Yunus 4
4
Dipakitanni Nabi Yunus kumua napakamoja' too Puang Allataala to bangsa laen
4:1-11
1Gaja pa'dikki penawanna Nabi Yunus, sanga te'da najaji Puang Allataala nnancuru'i to kota Niniwe. Iamo joo naliwa' mabirih. 2Massambajangmi lako Puang Allataala nakua, “Oo PUANG, namangka memanmo kupau ba'tu piran jio kampongku' kumua nang la Tasullei akkatta-Ta'. Iamo joo kupalai lako kota Tarsis, nasaba' kuissen kumua Kita'mo Allataala to mamase na mangpakamoja', liwa' sabbara' na te'da napaja to pangpakamoja'-Ta' antasullei akkatta-Ta' te'da Tasessa tau. 3Iamo joo kukua, Oo PUANG ka'tuimi to sunga'ku' nasaba' la'bih melo ke matena' na ia ke tuona'.” 4Apa nakua PUANG Allataala, “Te'da musipato' mpumabirihhi joo.”
5Messunmi Nabi Yunus lan mai kota namale lako kadellekan. Ngkabua'mi bola-bola anna cumadokko mentiongan ntajan apa to la jaji lako joo kota Niniwe. 6Napattantui PUANG Allataala natuo mesa' tananan pallan to buda daunna, nanii mentiongan Nabi Yunus danggi' namalussu. Liwa' masannangna Nabi Yunus, naonganni joo tananan. 7Apa masawa tonna subumo napattantu omi Puang Allataala naden ulli' ngkandei joo garonto' tananan naarannai malaju. 8Na ia tonna ollongmo to mataallo, naparatu pole' omi PUANG Allataala to angin malussu, mangngiri' jio mai kadellekan. Ia to arrangna allo ntampahhi ulunna Nabi Yunus anna garapa limpu. Ka'tu rannumi Nabi Yunus nameta'da nakua, “La'biran ke mate bangmo' na ia ke tuona'!” 9Apa nakua Puang Allataala ngkuanni, “Te'da iko musipato' mabirih nasaba' malajui tuu tananan!” Mebalii Nabi Yunus nakua, “Anna la te'da ora? Sipato'na' gaja birih ratu lako mateku'!”
10Nakua omo PUANG Allataala ngkuanni, “Sangbongira nanii tuo tee tananan, namasawanna malajumi. Te'da lalo iko nato'doi ma'puhmu natuo joo tananan. Moi nasusi joo mupumasse penawai nasaba' malajui. 11Umbo nakua tanglamasse penawang-Ku' lako kota Niniwe to nanii torro saratuh duangpulo sa'bu tau sola patuoanna buda. Na ia to tau te'dapa naissenni kumua umbonna to melo na umbonna to gaja'.”
Currently Selected:
Yunus 4: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.