JUECES 15
15
Sansón Timna pueblopi causaccunahuan piñanacushcamanta
1Sansonca asha punzhacuna quipami trigo pitina punzhacunapi manadamanta shuc malta chivota apashpa, huarmita ricungapac rirca. Shina rishpaca:
—Ñuca huarmi sueñuna ucumanmi yaicusha nini— nirca.
Shina yaicusha nicpipish, chai huarmipac taitaca yaicuchunca mana saquircachu. 2Chashna mana yaicuchisha nishpami taitaca:
—Can mana ashtahuan cuyangachu yuyashpami, cambac ricsishcallamantac curcani. Shina cacpipish paipac quipa ñaña tiyanmi. ¿Paica manachu punta ñañata atishpa sumac soltera? Punta ñañapac randi paita apailla— nirca.
3Shina nicpimi Sansonca:
—¡Cunan ñuca mana allita ruhuashpapish filisteocunapac ñaupapica mana juchanchishcachu casha!— nirca.
4Sansón chaimanta rishpaca quimsa patsac añascunata japishpami chupapura ishcai ishcaita huatarca. Chashna huatashpami chai huatashca chupacunapi antorchata huatarca. 5Chaimantaca añascunapi ninata japichishpami filisteocunapac chagra chaupita cacharca. Shinami gavillacunatapish, trigo chagratapish, uvas chagratapish, olivos chagracunatapish rupachirca.
6Chaimantami filisteocunaca:
—¿Pitac caitaca ruhuarcayari?— nishpa tapunacurca.
Shina tapunacushpami:
—Sansonmi Timnat pueblomanta runa paiman ushita mana cazarachun cushpa paipac ricsishcaman cushcamanta chashna ruhuashca— nirca.
Chaimantami filisteocunaca chai huarmitapish paipac taitatapish rupachirca. 7Chaimantami Sansonca:
—Cancuna chashna ruhuashcamantaca cancunatapish llaquichingacaman manatac samarishachu— nirca.
8Shina nishpami filisteocunataca yallita piñarishpa achcata huañuchishpa Etam jatun quingraipi tiyac machaipi causagrirca.
Lehi lomapi Sansón huaranga filisteocunatahuañuchishcamanta
9Filisteocunaca Judá aillupacman huichai rishpami, Lehi lomacaman carpa huasita shayachishpa tiyarirca. 10Chaipimi Judá aillucunaca:
—¿Ima nishpatac ñucanchic-huan macanacungapac shamungui?— nishpa filisteocunataca tapurca.
Shina tapucpi filisteocunaca:
—Sansonta japishpa pai ima ruhuashca shinallatac paitapish llaquichingapacmi shamunchic— nircacuna.
11Shina nicpimi, Judá aillucunaca quimsa huaranga runacunahuan Etam jatun quingraipi tiyac machaiman rishpa Sansontaca:
—¿Ima nishpatac chaita ruhuarcangui? ¿Filisteocuna ñucanchicta mandashpa charicuctaca manachu yachangui?— nircacuna.
Shina nicpimi Sansonca:
—Paicuna ñucata ima shina llaquichishca shinallatacmi paicunatapish llaquichircani— nirca.
12Shina nicpimi, Judá aillucunaca:
—Ñucanchicca canta huatashpa filisteocunapac maquipi churangapacmi shamunchic— nircacuna.
Shina nicpimi Sansonca:
—Ñucata mana huañuchingapac Diospac shutipi ari nichic— nirca.
Shina nicpimi paicunaca:
13—Mana, mana huañuchishunchu, ashtahuanpish canta alli huatashpami, filisteocunapac maquipi churashun— nircacuna.
Shinami Sansontaca ishcai mushuc huascacunahuan huatashpa, quingraipi tiyac machaimanta llucchircacuna. 14Lehi lomaman Sansonhuan chayacpica, filisteocunaca munai cushicushpa caparinacushpami tupangapac llucchircacuna. Shina llucshicpimi Mandac Diospac Espíritu Sansonpacman shamurca. Chaimantami Sansonpac rigra huatashca huascacunaca rupashca lino puchca shina pitirinacushpa maquimanta urmarca. 15Sansonca cunanlla huañushca burro jazhata tarishpami huaranga filisteocunata huañuchirca. 16Chaimantami Sansonca:
«Shuc burro jazhata japishpami
shuc montonta, ishcai montonta ruhuarcani.
Shuc burro jazhahuanmi,
huaranga filisteocunata
huañuchircani» nirca.
17Chashna nishpaca chaipi burro jazhata shitashpami chai pambataca Ramat-lehita shutichirca.
En-hacoré pambapi Mandac Dios yacuta cushcamanta
18Sansonca yallita yacunayaihuan cashpami Mandac Diostaca:
—¿Canta servicpac maquihuan jatunta quishpichishca jahuachu cunanca yacunayaihuan mana circuncisionta ruhuashcacunapac maquipi huañuchun saquingui?— nirca.
19Chaimantami Diosca chai Lehi pambapi tiyac pugrupi yacuta llucchirca. Chai yacuta ubiashpami Sansonca cutin sinchiyarca. Chaimantami chai yacu tiyac pushtutaca En-hacoreta shutichirca. Chai yacuca cunancamanmi tiyan. 20Sansonca ishcai chunga huatatami filisteocuna causacui punzhacunapica israelcunata mandarca.
Currently Selected:
JUECES 15: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.