Tito 3
3
Okristoyin Tsiatɔ
1Tsia kaɩn amʋ́ abʋba ɩwɩasɩ ha ɔmá akpapʋ, abʋgyi ahandɛ mblasʋ, abʋbu amʋ́. Bʋkɩá bɔ́bwɛ tɔá igyi yile bregyibrɛ. 2Bʋmáblɩ ɔhaa ɩwɩ asʋn lalahɛ, bʋmágyi nwɛn ɛ. Mboun bʋbwɛ aha ánɩ́ bolwii, abʋba ɩwɩasɩ ha ɔhagyiɔha. 3Tsufɛ brɛ amʋ a, aha mimlahɛ anɩ ɛ anɩgyi. Asʋtɔ lɔwa anɩ ɔnlɩn. Anɩlɔfwɩ, mli nkpábi ha ɔwɔlɩ lalahɛ pʋ́ atɔá ɩtɔwa ɔha ansigyi. Anɩleyinta brɛ susu lalahɛ mʋ́a tɔá ɩdɛ anɩ ansɩ pɛ ɩwɩ. Aha bolu anɩ, anɩ ɛ anɩlolu amʋ́. 4Tamɛ anɩ nkpa Ɔhɔpʋ Bulu lɛlɛ mʋ awɩtɔlɛ pʋ́ ɔdwɛá ɔbʋ ha anɩ ɔwan. 5Ɔlɛlɛ anɩ, tamɛ megyi yile kʋkʋ anɩlɔbwɛ sʋ, mboun mʋ nwewun sʋ. Ɔlɔtsʋn Ɔŋɛ Wankɩhɛ amʋsʋ fwɩ anɩ lakpan lɛ anɩsʋ, ɔlɛlakwɩɩ anɩ, ha anɩ nkpa pɔpwɛ. 6Ɔlɔtsʋn anɩ Ɔhɔpʋ Yesu Kristosʋ, tsɛɩ Ɔŋɛ Wankɩhɛ amʋ wʋlɩ anɩsʋ. 7Ɔlɔbwɛ anɩ alɩ, mɛnɩ ɔbɔ́wa awɩtɔlɛ ha anɩ, tsu mʋ́á anɩ asʋn da ɔkpa. Fówun anɩ ɩbɩ bɛ́da nkpa ánɩ́ ɩtamata amʋʋ anɩdɛ mʋ́ ɔkpa kɩ amʋ. 8Asʋn anfɩ bʋ mʋ́tɔ.
Yɩrɩ ɩwɩ afʋsuna mʋ́ wanklaan, mɛnɩ aha amʋʋ amʋ́ ansɩ dɩn Bulusʋ amʋ bétsia bwɛ yile bregyibrɛ. Mʋ́gyi tɔá ɩbʋ alɛ, ɩbɔ́wa labi ha ɔhagyiɔha nɩ. 9Mápʋ ɩwɩ wa mimla nwɛngyi, anain otuntufla kla pʋ mbla amʋ ɩwɩ ɩtrɛtɔ. Labi ma mʋ́tɔ kugyikʋtɔ. 10Tɔɩ kpla ɔha ánɩ́ ɔtɛtɩ ɩtrɛ wa aha nsɩnɛ tse nyɔ pɛ. Mʋ́ ɔma a, si mʋ asʋn. 11Bɩá ɔha amʋ odu nwuntɔ bʋ oklun. Oyin ánɩ́ lalahɛ mʋdɛbwɛ. Alaha mʋ ɩwɩ pɔn dodo.
Paulo Asʋn Trahɛ
12Nenya wa Artema ntɛ Tihiko fʋ wa pɛ, bɔ mbɔdɩ afʋbɔtʋ mɩ Nikopoli wulutɔ, tsufɛ nabwɛ agywɩɩn ánɩ́ nétsia ɩnʋ atsalɩbɩ. 13Bɔ mbɔdɩ afʋsi mbla osunapʋ Sena mʋa Apolo ɔkpa wanklaan. Tɔtɔ ɩmáhian amʋ́ ɔkpatɔ. 14Ha anɩ pɩ amʋ ɛ abʋbɩ alɩá bʋtɔbʋa aba agyʋma yɔ wanklaan, mɛnɩ bɛ́talɩ kɩ aha ánɩ́ bʋma tɔtɔsʋ. Fówun bʋmɔ́ɔbwɛ aha ánɩ́ amʋ́ ɩwɩ mɔwa labi.
15Aha amʋʋ bʋbʋ mɩ wa nfɩ amʋ fɛ́ɛ́ bɛha fʋ itsia. Aha ahogyipʋ amʋʋ bʋtɔdwɛ anɩ amʋ itsia.
Bulu ogyi mlɩ fɛ́ɛ́ bʋalɛ.
Currently Selected:
Tito 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation