Matiu 2
2
Wʋjɩnnaa mʋ na Yesu
1-2Ba lʋl Yesu Bɛtɩlɛhɛm lɛ nɛ. Tabie-la fa hɛ Judiya tinteeŋ lɛ nɛ. Bʋa deeŋ lɛ baal kʋbala baa yɩrɛ Hɛrɔd nɛ fa ŋaa tintee-la kuoro. Ba sɩ lʋl Yesu, wʋjɩnnaa lɩɩ taŋ-bʋbʋɔŋ a kɔ Jerusalɛm a pɩɛsɛ, “Juu tɩŋŋaa kuoru-la ba sɩ lʋla hɛ nɩɩ nɛ? La na ʋ chɛnwʋlʋŋ taŋ-bʋbʋɔŋ nɛ a kɔ dɩ la chʋɔlʋ.” 3Kuoro Hɛrɔd fa sɩ nɩɩ wɩɩŋ deeŋ, wɩɩ-la walɩmɛ ʋ dɩ Jerusalɛm nɩaa kala kɩŋkɛŋ kɩŋkɛŋ. 4Ŋɩɩ nɛ ʋ yɩrɛ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba ba kʋ hilimi. Ʋ pɩɛsɛba, “Nɩɩ nɛ ba jaŋ lʋl Kirisito, nɩɩ-la Wɩa sɩ lɩɩsa?” 5Ŋɩɩ nɛ ba bʋla pʋ, “Ba jaŋ lʋlʋ Bɛtɩlɛhɛm lɛ, Judiya tinteeŋ. Ŋ-la nɛ Wɩa wʋlaabʋllaa fa ŋmʋnsɛ: 6Wɩa sɩ,
‘Bɛtɩlɛhɛm ŋaa tabie nɛ Judiya tinteeŋ lɛ.
Ama Judiya tinteeŋ kala lɛ, Bɛtɩlɛhɛm nɩaa nɛ ŋaa nɩbalaa,
bɛɛ wɩaa ba tʋɔŋ nɛ Iziral tɩŋŋaa sɩpaalaara jaŋ lɩɩ,
nɩɩ-la sɩ jaŋ beŋ mɩ nɩaa, Iziral tɩŋŋaa.’ ”
7Ŋɩɩ nɛ Hɛrɔd lʋara yɩrɛ wʋjɩnna-la sɩ lɩɩ taŋ-bʋbʋɔŋ mʋ pɩɛsɛba dɩ ba dagʋ bʋa-la tɩtɩa lɛ chɛnwʋl-la sɩ lɩa. Ba daga pʋ. 8Ŋɩɩ nɛ Hɛrɔd taba dɩ ba mʋ Bɛtɩlɛhɛm, aŋ bʋla pɩba, “Má mʋ chɛ bile arɩ sɩɩfɩɛsɩŋ. Dɩ ma nɛ naʋ, má leŋ dɩ mɩ ma jɩŋ ŋɩɩ niiŋ lɛ, a ma mʋ chʋɔlʋ.” 9Ba sɩ nɩɩ ŋɩɩ, ba lɩɩ joŋ wombiiŋ a mʋmʋ. Chɛnwʋl-la ba fa sɩ na taŋ-bʋbʋɔŋ bɩra laa ba sɩpaaŋ. 10Ba bɩra sɩ na chɛnwʋl-la, ba tʋɔŋ kala tɔrɛ, ba jʋjʋɔsɛ. 11Ba sɩ mʋ yi lee-la bii-mulo-la sɩ hɛ, chɛnwʋl-la chɩŋ dɩa-la nyuŋ. Ba mʋ jʋʋ dɩa-la a na bii-mulo-la arɩ Mɛɛrɩ, ʋ naaŋ. Ba tuu kpirimi ʋ sɩpaaŋ a chʋɔlʋ. Ŋɩɩ nɛ ba puri ba chʋgʋsʋŋ a lɩɩsɛ kɩaa pʋ: Sɛlɩmɛ, tɩɩ-kel-zɔŋ baa yɩrɛ fɩraŋkɩsɛŋ arɩ tɩɩ-kel-zɔŋ dɔŋɔ baa yɩrɛ mɛɛ. 12Ŋɩɩ nɛ Wɩa kpʋrɩsɛ ba dɩgɩlaa duosoo tʋɔŋ arɩ ba sɩ́ mɩɩra mʋ Hɛrɔd teeŋ. Ŋɩɩ nɛ ba sii a to wombii-wogo a mɩɩra mʋ ba jaŋ.
Josɛf arɩ Mɛɛrɩ fá mʋ Ijipiti tinteeŋ
13Wʋjɩnna-la sɩ mʋa, Josɛf pɩŋ doŋ a duosi a na Wɩa tɩndaara dɩ ʋ kɔ ʋ teeŋ a bʋla pʋ, “Sii a joŋ bii-mulo-la arɩ ʋ naaŋ a fá mʋ Ijipiti tinteeŋ a hɛ nɩmɛ see dɩ mɩ bɩra bʋla pɩŋ dɩ ŋ lɩɩ nɩmɛ, bɛɛ wɩaa Hɛrɔd ka chɛ dɩ ʋ kpʋ bii-mulo-la nɛ.” 14Ŋɩɩ nɛ ʋ sii a joŋ bii-mulo-la arɩ ʋ naaŋ a mʋ Ijipiti tinteeŋ tɩtaŋɩŋ. Ʋ hɛ nɩmɛ nɛ deeŋ deeŋ Hɛrɔd kʋ sʋʋ. 15Wɩɩŋ deeŋ ŋaa dɩ wɩɩ-la Wɩa fa sɩ to ʋ wʋlaabʋllaa lɛ bʋl kʋ ŋaa wʋtɩtɩɩ nɛ. Ʋ fa bʋla arɩ ʋ jaŋ yɩrɛ ʋ nanʋala dɩ ʋ lɩɩ Ijipiti tinteeŋ kɔ.
Ba kpʋ hambolibiisiŋ Bɛtɩlɛhɛm lɛ
16Hɛrɔd sɩ na arɩ wʋjɩnna-la nyɩsʋ nɛ, ʋ faasa na baanɩŋ. Wʋjɩnna-la fa sɩ dagʋ bʋa-la lɛ ba sɩ lʋl Yesu ŋɩɩ, ŋɩɩ nɛ ʋ ta ʋ laalɩyuoroo dɩ ba mʋ Bɛtɩlɛhɛm tabiisi-la kala sɩ gollu chu a kpʋ hambolibiisi-la kala ha sɩ bɩ jɩsɩŋ balɩa kiele. 17A tɩŋ ŋ-la wɩaa wɩɩ-la Wɩa wʋlaabʋlla Jɛrɩmaaya fa sɩ bʋla kʋ ŋaa wʋtɩtɩɩ nɛ.
18Ʋ fa sɩ:
“Nʋʋ nɩɩ yel Rama lɛ.
Nɩɩ-la faasa yiyel nɛ.
Rakɛl ka yel ʋ
biiriŋ wɩaa nɛ.
Ʋʋ yel nɛ a bɩ sɛɩ dɩ ba nyagɛ ʋ bɔyɛ,
bɛɛ wɩaa ʋ biiriŋ kala sʋba nɛ.”
Josɛf arɩ Mɛɛrɩ mɩɩra mʋ Nazarɛt
19Ŋɩɩ nɛ Hɛrɔd kʋ sʋʋ. Ʋ sɩ sʋba ŋɩɩ, Josɛf bɩra duosi Ijipiti tinteeŋ lɛ, a na Wɩa tɩndaara dɩ ʋ kɔ ʋ teeŋ a bʋla pʋ, 20“Sii a kɛŋ bii-mulo-la arɩ ʋ naaŋ a mɩɩra mʋ Iziral tinteeŋ. Nɩalɩŋ fa sɩɩ chɛ dɩ ba kpʋ bii-mulo-la, ba sʋba nɛ.” 21Ŋɩɩ nɛ ʋ sii kɛŋ bile arɩ ʋ naaŋ a kaa mʋ Iziral tinteeŋ. 22Ama Josɛf sɩ nɩa arɩ Hɛrɔd sʋba, ka ʋ nanʋala Akɩlɩas laa ʋ nyuŋ dii kuoruŋ Judiya tinteeŋ lɛ, fawʋllʋŋ fa kɛnʋ arɩ ʋ sɩ jaŋ hɔŋ nɩmɛ. Ŋɩɩ nɛ Wɩa bɩra bʋla pʋ duosoo tʋɔŋ dɩ ʋ mʋ hɔŋ Galilii tinteeŋ lɛ. 23Ʋ sɩ mʋ Galilii tinteeŋ, ʋ mʋ hɔŋ taŋ kʋbala lɛ baa yɩrɛ Nazarɛt. Ʋ ŋaa ŋɩɩ dɩ wɩalɩŋ Wɩa wʋlaabʋllaa fa sɩ bʋla kʋ ŋaa wʋtɩtɩɩ nɛ. Ba fa bʋla:
“Ba jaŋ kɛnʋ yɩrɛ Nazarɛt tɩɩna.”
Currently Selected:
Matiu 2: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014