Marko 12
12
Apafɔ Lalahɛ Akʋ
(Mateo 21:33-46; Luka 20:9-19)
1Yesu lɔwa amʋ́ asʋn bla ayebitɔ bɩ. Ɔbɛɛ, “Oyin ɔkʋ lɔdɔ waɩn ndɔ. Olegyi ɩban bomli mʋ́. Olokwi waɩn amʋ onyimɛkpa, pwɛ obu fʋahɛ kʋ ha ndɔ amʋ agyopʋ. Mʋʋ ɔlɔpʋ ndɔ amʋ wa apafɔ ɩbɩtɔ, olotu ɔkpa. 2Brɛá waɩn-abi amʋ kpɔtɩbɩ lɔfʋn a, ɔlɔwa mʋ osumpʋ apafɔ amʋ wa ɔbɛɛ, ɔyɛhɔ mʋ ogyikpa ba mʋ. 3Tamɛ apafɔ amʋ bɛkɩta mʋ, da mʋ, gya mʋ sɩsɩ ɩbɩkpan. 4Ndɔ mʋ wie amʋ lɛtra wa mʋ osumpʋ nyɔsɩ amʋ́ wa. Apafɔ amʋ bɛda mʋ ɛ, pilan mʋ nwuntɔ, sʋpa mʋ. 5Ɔlɛtra lawa ɔbamba. Mʋ mʋ́ a, bɔmɔ mʋ. Alɩ kɛn bɔbwɛ atrahɛ ɛ nɩ. Bɛda akʋ, mɔ akʋ ɛ. 6Ilesi mʋ onuto mʋ bi ɔkʋlɛ pɛá ɔtamatsula mʋsʋ. Ɔkɩ ɔbɛɛ, bóbu mʋ mʋ́. Mʋ́ sʋ ɔlɔwa mʋ ɛ. 7Tamɛ apafɔ amʋ bɛblɩ bɛɛ, ‘Ɔ́nɩ obégyi mʋ sɩ atɔ nɩ. Mlɩha amɔ mʋ, mɛnɩ ndɔ amʋ ibémli anɩ klɛ.> 8Mʋ́ sʋ bɛkɩta mʋ, mɔ mʋ, tswɩ mʋ dalɩ ndɔ amʋtɔ.
9“Ɛkɛá ndɔ mʋ wie amʋ ɔba a, ntɔ mlɩlahogyi mlɩaa ɔbɔ́bwɛ apafɔ anfɩ? Ɔbɛ́ha bɔ́mɔ amʋ́, ɔbɛ́lapʋ ndɔ amʋ wa apafɔ bamba ɩbɩtɔ. 10Ntɛ mlɩmɔkʋkla Bulu asʋn wanlɩnhɛ amʋ kɩ? Bɔwanlɩn bɛɛ,
‘Ibwi amʋʋ obu ayipʋ bekina amʋ
lebemli okonkisʋbwi nɩ.
11Bulu lɔbwɛ mʋ́ alɩ.
Ɩbʋ wanwan.> ”
12Ɩnʋ Yudafɔ amʋ bekleá bɛ́kɩta Yesu, tsufɛ bɛbɩá amʋ́ sʋ alaha yebi anfɩ, tamɛ bʋdɛ ɔdɔm amʋ ifu nya. Mʋ́ sʋ bɛnatɩ si mʋ.
Lampooka
(Mateo 22:15-22; Luka 20:20-26)
13Ɔma a, bɔwa Farisifɔ pʋ́ Owie Herode aha bɛɛ, bʋyɛtɛtɛ Yesu ɔnɔtɔ asʋn nu, abʋnya mʋ akɩtalɛ. 14Brɛá bɛba mʋ wa a, bɛbla mʋ bɛɛ, “Osunapʋ, anɩyin ánɩ́ ɔnɔkwalɩpʋ fʋgyi. Fʋtamaha ɔhaa ɔtsɛ fʋ agywɩɩn, tsufɛ fʋtamakɩ ɔhaa ansɩtɔ. Mboun Bulu asʋn amʋʋ igyi ɔnɔkwalɩ amʋ fʋdesuna. Mʋ́ sʋ anɩdɛ fʋ fɩtɛ anu. Anɩ mbla lɛha ɔkpa ánɩ́ aka lampoo ha Roma owie dɛhɛn Kaesare, ntɛ anɩmáka?”
15Yesu lɛbɩá bʋkɩ ansɩ. Mʋ́ sʋ ɔlɛfɩtɛ amʋ́ ɔbɛɛ, “Apinabwɛbi abwɛpʋ, ntogyi sʋ mlɩdɛ mɩ sɔ kɩ? Mlɩtsu kɔba amʋ ɩkʋ ba mɩ ankɩ.”
16Bɔpʋba mʋ. Mʋʋ ɔlɛfɩtɛ amʋ́ ɔbɛɛ, “Ma nwun pʋ́ mʋ ɩda dɩn mʋ́sʋ?”
Bɛlɛ mʋ́ ɔnɔ bɛɛ, “Kaesare.”
17Mʋʋ ɔlɛbla amʋ́ ɔbɛɛ, “Mʋmʋ mlɩpʋ tɔá igyi Kaesare klɛ ha Kaesare, amlɩpʋ mʋ́a igyi Bulu klɛ ɛ ha Bulu.”
Mʋ ɩwɩ lɔwa amʋ́ ifu.
Kʋsʋ Tsu Afulitɔ Ɩwɩ Asʋn Fɩtɛhɛ
(Mateo 22:23-33; Luka 20:27-40)
18Ɔpasua kʋá bʋtɛtɩ mʋ́ Sadukifɔ akʋ bɛba Yesu wa. Bʋgyi ɔpasua kʋá bʋtɛblɩ bɛɛ, kʋsʋ tsu afulitɔ ma ɩnʋ. Bɛfɩtɛ mʋ bɛɛ, 19“Osunapʋ, Mose lɔwanlɩn tswɩ ɔbɛɛ, ‘Nɩ ɔkʋ mʋa mʋ ka bʋmɔkwɩɩ asa olowu si mʋ ka amʋ a, mʋ pio otsu mʋ ka amʋ tsia, fɛ́kɩ ɔkwɩɩ ha owupʋ amʋ.> 20Oyin ɔkʋlɛ abi abasienɔ akʋ betsia. Amʋ́tɔ ogyankpapʋ letsia ɔka, tamɛ ɔmɔkwɩɩ asa olowu. 21Mʋ gyama lotsu ɔsʋrapʋka amʋ tsia, tamɛ mʋ ɛ ɔmɔkwɩɩ. Ɔsasɩ lotsu ɔtsɩ amʋ tsia. Mʋ ɛ ɔmɔkwɩɩ. 22Alɩɩ yɔtʋ osienɔsɩ amʋ. Amʋ́tɔ ɔkʋkʋ mɔkwɩɩ asa olowu. Ɔma-ɔma a, ɔsʋrapʋ amʋ ɛ lobowu. 23Afuli ɔkʋsʋkɛ a, amʋ́tɔ ɔmɔmʋ ɔbɔ́bwɛ mʋ klu? Tsufɛ amʋ́ abasienɔ amʋ fɛ́ɛ́ betsia mʋ.”
24Mʋʋ Yesu lɛlɛ mʋ́ ɔnɔ ɔbɛɛ, “Megyi mlɩ ologyi. Mlɩmeyin Bulu asʋn wanlɩnhɛ amʋ ntɛ Bulu tumi. 25Tsufɛ nɩ afuli bɔkʋsʋ a, bɔ́bwɛ fɛ Bulu-abɔpʋ. Bʋméetsia aka mʋ́a aklu. 26Tamɛ afulikʋsʋ ɩwɩ mʋ́ a, yɛ mlɩlakla Mose ɔwʋlʋ, nu asʋn amʋʋ Bulu lɛbla mʋ ɔsʋlʋkpansʋ brɛá olowun oyibi kʋ dɛ ogya tsii, tamɛ ɩmɛdɛhɔ amʋ? Ɔbɛɛ, ‘Mɩgyi mlɩ anain Abraham mʋa Isakɩ pʋ́ Yakob Bulu amʋ nɩ.> ” 27Ɩnʋ ɔlɛbla amʋ́ ɔbɛɛ, “Megyi awupʋ Bulu ogyi, akɩankpapʋ Bulu ogyi. Mlɩ mʋ́ mlɩlafwɩ fɛ́ɛ́.”
Bulu Mbla Amʋtɔ Mʋ́a Ɩdʋn
(Mateo 22:34-40; Luka 10:25-28)
28Mose mbla asunapʋ amʋtɔ ɔkʋlɛ lɔbɔtʋ amʋ́ ɩnʋ, olonu asʋn ánɩ́ bʋdɛbɩtɩ. Olowun ánɩ́ Yesu lalɛ Sadukifɔ amʋ asʋn ɔnɔ wanklaan. Mʋ́ sʋ ɔlɛfɩtɛ Yesu ɔbɛɛ, “Bulu mbla amʋtɔ mɔmʋ dʋn?”
29Yesu lɛlɛ mʋ́ ɔnɔ ɔbɛɛ, “Bulu mbla amʋtɔ mʋ́a ɩdʋn nɩ. ‘Israelfɔ, mlɩnu. Bulu ɔkʋlɛ pɛ anɩ Wie Bulu gyi. 30Mʋ́ sʋ pʋ fʋ klʋn, fʋ ɔkla, fʋ agywɩɩn pʋ́ fʋ ɔwʋnlɩn fɛ́ɛ́ dwɛ fʋ Wie Bulu.> 31Mʋ́ nyɔsɩ ɛ gyi, ‘Dwɛ fʋ ba fɛ fʋ ɩwɩ.> Mbla kʋkʋ ɩtra ma ɩnʋá ɩdʋn ɩnɩ.”
32Mbla osunapʋ amʋ lɛbla Yesu ɔbɛɛ, “Osunapʋ, fablɩ ɔnɔkwalɩ. Anɩ Wie Bulu nkʋlɛ pɛ bʋ ɩnʋ, ɔkʋkʋ tra ɔma ɩnʋ. 33Apʋ anɩ klʋn, anɩ agywɩɩn pʋ́ anɩ ɔwʋnlɩn fɛ́ɛ́ dwɛ mʋ, adwɛ anɩ aba fɛ anɩ ɩwɩ. Ɩdʋn mbwɩ tɔhɛ pʋ́ ogya-afɔdɩɛ kugyikʋ.”
34Yesu lowun ánɩ́ alabɩ lɛ asʋn amʋ ɔnɔ wanklaan, ɔlɛbla mʋ ɔbɛɛ, “Fʋma ɩfɔ Bulu iwiegyi amʋtɔ.”
Mʋ́ ɔma a, ɔhaa mɛtra wa klʋn fɩtɛ mʋ asʋansʋ.
Ma Gyi Kristo Amʋ?
(Mateo 22:41-46; Luka 20:41-44)
35Brɛá Yesu dɛ atɔ suna Bulu ɔtswɛkpa nwunsɩnɛsʋ ɩnʋ a, ɔlɛfɩtɛ ɔbɛɛ, “Nkalɩ sʋ Mose mbla asunapʋ amʋ bɛtalɩ blɩ bɛɛ, Owie Dawid mʋ na gyi Kristo, (ɔha amʋʋ Bulu lɛda mʋ ofuli amʋ)? 36Tsufɛ Ɔŋɛ Wankɩhɛ lɛha Owie Dawid onuto lɛblɩ ɔbɛɛ,
‘Anɩ Wie Bulu lɛbla mɩ Wie ɔbɛɛ,
“Tsia mɩ gyɔpɩsʋ nfɩ
yɔfʋn brɛá nɛ́ha fɛ́tsatsa fʋ alupʋsʋ.” >
37Owie Dawid onuto lɛtɩ mʋ ɔbɛɛ mʋ wie. Nkalɩ sʋ ɔtra ogyi mʋ na?”
Asʋn anfɩ lɔwa ɔdɔm kpɔnkpɔɔnkpɔntɩ amʋʋ befia bomli mʋ amʋ ɔdwɛ, bɔpʋ ansigyi nu mʋ asʋn.
Mose Mbla Asunapʋ Tsiatɔ
(Mateo 23:1-36; Luka 20:45-47)
38Yesu lɛblɩ mʋ atosunahɛ amʋtɔ ɔbɛɛ, “Mlɩkɩ wanklaan Mose mbla asunapʋsʋ. Bʋtekle liga wa natɩ ki, bʋtekle bɛɛ, aha bʋbun ha amʋ́ itsia dɩnsʋ. 39Otsiakpa yile bʋtekle tsia Yudafɔ ofiakpa pʋ́ nkɛ ogyikpa. 40Bʋtesisi asʋrapʋ, swɩɩ amʋ́ amʋ́ woyi. Bʋtepina bɔ mpaɩ tɩntɩntɩn ahatɔ pʋbun amʋ́ lalahɛsʋ. Bulu ɔbɛ́bɩtɩ amʋ́ ɩsʋ kinkiinkin!”
Ɔsʋrapʋ Ɔkʋ Tswɩtswɩ
(Luka 21:1-4)
41Yesu letsia manta tswɩtswɩ daka Bulu ɔtswɛkpa ɩnʋ, ɔdɛ aha kɩ bʋdɛpʋ amʋ́ tswɩtswɩ bɔwa mʋ́tɔ. Aha ánɩ́ amʋ́ ɩbɩtɔ bʋ odwin bʋdɛpʋ kɔba akpɔnkpɔntɩ bɔwa. 42Ɩnʋ ɔsʋrapʋ ɔkʋá ɔma tɔtɔ ɛ lɔpʋ mʋ kɔba ana bɔwa daka amʋtɔ. 43Mʋʋ ɔlɛtɩ mʋ akasɩpʋ amʋ ba mʋ wa, ɔlɛbla amʋ́ ɔbɛɛ, “Ɔnɔkwalɩ ndɛ mlɩ bla, tswɩtswɩá ɔsʋrapʋ anfɩ ɔma tɔtɔ anfɩ lawa a, ɩdʋn ɔhagyiɔha klɛ. 44Tsufɛ atrahɛ amʋ fɛ́ɛ́ a, amʋ́ kɔba tsɔtsɔɔtsɔtɔ balɛ kpalobi tsu bɔwa. Tamɛ ɩnɩá ɔsʋrapʋ anfɩ mʋ́ má tɔtɔ sʋ tɔá ɔbʋ fɛ́ɛ́ alapʋ bɔwa a.”
Currently Selected:
Marko 12: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation