1 CORINTHIANS 1
1
1Ni-wepnag mam am kih Corinth t am:
Am ant wo haꞌichu i em-oꞌohani ahni Paul mani d Jesus Christ kehsha mo wa am ni-tatchuid g Jiosh. K ia i ni-wehmaj ihda t-wehnag mo hab chehgig Sosthenes.
2Jiosh at ab i em-gawulkai mamt d wo hemajkamgajk. Kumt heg hekaj ab i e hemakoj wehsijj t-wehm ahchim mach hab waꞌap ab ihm g t-kownalig Jesus Christ.
3Ab o wa si s-em-hoꞌigeꞌid g t-ohg Jiosh g t-kownalig Jesus Christ wehm ch ab wo wa baꞌich i em-mahkad g i wehmtadag ch s-ap tahhadkam.
Ab o hoꞌigeꞌid g Paul g Jiosh mat ab si i s-ha hoꞌigeꞌel.
4Chum ani hekid ab si hoꞌigeꞌid g Jiosh em-hekaj. Ab amt i s-wohoch g Christ. T g Jiosh ab i em-mah g geꞌe i wehmtadag. 5M heg hekaj s-mahch mo haschu s-apꞌe ch s-ap haꞌichu am hab junihim ch s-ap haꞌichu k amjed neneok. 6Am o e chehgidch mam s-wihnam an uꞌukch g haꞌichu t-ahga ab amjed g Christ. 7Kum wehs ab i neid g hoꞌigeꞌidadgaj ch ep nenida mat ep wo jiwia. 8-9Jiosh at ab i em-waid k ab i em-gawulkai mat hab masma hab t-juh. Kum hab si s-ap s-mahch g alidaj Jesus Christ. T g Jiosh pi hekid am hu gawul wo juh g hab e-elida k an wo t-uꞌukchid matt pi ab hu wo t-chuꞌijigch heg eda tash mat wo ha lodai g pi ap chuꞌijkam.
Mash am aꞌai gaꞌagwulkdas g wohochuddam.
10T-kownalig Jesus Christ o ab ni-mahkch g gewkdag mant wo haꞌichu em-cheha. Kunt hekaj wo em-ahgi mamt pi ab hu e wui wo gegokiwua k wabshaba ab wo i hemakoj g e-chegitoidag k wo s-ap e tahtkk ab aꞌai e wui.
11Ia at haꞌi dada g em-wehm kihkam mo d Cloe hajuni k hab kaij mamsh pi e wehm neneok. 12Haꞌi amsh hab kaij mamsh ahni am ni-oid ch amsh haꞌi g Apollos am oid ch amsh haꞌi g Peter am oid. Kumsh haꞌi hab e elid mamsh ahpim d waꞌi wohokam oiddam g Christ.
13Neh, am amtsh aꞌai i e gaꞌagwulkad k eda d chum hemako ab wecho g Christ. Pi att hema ahchim ab muh kots t ab em wehhejed. Heg at waꞌi Christ hab e juh. Kumt heg ab waꞌi s-wohochud k e pahl wapko.
14-17Pi ant heg wehhejed am hu jiwia manis wehs wo em-pahl wapko. Shahag wepo mant hegam waꞌi Crispus ch Gaius ha wapko, pej hegam ehp Stephanus. Pi ant chegito manis haꞌi ep ha pahl wapko. Pi ani hab ni-ahg mams ahni wo i ni-oi. Pi at heg hekaj am i ni-kei g Christ manis wo ha pahl wapkonad k wabshaba am i ni-kei mant am wo ahgachugad ihda s-kehg haꞌichu ahga mo hab chuꞌig mat ab e muhkid kots t ab t-wehhejed. Neh, id ani waꞌi ahgachug ch pi hekaj g s-hasig neꞌoki mams ab wo si has ni-elid k p i am hu wo amichud k hab pi wo e doꞌibia.
Mash g Christ am t-chehgidch g gewkdaj g Jiosh ch haꞌichu amichudadaj
18Hegam mo pi d e doꞌibiakam o hab elid mo d wabsh pi haꞌichu g haꞌichu t-ahga mat g Christ ab muh kots t ab t-wehhejed. Kuch wabshaba ahchim mach d t-doꞌibiakam s-mahch mo g Jiosh hab masma ab t-chehgidch g e-gewkdag. 19Neh, an o oꞌohanas mo hab kaij g Jiosh:
Haꞌi o hab e elid mat wo i e apꞌech heg hekaj hejel e-amichudadag.
Nt wabshaba am wabsh wo pi haꞌichuch g hab ha-elida. Isaiah 29:13
20Pegih, am o t‑chehgidch g Jiosh matt pi hedai wo shaꞌi t‑nako machs wo hejel t‑doꞌibia, chum achs hems haꞌichu wo s‑amichudad ch haꞌichu wo s‑mahchkad. Pi att hedai wo shaꞌi t‑nako machs wo ha neꞌowin k wo cheh g Jiosh wohokam. 21Jiosh at hab masma hab t‑juh matt pi hedai wo shaꞌi t‑nako machs hejel wo s‑mai g Jiosh k wo t‑doꞌibia. Haꞌi o pi haꞌichuchud g Jiosh haꞌichu ahga. K wabshaba hab d elidaj matt ab wo i s‑wohoch g haꞌichu ahgaj k hekaj wo t‑doꞌibia. 22Ni‑wehm Tutuligo o s‑hohhoꞌid mat hoꞌip nei g s‑hasig haꞌichu k haha wo s‑wohoch hegai mo hab junihim. K g gawul mahs hemajkam s‑kaimk g hemajkam haꞌichu ha‑mahchig mat hab masma wo chum s‑mai g wohokam. 23Ch wabshaba ahchim hi heg ahgachug mat g Christ ab muh kots t ab k hekaj t‑doꞌibia. Tutuligo o hab elid mo id wabsh chehgidch mo pi gewkdag. K g gawul mahs oꞌodham hab elid mo wabsh chehgidch mo pi haꞌichu amichud. 24-25T wabshaba g Jiosh ab haꞌi i t‑gawulkai ahchim Tutuligo k hab waꞌap ab haꞌi i em‑gawulkai ahpim gawul mahs hemajkam matt ab wo i s‑wohoch g alidag k wo t‑doꞌibia. Hegam mo pi d e doꞌibiakam o pi ab hu haꞌichuchud ihda mat g Jiosh am hab t‑juni am gahi wuhshanim g e‑alidag. K wabshaba g Jiosh hab masma am t‑chehgidch g e‑amichudadag ch e‑gewkdag.
26Am g wo s‑chegitok, ni‑wepnag, mam has i masma mat eda koi ab hu i em‑gawulkai g Jiosh mamt d wo hemajkamgajk, Muꞌijj am pi haꞌichu mahch ch pi ha gewkdag ch d wabsh pi haꞌichu am ha‑nena ed g hemajkam. 27T g Jiosh ab i em‑gawulkai mat hekaj am wo ha chehgi hegam mo pi mahch mo d wabsh pi haꞌichu g haꞌichu ha‑amichudadag ch ha‑gewkdag. 28Pi am ab hu em‑haꞌichuchud ch wabsh s‑em‑uhwaid. T wabshaba g Jiosh ab i em‑gawulkai mat hekaj am wo ha chehgi mo pi d shaꞌi haꞌichu hegam mo g hemajkam ab si has ha elid. 29Heg o hekaj hab mahs mat pi hedai wo chum si e haschudad am tahgio g Jiosh. 30Heg at ab i t‑wehnad g Christ matt ab i s‑wohoch g s‑kehg haꞌichu ahga ab amjed. T g Christ t‑doꞌibia ab amjed g pi apꞌekam k am i t‑apꞌech wehhejed g Jiosh matt d wo hekia s‑apꞌekam hemajkamgajk, Bo masma ab t‑chehgidch g Jiosh haꞌichu amichudadag. 31Heg o hekaj an hab chuꞌig Jiosh oꞌohana ed:
Pi g hedai hejel ab hu wo e haꞌichuchudad k ch heg ab wo waꞌi haꞌichuchudad mat haschu hab t‑juni g Jiosh. Jeremiah 9:24
Currently Selected:
1 CORINTHIANS 1: ood
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.