Luka 11
11
Mpaɩbɔ Ɩwɩ Atosunahɛ
(Mateo 6:9-13; 7:7-11)
1Ɛkɛ ɔkʋ Yesu bʋ ɔtɩnɛkʋ ɔdɛ mpaɩ bɔ. Brɛá ɔlɔbɔ ta a, mʋ akasɩpʋ amʋtɔ ɔkʋlɛ lɛbla mʋ ɔbɛɛ, “Mɩ Wie, suna anɩ mpaɩ bɔ, fɛ alɩá Asu Ɔbɔpʋ Yohane losuna mʋ akasɩpʋ.”
2Yesu lɛbla amʋ́ ɔbɛɛ, “Nɩ mlɔ́bɔ mpaɩ a, mlɩbɔ mʋ́ alɩ.
‘Anɩ Sɩ,
aha bʋbu fʋ ɩda.
Ba begyi iwie.
3Ha anɩ atogyihɛá ɩbɔ́fʋn anɩ ekekegyiɛkɛ.
4Si anɩ lakpan kie anɩ,
fɛ alɩá anɩtesikie aha ánɩ́ bʋtɔpʋ ɩla gyi anɩ.
Mákpa anɩ wa ɩsɔkɩtɔ.> ”
5Ɩnʋ ɔlɛbla amʋ́ ɔbɛɛ, “Nɩ mlɩtɔ ɔkʋ bʋ onyawie a, ɔbɔ́kʋsʋ yɔ mʋ wa ɔyɩnsɩnɛ yɛbla mʋ ɔbɛɛ, ‘Mɩ nyawie, pan mɩ bodobodo apin asa. 6Mɩ nyawie ɔkʋ labɔswɩɩ mɩ seseesei. Mma tɔtɔá nɛ́ha mʋ obégyi.>
7“Mʋ nyawie amʋ ɔbɛ́bla mʋ sɩsɩ ɔbɛɛ, ‘Máwa mɩ tɔɩ. Mɩa mɩ abi anɩladɩ. Nafin obu, mmɛ́ɛtalɩ kʋsʋ bɛha fʋ tɔtɔ.> 8Ndɛ mlɩ bla mbɛɛ, fialɩ onyawie ɔkpasʋ a, ɔmɔ́ɔkʋsʋ ha mʋ. Tamɛ alɩá ɔdɛ mʋ kokoli kotoo sʋ a, ɔbɔ́kʋsʋ ha mʋ alɩá odekle.
9“Mʋ́ sʋ ndɛ mlɩ bla mbɛɛ, mlɩkʋlɩ Bulu, ɔbɛ́ha mlɩ. Mlɩdunka, mlówun. Mlɩda mʋ klʋnsʋ, obéfinki mʋ́ ha mlɩ. 10Tsufɛ ɔha ánɩ́ ɔtɔkʋlɩ atɔ tenya. Ɔha ánɩ́ otodunka atɔ towun. Ɔha ánɩ́ ɔtɛda klʋnsʋ bʋtefinki ha. 11Ɔsɩ ɔmɔmʋ bʋ ɩnʋ, mʋ bi ɔkʋlɩ mʋ iye a, ɔbɛ́kɩta ɩwɔ wa mʋ ɩbɩtɔ? 12Ntɛ nɩ ɔkʋlɩ mʋ bɔnɔ a, ɔbɛ́kɩta nyankpʋkpie wa mʋ ɩbɩtɔ? 13Mlɩ lakpan abwɛpʋ kʋraa mlɩyin alɩá bʋtɔpʋ atɔ wanklaan ha mlɩ abi. Ntogyi sʋ mlɩ Sɩ amʋʋ ɔbʋ ɔsʋsʋ amʋ mʋ́ mɔ́ɔpʋ Ɔŋɛ Wankɩhɛ ha aha ánɩ́ bʋdɛ mʋ kʋlɩ?”
Yesu Mʋa Beelsebul
(Mateo 12:22-30; Marko 3:20-27)
14Yesu legya ɔŋɛ lalahɛ lɛ oyin ɔkʋá alatɔ omumutɔ. Brɛá ɔŋɛ lalahɛ amʋ lɛdalɩ a, oyin amʋ lɔwa tɔɩ bɩ. Mʋ́ sʋ ɔnɔ lobwie ɔdɔm amʋ. 15Tamɛ amʋ́tɔ akʋ bɛblɩ bɛɛ, “Ɔŋɛ lalahɛ owie Beelsebul tumi ɔdɛpʋgya ɔŋɛ lalahɛ lɛ ahatɔ.”
16Amʋ́tɔ akʋ ɛ bekleá bɔ́sɔ Yesu kɩ. Mʋ́ sʋ bɛbla mʋ bɛɛ, ɔbwɛ osuna pʋsuna ánɩ́ lɛlɛ otsu Bulu wa. 17Tamɛ Yesu lɛbɩ amʋ́ agywɩɩn. Mʋ́ sʋ ɔlɛbla amʋ́ ɔbɛɛ, “Iwie ogyikpa ánɩ́ ɩlaye anyɔ, bʋdɛ aba kɔ tɛdɩda. Woyi oduá mʋ́tɔ atsiapʋ bʋdɛ aba kɔ ɛ tobwie. 18Nɩ Satan iwie ogyikpa labɔɩ anyɔ, bʋdɛ aba kɔ a, mʋ iwiegyi bɛ́dɩda. Tamɛ mlɩdɛblɩ mlɩaa, Beelsebul ɩdatɔ ndɛ ɔŋɛ lalahɛ gya lɛ ahatɔ. 19Nɩ Beelsebul tumi ndɛpʋgya ɔŋɛ lalahɛ lɛ ahatɔ a, mʋmʋ ma tumi mlɩ abi ɛ bʋdɛpʋgya ɔŋɛ lalahɛ lɛ ahatɔ? Mlɩ abi amʋ onuto obégyi mlɩ asʋn. 20Tamɛ ɩnɩá Bulu tumi ndɛpʋgya ɔŋɛ lalahɛ sʋ a, mlɩbɩá Bulu iwiegyi amʋ laba mlɩ wa dodo.
21“Tsufɛ nɩ ɔwʋnlɩnpʋ bʋ akɔtɔ, ɔdɛ mʋ woyi gyo a, mʋ tɔtɔ tamafwɩ. 22Tamɛ nɩ ɔha ánɩ́ ɔbʋ ɔwʋnlɩn dʋn mʋ ɔba begyi mʋsʋ a, ɔtɔswɩɩ mʋ mʋ akɔtɔ amʋʋ mʋ ansɩ dɩn mʋ́sʋ amʋ, ye mʋ atɔá olenya ɛtɔ.
23“Ɔha ánɩ́ omobuo mɩ dɛ mɩ lu. Ɔha ánɩ́ ɔmɛdɛ mɩ tsa akpa aha ba Bulu ɛ dɛ amʋ́ gya tɛɩa mɩ.
Ɔŋɛ Lalahɛ Yinki Ba Ɔhatɔ
(Mateo 12:43-45)
24“Nɩ ɔŋɛ lalahɛ ɩdalɩ ɔhatɔ a, iteyeki ɔsʋlʋkpansʋ dunka otsiakpa, tamɛ ɩtamanya. Ɩnʋ ɩtɛblɩ ánɩ́ ibéyinki yɔ mʋ́ woyi dadatɔ. 25Nɩ ɩsanki yɔ a, itowun ánɩ́ bafɛɩ mʋ́tɔ, la mʋ́tɔ wanklaan. 26Iteyinki yɛkpa mʋ́ aba asienɔá bʋtɔbwɛ lalahɛ dʋn mʋ, bʋtɛba betsia ɩnʋ. Ɩnʋ ɔha amʋ tsiatɔ teyinta dʋn alɩá igyi yaɩ.”
Oyula Onuto
27Brɛá Yesu dɛ asʋn anfɩ blɩ a, ɔtsɩ ɔkʋ bʋ ɔdɔm amʋtɔ. Ɔtsɩ amʋ lotsu ɔmɛ fʋa blɩ ɔbɛɛ, “Bulu layula opuni amʋʋ fɛdɩ mʋ́tɔ pʋ́ nyɔpʋ amʋʋ fɔnyɔpʋ amʋ.”
28Tamɛ Yesu lɛbla mʋ ɔbɛɛ, “Aha ánɩ́ bʋtonu Bulu asʋn, gyi mʋ́sʋ mboun Bulu layula!”
Bodunka Ofula
(Mateo 12:38-42)
29Brɛá ɔdɔm amʋ bʋdemoni tsɩa a, Yesu lɛblɩ ɔbɛɛ, “Ndɛmba-abi lalahɛ, mlɩdɛ osuna dunka amlɩwun, tamɛ mlɩmóowun kʋkʋʋkʋ dʋn Bulu ɔnɔsʋ ɔtɔɩpʋ Yona osuna amʋ. 30Tsufɛ alɩ amʋʋ Yona lɔbwɛ osuna ha Niniwefɔ amʋ a, alɩ mɩ, Nyankpʋsa-Mʋ-Bi anfɩ ɛ nɔ́bwɛ osuna ha ndɛmba-abi nɩ. 31Seba owie tsɩhɛ ɔbɔ́kʋsʋ lɩɩ Bulu asʋn ogyikɛ, ha mlɩ ndɛmba-abi anfɩ ɩpɔn. Tsufɛ olotsu ɔsasɩ ɔma kʋtɔ kein gya ɔkpa ba, bonu Salomo nyansa atosunahɛ. Mlɩkɩ, ɔha ánɩ́ ɔdʋn Salomo lɩɩ nfɩ a. 32Niniwefɔ ɛ bɔ́kʋsʋ lɩɩ Bulu asʋn ogyikɛ amʋ, ha mlɩ ndɛmba-abi anfɩ ɩpɔn. Tsufɛ brɛá Yona lɛda Bulu asʋn ɔkan suna amʋ́ a, bɛdamli klʋntɔ ba Bulu wa. Mlɩkɩ, ɔha ánɩ́ ɔdʋn Yona onuto lɩɩ nfɩ a.
Nyankpʋsa-oyi Ɔkandɩɛ
(Mateo 5:15; 6:22-23)
33“Ɔhaa tamanywɛ ɔkandɩɛ pʋŋain, ntɛ pʋ ɔlɔ bun mʋ́sʋ. Ɔfʋakpa ɔtɔpʋbian, mɛnɩ ɩbɔ́wankɩ ha aha ánɩ́ bɛ́ba woyi amʋtɔ. 34Fʋ ansibi igyi ɔkandɩɛ ha fʋ nyankpʋsa-oyi. Nɩ fʋ ansibi bʋ alɛ a, fʋ nyankpʋsa-oyi amʋ fɛ́ɛ́ bɔ́wankɩ. Tamɛ nɩ fʋ ansibi ɩma alɛ a, fʋ nyankpʋsa-oyi amʋ fɛ́ɛ́ bóklun. 35Mʋ́ sʋ mlɩkɩ ánɩ́ wankɩ onuto bʋ mlɩtɔ, megyi oklun. 36Nɩ fʋ nyankpʋsa-oyi amʋ lɔwankɩ, oklun ɩma ɔtɩnɛtɩnɛ a, fʋ ɩwɩ fɛ́ɛ́ bɔ́wankɩ fɛ alɩá ɔkandɩɛ tɔwankɩ wʋlɩ fʋsʋ.”
Mose Mbla Asunapʋ Pʋ́ Farisifɔ Tsiatɔ
(Mateo 23:1-36; Marko 12:38-40)
37Brɛá Yesu lɔtɔɩ ta a, Farisiyin ɔkʋ lɛtɩ mʋ atɔ ogyikpa mʋ woyitɔ. Mʋ́ sʋ Yesu lɔyɔ yetsia ɔpʋnʋ amʋ asɩ. 38Ɩlɔwa Farisiyin amʋ wanwan ánɩ́ Yesu mɔfwɩ ɩbɩ pʋgyʋra ɩwɩ asa ɔdɛ atɔ amʋ gyi. 39Ɩnɩ sʋ Yesu lɛbla mʋ ɔbɛɛ, “Mlɩ Farisifɔ mlɩtɔfwɩ mlɩ nwɛ pʋ́ mlɩ ablanwɛn wanklaan, tamɛ ɔnsɩpɛ mʋ́a owuntɔlɩn sɔɔn labʋla mlɩ. 40Mlɩ aha mimlahɛ, megyi mʋ́tɔ mʋ́a mʋ́ ɔma fɛ́ɛ́ Bulu lɔbwɛ? 41Mlɩpʋ mlɩ atonyahɛ amʋ ha ahianfɔ, togyitɔ ɩwɩ bɛ́tɩn ha mlɩ.
42“Farisifɔ, mlɩgyɔwɩ nɩ! Mlɩteye mlɩ ɔtsʋtsʋ pʋ́ kpantankplama aná fɛ́ɛ́tɔ idu, pʋ idusɩ amʋ ha Bulu. Tamɛ mlɩmɛdɛ Bulu mbla amʋʋ ɩhɩɛ dehian, igyi asʋngyi ɔnɔkwalɩsʋ pʋ́ Bulu-dwɛ amʋsʋ gyi. Mʋ́dehian nɩ, tamɛ mlɩmákina iyetɔ dusɩ amʋ ɛ ha.
43“Farisifɔ, mlɩgyɔwɩ nɩ! Mlɩtekle otsiakpa yile tsia Yudafɔ ofiakpa. Mlɩtekle mlɩaa, aha bʋbun ha mlɩ itsia dɩnsʋ. 44Mlɩgyɔwɩ nɩ! Mlɩlabwɛ fɛ ntsan ánɩ́ bʋmɛhɩɛ mʋ́ nsʋ#11:44 Yudafɔ amandɩɛ ɔnɔ a, nɩ fɛtsa ntsansʋ a, ifin lada fʋ. Mʋ́ sʋ bʋtɛkpa mʋ́ afa fututu, pʋhɩɛ mʋ́ nsʋ., aha bʋtɔtsʋn mʋ́sʋ, bʋmeyin ánɩ́ ntsan igyi.”
45Mose mbla asunapʋ amʋtɔ ɔkʋlɛ lɛbla Yesu ɔbɛɛ, “Osunapʋ, nɩ fɛblɩ alɩ a, fasia anɩ ɛ o.”
46Yesu lɛblɩ ɔbɛɛ, “Mose mbla asunapʋ, mlɩ ɛ mlɩgyɔwɩ nɩ! Tsufɛ mlɩtɔpʋ atɔ dwindwin sʋra aha, tamɛ mlɩtamapʋ osrebi ɔkʋlɛ kʋraa tsa amʋ́ sʋra. 47Mlɩgyɔwɩ nɩ! Tsufɛ mlɩtɔpwɛ Bulu ɔnɔsʋ atɔɩpʋ amʋʋ mlɩ anain bɔmɔ amʋ ntsan wanklaan. 48Ɩnɩ desuna ánɩ́ mlɩlatsula dɩnka mlɩ anain bwɛhɛ amʋsʋ nɩ. Tsufɛ mlɩ anain bɔmɔ amʋ́, mlɩ ɛ mlɩlapwɛ amʋ́ ntsan. 49Mʋ́ sʋ Bulu lɔpʋ mʋ nyansa blɩ ɔbɛɛ, ‘Nɔ́wa mɩ ɔnɔsʋ atɔɩpʋ pʋ́ mɩ sumbi ayɔpʋ amʋ́tɔ. Bɔ́mɔ akʋ, dɩnka akʋ ɛsʋ.> 50Bulu ɔbɛ́fɩtɛ mlɩ ndɛmba-abi anfɩ mʋ ɔnɔsʋ atɔɩpʋ amʋ obugya amʋʋ ɩlɔwʋlɩ asɩ tsu brɛá ɔyɩ lɛlɩn ɔpá amʋ. 51Ɔbɛ́fɩtɛ tsu Habel obugyasʋ alɩɩ bɔfʋn Sakaria klɛsʋ. Mʋ bɔmɔ afɔdɩɛ-ɔswɩ mʋ́a Bulu ɔtswɛkpa amʋ nsɩnɛ nɩ. Ee! Ndɛ mlɩ bla mbɛɛ, Bulu ɔbɛ́fɩtɛ mʋ́ tsu mlɩ ndɛmba-abi anfɩ wa.
52“Mose mbla asunapʋ, mlɩgyɔwɩ nɩ! Tsufɛ mlɩdɛ asʋnbɩ saafɩ amʋ. Mlɩmefinki wie, mlɩmɛha aha ɔkpa ɛ abʋwie.”
53Brɛá Yesu lɛnatɩ ɩnʋ ɔyɔ a, Mose mbla asunapʋ pʋ́ Farisifɔ amʋ bɔpʋ mʋ ɩwɩ ɔblɔ, yɔ bʋdɛ mʋ asʋn tsɔtsɔɔtsɔ fɩtɛ pʋfɩnɩ mʋ yibi, 54kɩ bɛɛ bénya mʋ ɔnɔtɔ asʋankʋ pʋkɩta mʋ.
Currently Selected:
Luka 11: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation