1 SAMUEL 1
1
Ana huahuata cuchun Diosta mañashcamanta
1Efraín urcupi cac Ramataim pueblopimi, zufitapuramanta Elcana runa causarca. Elcanaca Jerohampac churimi carca. Jerohamca Eliupac churimi carca. Eliuca Tohupac churimi carca. Tohuca Zufpac churimi carca. Zufca efrateopurami carca. 2Elcanaca ishcai huarmitami charirca. Shuc huarmica Ana, caishuc huarmica Peninami carca. Peninaca huahuacunata charircami. Ashtahuanpish, Anaca mana charircachu. 3Elcanaca Mandac Diosta alli ningapac animalta cushpa huañuchingapacmi, pai causana pueblomantaca Silo puebloman huatanta huichai ric carca. Chaipica Elipac ishcai churicuna Ofni, Fineesmi, Mandac Diospac curacuna carca.
4Elcana Diosman animalta cushpa huañuchina punzha chayacpica, paipac huarmi Peninamanpish, paipac churicunamanpish, ushicunamanpish carana cashcata cucmi carca. 5Ashtahuanpish Anamanca chaimanta yallitami carac carca. Mandac Diosllatac huahuata mana cucpipish, Anatami ashtahuan cuyac carca. 6Mandac Diosllatac Ana huahuata mana charichun saquishcamantami paita piñac huarmica yallita rimashpa llaquichic carca.
7Chashnami huatanta Mandac Diospac huasiman rishpa, Peninaca Anataca yallita llaquichic carca. Chaimantami Anaca huacashpalla mana micuc carca. 8Chaita ricushpami paipac cusa Elcanaca: «Ana, ¿ima nishpatac huacangui? ¿Ima nishpatac mana micungui? ¿Ima nishpatac cambac shungupi llaquilla cangui? ¿Manachu ñucaca chunga churicunatapish yalli cani?» nirca.
9Silo pueblopi micushpa, ubiashca quipami Anaca jatarishpa Mandac Diospac huasiman rirca. Elí curaca Mandac Diospac huasi pungu pilar ladopimi tiyacurca. 10Chaipimi Anaca tucui almahuan llaquirishpa yallita huacashpa Mandac Diosta mañarca. 11Paica pactachishatacmi nishpami, «Tucuita Mandac Dioslla, canta servic ñuca cashna llaquihuan cacta yuyariyari. Canta servic ñucataca ama cungarishpa, ashtahuanpish ñucaman shuc cari huahuata cuiyari. Can cucpica, chai huahuataca tucui paipac causaipimi can Mandac Diosllatac servishpa causachun cusha. Shinallatac paipac acchatapish mana pitichishachu» nirca.
12Mandac Diospac ñaupapi Ana ña unaita mañacucpimi, Elica paipac shimita ricucurca. 13Anaca shungu ucullapi mañashpami, shimillata cuyuchicurca. Ashtahuanpish pai rimashcaca mana uyarircachu. Chaimantami Elica cai huarmica machashcami nishpa yuyacurca. 14Chashna yuyacushpami Elica:
—¿Ima horascamantac machashcalla cagringui? ¡Vinota ubianataca ña saquiyari!— nirca.
15Shina nicpimi Anaca:
—Ñuca amito, mana machashcachu cani. Vinotapish, machana yacutapish mana ubiarcanichu. Ashtahuanpish ñuca shungupimi, achca llaquihuan cani. Chaimantami ñuca tucui almahuan Mandac Diosta mañacuni. 16Canta servic ñucataca ama Diosta mana manchacmi nishpa yuyaichu. Ashtahuanpish jatun llaquihuan huacashpa causacushpami, cunancaman mañacurcani— nirca.
17Shina nicpimi Elica:
—Cunanca cushicushpa rilla. Israelcunapac Diosca can imata mañashcataca cushca cachun— nirca.
18Shina nicpimi Anaca:
—Canta servic ñucapish, cambac ñaupapica alli ricurishca cashpami alli caiman— nirca.
Shina nishpaca pai maita shamushcata cutishpami micungapac tiyarirca. Chai punzhamanta pachami ña mana ashtahuan llaquilla carca.
Samuel huacharishcamanta
19Cayandica utca jatarishpami, Mandac Diosta alli nircacuna. Chai quipaca Ramá pueblopi cac paicunapac huasimanmi rirca. Elcanaca paipac huarmi Anapimi chayarirca. Chashna chayaricpimi, Mandac Diosca Ana mañashcata uyarca. 20Chashnami Ana huicsayuc tucushpa, sajuarina punzha pactacpica, shuc cari huahuata sajuarirca. Chai huahuataca: «Mandac Diostami ñucaca mañarcani» nishpami Samuelta shutichirca.
21Chai quipami Elcanaca tucui paipac familiacunandi Mandac Diosman animalta cushpa huañuchishpa pai ari nishcata pactachingapac Diospac huasiman rirca. 22Ashtahuanpish Anaca mana rishpami paipac cusataca:
—Cai huahua chuchumanta raquingacaman mana rishachu. Ña raquirishca quipami cai huahuataca paipac huasipi servishpa causachun, Mandac Diosman cushpa paipac ñaupapi saquingapac risha— nirca.
23Shina nicpi, paipac cusa Elcanaca:
—Canman ashtahuan alli canata ruhuailla. Shinashpaca cai huahuata chuchumanta raquingacaman saquirilla. ¡Mandac Dios pai ruhuasha nishcataca pactachishpami alli canman!— nirca.
Shina nicpimi, Anaca huasipi saquirishpa paipac cari huahuataca chuchumanta raquiringacaman huiñachirca. 24Huahuata chuchumanta raquishca quipami, Mandac Diospac huasiman Silo puebloman apamurca. Paihuanca quimsa huatata charic becitapish, ishcai chunga ishcai kilo harinatapish, shuc puñu vinotapish aparcami. Huahuaca uchillaracmi carca. 25Becita Diosman cushpa huañuchishca quipami, chai huahuataca Elí curaman curca. 26Shina cushpami Anaca:
—¡Ñuca amitolla! Canca causacunguimi. Cambac ladopi mañashpa tiyacushca huarmillatacmi cani. 27Cai huahuamantami mañacurcani. Mandac Diosca ñuca mañashcata curcami. 28Chaimantami cai huahuataca ñucapish Mandac Diosman cuni. Paica tucui causaipimi, Mandac Diospacta ruhuashpa causanga— nirca.
Shina nishpami Mandac Diosta allimari cangui nirca.
Currently Selected:
1 SAMUEL 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.