JAMES 5
5
Mo haꞌi am e chehgidch mo g e‑kaisdag s‑daꞌa
1-3Ab g wo kaiham mant haschu wo oꞌoha mamtp hedai s‑e kakaischud hab wuadch g pi apꞌekam. Bamki chum e elid mamt geꞌe haꞌichu wo edgidad kekeltk. T wabshaba g em‑kaisdag wabsh wo huhug. Kumt wo shoanid ch ab wo ai g s‑koꞌok e‑namkidadag. 4-6Em‑kaisdag o si geꞌej ch wohokamchud mam pi ap ha namkid g e‑pionag. Hegam o d wabsh shoꞌigkam ch am em‑ahgid g pi e‑apꞌedag ch shoani. M wabshaba pi ab hu ha kaiham ch chum hems ab haꞌichu ha abchud ch ha kokda. K idam pi e nakog mas wo e doꞌibia. K wabshaba g Jiosh ab ha kaiham ch wo ha doꞌibia. Ahpim mam e kakaischud ha shoꞌigchudch am ab aihim g lodaita hab masma mat g wipsilo wo e giꞌichud k ab wo ai mamt wo ha kokda.
Am g wabsh wo s‑e tahtk ch wo nako g e‑shoꞌigdag.
7Pegih neh, ahpim ni‑wehm wohochuddam, am g wabsh wo s‑e tahtk ch nenida mat ep wo jiwia g t‑kownalig Jesus Christ. Am g wo neid mo has masma nenida g eshdam g juhki mat wo i wuhsh g eshaj. 8Mt hab waꞌap s‑e tahtkk ch wo nenidad ch am wo si e gewkemhu no pi e aihim mat ep wo jiwia g geꞌechu t‑kownalig. 9E o nahtokch mat hab wo juh g lodaita.
Pi g hedai has wo ahgad. Kut hab wa masma pi hedai has wo em‑ahgad.
10Am g wo i ha chegito g Jiosh haꞌichu i tashogiddam. Hegam ash wa s‑e tahtk ch nakog g e‑shoꞌigdag. Kumt am ha oidk hab wo chum masmak 11nam pi s‑mahch mo g Jiosh ab ha mahkch g s‑ap tahhadkam. Hegai kelibad mash hab chehgig Job ash hab waꞌap s‑e tahtk ch nakog g e‑shoꞌigdag. Tsh g Jiosh am hahawa wehhejed geꞌe haꞌichu i apꞌech. Id o am t‑chehgidch mo si s‑t‑hoꞌigeꞌid ch si pihk e elid t‑hekaj.
12Am g hab wabsh wo juhni mamt haschu hedai wo i ha ahgi mamt hab wo juh. Pi o apꞌe mams wabsh chum hekid wo i gewkadch g e‑neꞌoki am chehchegch g Jiosh. Jiosh at wo em‑lodai mamtp hab wo e juh.
13Nam am hu haꞌi haꞌichukaj i e kudut? Pegih, e g wo hoꞌigeꞌidahun.
Nam haꞌi s‑hehgig? Pegih, ab g wo si hehgchulid g Jiosh g nenꞌeikaj.
14Nam am hu haꞌi kokꞌo? Bo chum mahs mamt ab wo i ha wai hegam mo am d geꞌeged em‑shahgid. T hegam ab wo em‑huhu g e koꞌadam a‑saidihkaj k wo e hoꞌigeꞌidahu em‑wehhejed 15s‑wohochudch mat g Jiosh wo em‑doaj. Kut woho hab wo e juh.
Mamtp g pi ap e‑chuꞌijigkaj kokꞌo, t g Jiosh gam hu hab wo i juh g em‑chuꞌijig. 16Kumt heg hekaj ab aꞌai wo e ahgi g pi ap e‑chuꞌijig k wo e hoꞌigeꞌidahu aꞌai e wehhejed. T wo em‑doaj g Jiosh. Muꞌi at haꞌichu hab wo ha juni g Jiosh hegam mat ab wo tahnid ch d wo s‑apꞌekam oꞌodhamk.
17Heg at hekaj hab e juh mash haschu g Elijabad ab tahni g Jiosh. Heg ash d wabsh oꞌodham ch ab si tai g Jiosh mat hab wo juh mat pi wo ha juhkad. Kush wa woho pi ha juhk giꞌik aꞌahid ab. 18Kutsh ab hahawa tai g Jiosh mat wo juh. Kutsh hahawa juh. Tsh ab i wuhsh g haꞌichu bahidag ab amjed g jewed kahchim.
19-20Neh, tp hems hema wo heb hu hih g em‑wehm wohochuddam ab amjed g wohokam. Kumt am uhpam wo i nodagi ab amjed g pi apꞌekam. T g Jiosh gam hu hab wo i juh g pi ap chuꞌijigaj k wo doꞌibia ab amjed g s‑koꞌok namkidadgaj.
Currently Selected:
JAMES 5: ood
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.