1 PETER 2
2
Mach ab ab g Christ
1Gam g hu hab wo i juhni g s‑padhog elidadag ch iattogida ch hehgamdadag ch has ahgadag. 2-3Jiosh haꞌichu ahga o d s‑kehg gegosig g em‑doakag wehhejed. Ab at em‑wui chehgi g e‑hoꞌigeꞌidadag. Kumt ab wo si tatchuad hab masma mo g s‑moik ali tatchua g wihbi ch hekaj wo i geꞌelhid am e‑doꞌibiadag ed.
4Ab g wehs wo i e dagito t‑kownalig Jesus wui. Haꞌi o chum s‑ohhodamk g hemajkam. T wabshaba g Jiosh am i kei mat d wo t‑shonk am t‑wohochudadag ed. 5Kumt ab wo abkad hab sha masma mat g hohodai ab wo abkad g e‑shon am ha‑kihta ed. Heg o wa wepo mach ab ab kihtas g Jesus ch d geꞌe cheopi no pi am hahawa t‑eda g Jiosh. Jiosh at wehs am i t‑chuhcha ahchim Jesus wohochuddam matt d wo hekiakam papalk ch ab wui wo t‑hoꞌigeꞌidahunad ch am hab wo junihid g tatchuij. T id heg wo wa wepok mo g s‑ap iagchulida no pi g Jiosh s‑hohhoꞌid. 6Id ani hab kaij no pi an oꞌohanas mo g Jiosh hab kaij:
Am ant wo hema i kei mat d wo ha‑shondagk g ni‑hemajkamga.
T hegam mat ab wo i s‑wohoch pi hekid heg hekaj wo si e elidad. Isaiah 28:16
7Neh, bo kaij g Jiosh. K ihda kehshaj woho d si t‑tatchui ahchim mach ab s‑wohochud. T wabshaba hegam mo pi ab hu wohochud wabsh s‑ohhod. Id o hab ahgch an oꞌohanas mo g Jiosh hab kaij:
Ni‑kehsha at d wo ha‑shondagk g ni‑hemajkamga, chum as g ha‑wanimeddam wo chum s‑ohhod. Psalm 118:22
8K an ep oꞌohanas:
Hemajkam at ab ab wo keiko hegai mat d wo chum ha‑shondagk. Isaiah 8:14
Id o hab d ahga mat muꞌijj pi ab hu wo wohoch g Jiosh neꞌoki k pi wo mahchk g kehshaj. K d Jiosh tatchui mat idam pi wo e doꞌibia.
9Kum eda ahpim ab s‑wohochud ch d Jiosh hemajkamga ch wehs d papal am wehhejed g t‑kownalig Jesus. Jiosh at am i em‑chuhcha mamt wo i ahgahi g s‑kehg haꞌichu tatchuij. Ab at i em‑wuwhas s‑chuhugam k amjed k ab i em‑wahpki si s‑kehg tonlig ch ed no p i ab em‑mahkch g amichudadag. 10Heki am hu pi d haꞌichu ch wabshaba hemuch d hahawa Jiosh hemajkamga ch ab hahawa uꞌukch g Jiosh hoꞌigeꞌidadag.
Matt hab wo junihid g Jiosh tatchui
11Pegih, ni‑wepnag, pi am ia hu d si kihkam jewed dahm. Chum o hems g hejel em‑tatchui cheggia g em‑doꞌibiadag. Kunt wo si em‑ahgi mamt pi ab hu wui wo i e dagito 12k wabshaba hab wo junihid g s‑apꞌekam. T hab wo nei g s‑ap haꞌichu hab em‑juni hegam matp hedai ab haꞌichu em‑abchud. T ab wo i e ai g geꞌe lodaita tash. T idam hemho wa wo wohokamch mat g Jiosh si s‑kehg haꞌichu hab juh am em‑doakag ed.
13-14Ab g wo s‑wohog elidad g kownal ch wehs hegam mo d kownal chuhchai. Idam o chum s‑koꞌokam ha namkid g pi ap chuꞌijkam ch ab i ha gewkemhun g s‑ap chuꞌijkam. 15K d Jiosh tatchui mamt ab wo s‑ha wohog elidad ch hab wo junihid g s‑apꞌekam. T hab pi wo e nako mas has wo em‑ah hegam matp hems nahnko em‑ahg. 16Ab at i em‑wuwhas g Jiosh heki hu em‑himdag amjed. Mt hab masma am hab wo e junihid mam d e doꞌibiakam ch d si piongaj g Jiosh ch wabshaba pi wo hekaj g e‑apꞌedag mams am hu hab wo juh g pi apꞌekam. 17Ab g wo ihmad g Jiosh ch ab wo si has ha elidad g kokownal ch s‑ap ab wo ha neidad g hemajkam ch ab wo si pihk e elidad ha hekaj g e‑wehm wohochuddam.
Matt has masma ab wo bei g t‑shoꞌigchudadag
18Ahpim pion, ab g wabsh wo i e dagitokchid e‑aꞌamo ha wui ch ab wo has ha elidad, chum as haꞌijj wo s‑ta kekꞌeidamak. 19Kut g Jiosh ab wo s‑em‑hoꞌigeꞌidad. S‑apꞌe o mamt s‑ap wo nako g shoꞌigchudadag s‑chegitokch g Jiosh. 20Ab o d t‑wuikam g s‑koꞌok namkidadag mattp hab wo junihid g pi apꞌekam. Ttp wabshaba s‑ap wo nako g shoꞌigdag am hab chum junihidch g s‑apꞌekam, t g Jiosh ab wo wa s‑t‑hoꞌigeꞌel id hekaj 21no pi hab d elidaj matt s‑ap ab wo nako.
Id o wa am t‑chehgidch g Christ mo wa eda s‑ap ab nakog g shoꞌigdag am t‑wehhejed.
22Neh, pi at hekid hab juh g pi apꞌekam k pi hekid shaꞌi haꞌichu ha iattogid. Isaiah 53:9
23Ab amt wa si s‑koꞌokam has ah. T wabshaba pi ab hu aigo has ha ah. Si amt shoꞌigch. T wabshaba pi ha ebkiod k ab wabsh i e dagitokch Jiosh wui s‑mahchch mo heg d si s‑apꞌekam usagakam. 24Christ at wehs moht g t‑chuꞌijig k heg hekaj ab e muhkid kots t ab mat wo t‑doꞌibia. Kutt hab wo dagito g pi apꞌekam k am wo i hihi s‑apꞌekam oidk. Shoꞌigchudadaj at doaj g t‑doakag.
25Dach wa heb hu hihimkam hab sha masma mat g kahwal wo heb hu hih. Isaiah 53:6
T g Christ ab uhpam i t‑ui e wui k s‑ap nuhkud g t‑doakag hab sha masma mat g kahwal ha nuhkuddam hab wo juh g heb hu himkam kahwal.
Currently Selected:
1 PETER 2: ood
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.