1 JOHN 5
5
Mattsh wo ha gewito hegam mo ab wui gegok g Jiosh
1Dach Jiosh aꞌaliga wehsijj ahchim mach s-wohochud mo g Jesus d alidaj g Jiosh ch d si Kehshaj. Kutt ab aꞌai wo si t-tatchuad nach pi d t-wepngam. K g Jiosh d t-ohg. 2S-mahch ach mo d wohokam g t-tatchuidag ab aꞌai t-wui nach pi ab si tatchua g Jiosh. 3K am wa tasho mach ab si tatchua g Jiosh nach pi ab s-wohog elid. K g chehanigaj pi shaꞌi wehch am t-wehhejed. 4-5Jiosh o ab t-mahkch g gewkdag matt wo gewito g pi apꞌekam. Ab ach s-wohochud g alidaj. K heg hekaj ab t-mahkch hegai gewkdag matt heg hekaj gewito g pi apꞌekam. Pi at wo e nako g pi wohochuddam mas wo gewito g pi apꞌekam.
Mash g Jiosh am wohokamchud g e-alidag
6Jesus Christ at ia jiwia jewed dahm k e pahl wakon k am hab juh g e-chikpan k am hahawa e muhkid am t-wehhejed. 7-8T g pahl wakonaj ch muhkigaj am wohokamch mo d Jiosh alidag ch d doakam id dahm jewed. K g Hekia S-apꞌekam Gewkdag hab waꞌap wohokamchud. Idam waik o am wohokamchud mo g Jesus d Jiosh alidag. 9Neh, ab ach s-wohochud g oꞌodham mat ab haꞌijj wo t-ahgi mo si s-ap s-mahch. K g Jiosh haꞌichu ahga baꞌich i s-gewkdag mat heg am wohokamch g e-alidag. 10Kutt hedai ab wo s-wohoch g Jiosh alidag k wo si s-ap s-mahchk mo d wohokam. Hekia S-apꞌekam Gewkdag at t-wehhejed wo wohokamch. Hegam mo pi wohochud g Jiosh oki hab elid mo t-iattogid. 11Ab o i t-tashogid g Jiosh mo ab t-makiog g pi ha huhugedam doakag am gahi wuhshanim g e-alidag. 12Ahchim mach ab ihm g alidaj ach edgid hegai doakag. K hegam mo pi ab hu ihm pi edgid.
Mo hedai edgid g wechij doakag
13Id ant am em-oꞌohani ahpim mam ab ihm g Jiosh alidag mamt hekaj wo s-mahchk mam edgid ihda wechij doakag. 14-15Si ach s-mahch mat ab wo t-kaiha g Jiosh matt ab haꞌichu wo tai matp id am tatchuij oidch d wo haꞌichuk. Kutt heg hekaj ab wo i t-gewkemhunad ch ab wo haꞌichu tahnid nat pi woho am hab wo t-junidahid.
16Ab att wo tahnid g Jiosh mat gam hu hab wo i juh g ha-chuꞌijig g t-wehm wohochuddam matp ab wo e shohbi. Kut hab wo juh mach haschu ab tahni. Pi ani em-ahgid mams wo e hoꞌigeꞌidahu ha wehhejed hegam mat pi ab hu wo shaꞌi e shohbi. 17Wehs o haꞌichu d pi apꞌekam mo haschu i pi d Jiosh tatchui. T wabshaba g Jiosh gam hu hab wo i juh g ha-chuꞌijig hegam mat ab wo e shohbi.
18-19S-mahch ach mo g Jiawul edgid g gewkdag am wehs ha dahm hegam mo pi d Jiosh aꞌaliga. Kuch eda ahchim d Jiosh aꞌaliga. Jiosh alidag o t-nuhkud. Kut pi wo shaꞌi e nako g Jiawul mas gam hu hab wo i t-juh ab amjed. Pi att am hu hab wo junihid g pi apꞌekam ahchim mach d Jiosh aꞌaliga. 20K g Jiosh alidag ab t-mahkch g amichudadag matt wo s-mahchk g wohokam Jiosh ch wo edgidad g wechij doakag. Heg at hekaj ia jiwia g Jiosh alidag jewed dahm. Heg o d waꞌi t-Jioshga mo d si wohokam Jiosh. 21Kumt pi haꞌichu ep wo jioshchud k pi hedai ep ab hu wui wo e hoꞌigeꞌidahunad.
Currently Selected:
1 JOHN 5: ood
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.