Marko 13
13
Bulu Ɔtswɛkpa Amʋ Bwie
(Mateo 24:1-2; Luka 21:5-6)
1Brɛá Yesu lɛdalɩ Bulu ɔtswɛkpa wunsɩnɛsʋ ɩnʋ ɔyɔ a, mʋ akasɩpʋ amʋtɔ ɔkʋlɛ lɛbla mʋ ɔbɛɛ, “Osunapʋ, kɩ mbu wanklaan pʋ́ abwi akpɔnkpɔntɩ anfɩ bɔpʋyi mʋ́ anfɩ akɩlɛ!”
2Mʋʋ ɔlɛbla mʋ ɔbɛɛ, “Yɛ fawun mbu akpɔnkpɔɔnkpɔntɩ anfɩ? Bóbwie mʋ́ fɛ́ɛ́ bun. Ibwi kʋlɛ kʋraa iméesian dɩnka mʋ́ basʋ.”
Ɩwɩɔsɩn Mʋ́a Ɩkplan
(Mateo 24:3-14; Luka 21:7-19)
3Brɛá Yesu tsie Olif ɩbʋ amʋsʋ, ɔdɛ Bulu ɔtswɛkpa mbu amʋ kɩ a, Petro, Yakobo, Yohane mʋa Andrea nkʋlɛ bɛfɩtɛ mʋ bɛɛ, 4“Bla anɩ, brɛ mɔmʋtɔ ɩnɩ fɛ́ɛ́ ɩbɛ́ba? Osuna mɔmʋ ɛ ɔbɛ́ba, ibósuna ánɩ́ mʋ́ brɛ lafʋn?”
5Ɩnʋ Yesu lɛbla amʋ́ ɔbɛɛ, “Mlɩkɩ wanklaan, mɛnɩ ɔhaa mɛ́ɛmlɛ mlɩ. 6Aha tsɔtsɔɔtsɔ bɔ́pʋ mɩ ɩda ba bɛɛ, amʋ́gyi Kristo amʋ nɩ. Bɛ́mlɛ aha tsɔtsɔɔtsɔ bɔ́fwɩ ɔkpa. 7Nɩ mlonuá ɩsa lada manta mlɩ ntɛ ɔtɩnɛkʋ a, opuni mátsii mlɩ Tsufɛ lehian ánɩ́ ɩnɩ aná fɛ́ɛ́ ɩbɛ́ba, tamɛ imedesuna ánɩ́ ɔyɩ ɔnɔmɔkɛ amʋ lafʋn. 8Tsufɛ ɔma bɔ́kɔ aba. Awie bɔ́kʋsʋ lɩɩ abasʋ. Ɔsʋlʋ bɛ́kpɩnkɩ ntɩnɛ-ntɩnɛ. Akʋn ɛ bɛ́ba. Ɩnɩ fɛ́ɛ́ igyi fɛ ɩwɩɔsɩn ánɩ́ ɔtsɩ towun brɛá ɩkwɩɩ dɛ mʋ dwiin.
9“Mʋ́ sʋ mlɩ mʋ́ mlɩkɩ mlɩ ɩwɩ wanklaan. Tsufɛ mɩ sʋ bɔ́pʋ mlɩ ha Yudafɔ asʋn agyipʋ. Bɛ́da mlɩ amʋ́ ofiakpa awulu-awulusʋ. Bɛ́kpa mlɩ ya ɔmásʋ agyipʋ pʋ́ awie ansɩtɔ, mɛnɩ mlégyi mɩ ɩwɩ adansɩɛ. 10Tamɛ ilehian ánɩ́ bégyankpa da asʋn wanklaan amʋ ɔkan suna ɔyɩtɔ aha fɛ́ɛ́. 11Nɩ bɛkɩta mlɩ ya a, mlɩmágywɩɩn asʋn ánɩ́ mlɛblɩ. Mlɩblɩ asʋngyiasʋn ánɩ́ Bulu ɔbɔ́pʋwa mlɩ ɔnɔ alɩ brɛ amʋtɔ. Tsufɛ megyi mlɩ onuto ɔbɔ́tɔɩ, Ɔŋɛ Wankɩhɛ ɔbɔ́tɔɩ tsʋn mlɩsʋ.
12“Apio bɛ́lɛ amʋ́ apio ha lowu. Abi asɩ bɛ́lɛ amʋ́ abi ha. Abi ɛ bɔ́kʋsʋ lɩɩ amʋ́ akwɩɩpʋsʋ, ha bɔ́mɔ amʋ́. 13Mɩ sʋ aha fɛ́ɛ́ bólu mlɩ, tamɛ nɩ mlɛtalɩ wa klʋn lɩɩ kinkiinkin yɔfʋn mʋ́ ɔnɔmɔ a, Bulu ɔbɔ́hɔ mlɩ nkpa.
Ɩwɩɔsɩn Wunbɩ
(Mateo 24:15-28; Luka 21:20-24)
14“Tamɛ nɩ mlowun akisitɔá itobwie ɔmá, ɩda ɔtɩnɛá mlɩmɛdɩn ansɩ ánɩ́ ɩbɛ́ba a, (aklapʋ, mlɩnu mʋ́ asɩ.) Mʋmʋ aha ánɩ́ bʋbʋ Yudea ɔmátɔ bʋsrɩ yɔ abʋsʋ. 15Ɔha ánɩ́ ɔdɩn obusʋ mákplɩ botsu tɔtɔ obuto! 16Ɔha ánɩ́ ɔbʋ ndɔtɔ ɛ máyinki botsu mʋ tati. 17Amenyapʋ pʋ́ abi-ayín ánɩ́ bʋpia abi bɔbwɛ alɩ brɛ amʋtɔ bʋgyɔwɩ nɩ! 18Mlɩkokoli Bulu mlɩaa, mlɩ ɔsrɩkɛ amʋ ɩmábwɛ nyankpʋ mʋ́a atsalɩbɩ. 19Tsufɛ asʋn wunhɛ ánɩ́ ɩbɛ́ba alɩ brɛ amʋtɔ odu mɔkʋba tsu brɛá Bulu lɔbwɛ ɔyɩ ɔpá kɩ. Mʋ́ odu kʋkʋ ɛ ɩmɛ́ɛtra ba ɛkɛkɛɛkɛ. 20Nɩ Bulu mɛdɩnkɩ nkɛ amʋsʋ a, tɛkɩ ɔhaa méesian ɔyɩtɔ. Tamɛ aha amʋʋ alalɛ pʋbwɛ mʋ klɛ amʋ sʋ aladɩnkɩ nkɛ amʋsʋ.
21“Alɩ brɛ amʋtɔ a, nɩ ɔkʋ lɛbla fʋ ɔbɛɛ, ‘Kɩ, Kristo, (ɔha amʋʋ Bulu lada mʋ ofuli amʋ) bʋ nfɩ ntɛ nana> a, máhogyi. 22Tsufɛ aha ánɩ́ bɛɛ amʋ́gyi Kristo amʋ pʋ́ aha ánɩ́ bɔ́wa afunu bɛɛ, Bulu ɔnɔsʋ atɔɩpʋ bʋgyi tsɔtsɔɔtsɔ bɛ́ba ɔyɩtɔ. Bɔ́bwɛ ofula pʋ́ osuna pʋmlɛ aha. Nɩ bɛ́talɩ kʋraa a, bɛ́mlɛ aha amʋʋ Bulu lalɛ amʋ ɛ. 23Tamɛ mlɩkɩ wanklaan! Nabla mlɩ togyitɔ asa ɩbɛ́ba.
Nyankpʋsa-Mʋ-Bi Amʋ Ɩbabɩ
(Mateo 24:29-31; Luka 21:25-28)
24“Ɩwɩɔsɩn-wun amʋ ɔma a, owi ɔbɛ́ta, ɔtsra ɛ ɔmɛ́ɛtra fɛɩ. 25Ntsrakpabi bɛ́kpa tsu ɔsʋsʋ bɛda. Nwʋlʋta mʋ́a mʋ́tɔ atɔ fɛ́ɛ́ bɛ́kpɩnkɩ. 26Ɔhagyiɔha obówun ánɩ́ mɩ, Nyankpʋsa-Mʋ-Bi anfɩ napʋ tumi mʋ́a numnyam kpɔnkpɔntɩ mbʋ nwʋlʋtatɔ tsu ɔsʋsʋ nɛba. 27Ɩnʋ Bulu ɔbɔ́wa mʋ abɔpʋ bɛyɛkpa mʋ aha amʋʋ alalɛ amʋ tsu ɔyɩ afʋnka ana amʋ fɛ́ɛ́sʋ.
Ɔyɩ Ɔnɔmɔ Ɩwɩ Osuna
(Mateo 24:32-35; Luka 21:29-33)
28“Mlɩpʋkɩ pɔntɔ oyi. Nɩ mʋ́ abambi dɛpɔɩ, ɩdɛ atɛ pɔpwɛ lɛ a, mlɩtɛbɩá awikpan brɛ lafʋn. 29Alɩ kɛn, nɩ mlowun ánɩ́ ntobi anfɩ fɛ́ɛ́ ɩdɛ mʋ́tɔ ba a, mlɛbɩ ánɩ́ mɩ, Nyankpʋsa-Mʋ-Bi anfɩ ɩbabɩ lafʋn ta nɩ. Nawie woyi amʋ ɔnɔ ta. 30Ɔnɔkwalɩ ndɛ mlɩ bla. Ndɛmba-abi anfɩ fɛ́ɛ́ bʋmóowu ta, asa ɩnɩ fɛ́ɛ́ bɛ́ba mʋ́tɔ. 31Ɔsʋ mʋ́a asɩ fɛ́ɛ́ bɔ́tsʋn, tamɛ mɩ asʋn blɩhɛ mɔ́ɔtsʋn ɛkɛkɛɛkɛ.
Nyankpʋsa-Mʋ-Bi Amʋ Ɩbabɩ
(Mateo 24:36-44)
32“Tamɛ ɔhaa meyin ɛkɛ ntɛ brɛá ntobi anfɩ fɛ́ɛ́ ɩbɛ́ba. Bulu-abɔpʋ bʋmeyin. Bulu mʋ Bi amʋ ɛ meyin, nkɛtɩ anɩ Sɩ amʋʋ ɔbʋ ɔsʋsʋ amʋ nkʋlɛ pɛ yin. 33Mlɩdɩnka ansɩ ɩwɩsʋ, tsufɛ mlɩmeyin ɛkɛá brɛ amʋ ɩbɔ́fʋn. 34Igyi fɛ ɔkʋá ɔdɛ ɔkpa tu, olesi mʋ woyi wa mʋ asumpʋ ɩbɩtɔ. Ɔlɛha okugyiɔkʋ agyʋma ɔbɛɛ ɔbwɛ. Ɔlɛbla woyi amʋ ogyopʋ ɛ ɔbɛɛ, ɔyɩrɩ ɩwɩ ogyo woyi amʋ wanklaan. 35Mʋ́ sʋ mlɩdɩnka ansɩ ɩwɩsʋ, tsufɛ mlɩmeyin brɛá woyi mʋ wie amʋ ɔbɛ́ba. Fialɩ ntʋpwɛ o, ɔyɩnsɩnɛ o, bakɛ o, ntɛ nyankɩ. 36Mlɩdɩnka ansɩ ɩwɩsʋ, mɛnɩ ɔba bofwie mlɩtɔ a, ɔmɔ́ɔbɔtʋ mlɩ ánɩ́ mlɩladɩdɩ. 37Asʋn anfɩ ndɛ mlɩ bla anfɩ kɛn ndɛ ɔyɩtɔ aha fɛ́ɛ́ bla nɩ. Mbɛɛ, ‘Mlɩdɩnka ansɩ ɩwɩsʋ.> ”
Currently Selected:
Marko 13: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation