tucuricpica, Jobca paipac huahuacunatami cayac carca. Paica Diospaclla tucuchunmi tutamanta utca jatarishpa, cada shucmanta Diosman animalcunata cushpa huañuchishpa, tucui rupachic carca. Jobca: «Ñuca huahuacunaca juchallishpa, Diostapish llaquichishpa paicunapac shungupi mana allita rimarcapishchari» yuyashpami, jatun micui punzhacuna tucurishca quipaca, chashna ruhuac carca.
6Shuc punzhami Diospac huahuacunaca Mandac Diospac ñaupapi ricuringapac shamurcacuna. Shina shamucpimi, Satanaspish paicunahuan shamurca. 7Chaipimi Mandac Diosca Satanastaca:
—¿Maimantatac shamungui?— nirca.
Shina nicpi, Satanasca Mandac Diostaca:
—Cai pachata ricushpa muyushpami shamuni— nirca.
8Shina nicpi, Mandac Diosca Satanastaca:
—Ñucata servic Jobca cashcata ruhuac, pi mana juchanchipac, ñucata manchac, millaita ruhuanamanta anchurishca runa cashcataca, ¿manachu ricushcangui? Cai pachapica pai shinaca pipish mana tiyanchu— nirca.
9Shina nicpimi, Satanasca Mandac Diostaca:
—Cantaca mana yanga manchanchu. 10¿Manachu canllatac paitapish, paipac huasi ucupuratapish, tucui imata pai charishcacunatapish cuidacungui? Paipac maquihuan imata ruhuacpipish yallitami bendiciangui. Chaimantami pai charishcacunaca cai llactapica yallita mirarishca. 11Ashtahuanpish cambac maquihuan tuparishpa, pai ima charishcacunata quichui. Shina ruhuacpica, cantaca cambac ñaupallapitacmi mana alli nishpa rimanga— nirca.
12Shina nicpi, mandac Diosca Satanastaca:
—Riqui, pai imata charishcacunaca cambac maquipimi. Shina cacpipish, ama cambac maquihuan paitaca tuparinguichu— nirca.
Shina nicpimi, Satanasca Mandac Diospac ñaupamanta llucshishpa rirca.
13Shuc punzhami Jobpac churicunapish, ushicunapish paipac punta huauquipac huasipi micushpa, ubiashpa carcacuna. 14Paicuna chaipi cacpimi, shuc huillac Jobpacman shamushpaca:
—Huagracunahuan yapucucpi, chai ladollapitac burrocunapish micucucpimi, 15Sabeo runacuna cungailla shamushpa tucui chai animalcunata quichushpa aparcacuna. Canta serviccunatapish espadahuan huañuchircami. Chaita huillangapacmi ñucalla saquirircani— nirca.
16Chaita huillacucllapitacmi shuc runa shamushpaca:
—¡Jahua pachamanta Diospac nina shamushpami ovejacunatapish, michiccunatapish rupachishpa tucuchin! Chaita huillangapacmi ñucalla saquirircani— nirca.
17Chai runa huillacucllapitacmi shuc runa shamushpaca:
—Caldeocuna quimsapi chicanyarishpa shamushpami camellocunata tandachishpa aparincuna. Canta serviccunatapish espadahuanmi huañuchishpa rincuna. Chaita huillangapacmi ñucalla saquirircani— nirca.
18Chai runa huillacucllapitacmi ñapish shuc runa shamushpaca:
—Cambac churicunapish, ushicunapish paicunapac punta huauquipac huasipimi micushpa, ubiashpa carcacuna. 19Chaipi cacpimi, shitashca pambamanta sinchi huaira shamushpa, huasi chuscu esquinapi huactashpa, paicunapac jahuapi urmachishpa huañuchirca. Chaita huillangapacmi ñucalla saquirircani— nirca.
20Chaicunata uyashpami, Jobca jatarishpa paipac jahualla churanata lliquirishpa, uma acchatapish pitishpa pambacaman cumurishpa Diosta alli nirca. 21Chashna alli nishpaca:
«Ñuca mamapac huicsamantaca
lluchullami llucshircani.
Lluchullallatacmi allpaman
cutina cani.
Mandac Diosmi ñucaman curca.
Mandac Diosllatacmi quichurca.
¡Mandac Diospac shutica
alli nishca cachun!» nirca.
22Chai tucui llaquicuna shamucpipish, Jobca mana juchata ruhuarcachu. Diostapish mana juchanchircachu.
Currently Selected:
JOB 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.