Yohane 6
6
Aha Mpɩm-nu Atogyihɛ Ha
(Mateo 14:13-21; Marko 6:30-44; Luka 9:10-17)
1Ɩnɩ ɔma a, Yesu mʋa mʋ akasɩpʋ bɛfa Galilea ɔpʋá bʋtɛtɩ mʋ́ Tiberia amʋ yɔ mʋ́ ɔbɩn. 2Ɔdɔm betsia buo mʋ, tsufɛ ɔdɛ alɔpʋ tsa wanwansʋ. 3Mʋa akasɩpʋ bɔdʋ yɔ okuku kʋsʋ, yetsia asɩ ɩnʋ. 4(Alɩ brɛ amʋtɔ a, Yudafɔ nkɛá bɔ́pʋgyi Israelfɔsʋ Katsʋn Nkɛ amʋ ɩlafʋn ta.) 5Ɩnʋ Yesu lotsu ansɩ fʋa wun ánɩ́ ɔdɔm kpɔnkpɔɔnkpɔntɩ bɛba mʋ wa. Mʋʋ ɔlɛfɩtɛ Filipo ɔbɛɛ, “Nkʋnʋ abénya atogyihɛ hɔ ha aha anfɩ bégyi?” 6(Yesu lɛblɩ asʋn anfɩ pʋsɔ Filipo kɩ, tsufɛ oyin tɔá ɔbɔ́bwɛ dodo.)
7Filipo lɛlɛ mʋ́ ɔnɔ ɔbɛɛ, “Nɩ apʋ tsra kwe ɩkɔka hɔ atogyihɛ kʋraa a, ɩmɔ́ɔfʋn ánɩ́ okugyiɔkʋ obénya kpalobi gyi!”
8Simon Petro mʋ pio Andrea, ogyi akasɩpʋ amʋtɔ ɔkʋlɛ lɛbla Yesu ɔbɛɛ, 9“Oyimbi ɔkʋ dɛ bodobodo apin putuputu anu pʋ́ ntsutso iye bwahɛ anyɔ. Tamɛ ntɔ ɩnɩ bɔ́bwɛ aha tsɔtsɔɔtsɔ anfɩ?”
10Yesu lɛbla mʋ akasɩpʋ amʋ ɔbɛɛ, “Mlɩha amʋ́ abʋtsiatsia asɩ.” Aha amʋ fɛ́ɛ́ betsia ɩfasʋ. Ayin ánɩ́ bʋbʋ amʋ́tɔ bɔ́bwɛ fɛ mpɩm-nu (5,000). 11Mʋʋ Yesu lɔhɔ bodobodo amʋ, da Bulu ɩpan, ɔlɛha beye mʋ́ ha aha amʋʋ bʋtsie ɩnʋ amʋ. Alɩ kɛn ɔlɔbwɛ ntsabi bwahɛ amʋ ɛ nɩ. Amʋ́tɔ okugyiɔkʋ lenya alɩá odekle. 12Begyi mwɛ sian. Yesu lɛbla akasɩpʋ amʋ ɔbɛɛ, “Mlɩkʋla sianhɛ amʋ, mɛnɩ ɩmɔ́ɔbwɛ atɔ yintahɛ.” 13Lɛlɛ, bɔtɔsɩ sianhɛ amʋʋ benya tsu bodobodo anu amʋtɔ amʋ. Ɩlɔbʋla alakpa duanyɔ kɛkɛ.
14Aha amʋ bowun osuna anfɩ Yesu labwɛ anfɩ. Mʋ́ sʋ bɛblɩ bɛɛ, “Lɛlɛ, oyin anfɩ gyi Bulu ɔnɔsʋ ɔtɔɩpʋ amʋʋ bɔwanlɩn mʋ ɩwɩ asʋn wa Bulu asʋntɔ bɛɛ, ɔbɛ́ba ɔyɩtɔ amʋ nɩ.” 15Yesu lowun ánɩ́ aha amʋ babwɛ agywɩɩn bɛɛ, bɛ́ba bɛkɩta mʋ ɔwʋnlɩntɔ yaɩ mʋ iwie. Mʋ́ sʋ mʋ nkʋlɛ ɔlɛladʋ yɔ nkpa si amʋ́.
Ɔpʋsʋ Natɩ
(Mateo 14:22-33; Marko 6:45-52)
16Brɛá owi lɔpɔn a, Yesu akasɩpʋ bɛkplɩ ba Galilea ɔpʋ ɔnɔ. 17Owi lata, tamɛ Yesu mɔkʋyinki bɔtʋ amʋ́. Mʋ́ sʋ bɔdʋ wie ɔklʋntɔ, bʋdɛfa bɔyɔ Kapernaum. 18Afu kpɔnkpɔntɩ kʋ lɛba ɩdɛtsʋn, ɔpʋ amʋ lɔwa dabɩ. 19Alɩ brɛ amʋtɔ a, akasɩpʋ amʋ bapla ɔklʋn amʋ yɔ fɛ maɩlɩ asa ntɛ ana. Ɩnʋ bowun ánɩ́ Yesu na ɔpʋ amʋsʋ ɔba amʋ́ wa. Mʋ́ sʋ ifu lɛkɩta amʋ́. 20Tamɛ Yesu lɛbla amʋ́ ɔbɛɛ, “Mɩ nɩ, mlɩmánya ifu!” 21Ɩnʋ botsu mʋ wa ɔklʋn amʋtɔ ansigyisʋ. Ilotsutsua ɩwankɩ amʋ́ a, ɔklʋn amʋ ɩlawie otsubunɔ, ɔtɩnɛ amʋʋ bɔyɔ amʋ.
Yesu Dunka
22Ɔyɩkɛhɛ a, ɔdɔm amʋʋ besi bʋbʋ ɔpʋ amʋ ɔbɩn ɩnʋ amʋ bowun ánɩ́ ɔklʋn kʋkʋ ɩtra mɛlɩɩ ɩnʋ. Mʋ́a tɛkɩ ɩlɩɩ ɩnʋtɔ akasɩpʋ amʋ bowie natɩ nɩ. Bowun ánɩ́ Yesu mowie mʋ́tɔ asa bɛnatɩ. 23Mʋ́ ɔma a, nklʋn akʋ lotsu Tiberia wulutɔ bɛlɩɩ manta ɔtɩnɛ amʋʋ begyi bodobodo amʋʋ Yesu lɛda Bulu ɩpan pʋha amʋ́ amʋ. 24Ɔdɔm amʋ bowun ánɩ́ Yesu lanatɩ ɩnʋ, mʋ akasɩpʋ amʋ ɛ bʋma ɩnʋ. Mʋ́ sʋ bɔdʋ wie nklʋn amʋtɔ yɔ Kapernaum, bʋdɛ Yesu dunka.
Bodobodoá Ɩtɛha Nkpa
25Brɛá ɔdɔm amʋ boyowun Yesu ntsu ɔbɩn ɩnʋ a, bɛfɩtɛ mʋ bɛɛ, “Osunapʋ, brɛ mɔmʋ fobowie nfɩ?”
26Yesu lɛbla amʋ́ ɔbɛɛ, “Ɔnɔkwalɩ ndɛ mlɩ bla. Megyi osuna amʋʋ ndɛbwɛ mlɩdewun amʋ sʋ mlɩgya mɩ ɔkpa. Mboun bodobodo amʋʋ nɛha mlɩ, mlɩlegyi mwɛ amʋ sʋ. 27Mlɩmáwun ipian atogyihɛá iteyinta sʋ. Mboun mlɩwun ipian mʋ́á ibétsia yɔ, ɩbɛ́ha nkpa ánɩ́ ɩtamata, ánɩ́ mɩ, Nyankpʋsa-Mʋ-Bi anfɩ nɛ́ha mlɩ sʋ. Tsufɛ mɩ, mɩ Sɩ Bulu lahɩɛ nsʋ ánɩ́ mbʋ ɔkpa ha mʋ́.”
28Bɛfɩtɛ Yesu bɛɛ, “Gyʋma mɔmʋ abwɛ isuna ánɩ́ anɩdɛ tɔá Bulu tekle bwɛ?”
29Yesu lɛlɛ mʋ́ ɔnɔ ɔbɛɛ, “Tɔá Bulu dekle ɔbɛɛ mlɩbwɛ gyi, mlɩhɔ mɩ anfɩ ɔlɔwa sɩsɩ anfɩ gyi.”
30Ɩnʋ bɛfɩtɛ Yesu bɛɛ, “Osuna mɔmʋ fɔ́bwɛ abówun, mɛnɩ abɔ́hɔ fʋ gyi? Ntɔ fɔ́bwɛ? 31Anɩ anain begyi mana ɔsʋlʋkpan amʋsʋ. Bɔwanlɩn mʋ́ wa Bulu asʋn amʋtɔ bɛɛ, ‘Mose lɛha amʋ́ atɔá ilotsu ɔsʋsʋ ba begyi.> ”
32Mʋʋ Yesu lɛbla amʋ́ ɔbɛɛ, “Ɔnɔkwalɩ ndɛ mlɩ bla. Megyi Mose lɛha mlɩ atogyihɛ amʋ tsu ɔsʋsʋ. Mɩ Sɩ lɛha mlɩ bodobodo onutonuto amʋ tsu ɔsʋsʋ. 33Tsufɛ bodobodoá Bulu tɛha gyi mɩ anfɩ natsu ɔsʋsʋ ba, nɛba bɛha ɔyɩtɔ aha nkpa anfɩ.”
34Aha amʋ bɛbla mʋ bɛɛ, “Owie, tsia ha anɩ bodobodo anfɩ bregyibrɛ, tsu sei pʋya.”
35Yesu lɛbla amʋ́ ɔbɛɛ, “Mɩgyi bodobodo amʋʋ ɩtɛha nkpa amʋ nɩ. Akʋn mɛ́ɛkɩta ɔha ánɩ́ ɔlɛba mɩ wa ɛkɛkɛɛkɛ. Ɔmɛwʋlɩ mɛ́ɛkɩta ɔha ánɩ́ ɔlɔhɔ mɩ gyi ɛ ɛkɛkɛɛkɛ. 36Fɛ alɩá nɛbla mlɩ a, mlɩlawun mɩ, tamɛ mlɩmɔkʋhɔ mɩ gyi bɔfʋn sei. 37Ɔhagyiɔha ánɩ́ Ɔsɩ amʋ lɛha mɩ ɔbɛ́ba mɩ wa. Mméegya ɔhagyiɔha ánɩ́ ɔlɛba mɩ wa. 38Tsufɛ mmotsu ɔsʋsʋ ba mbɛɛ, nɛba bɔbwɛ tɔá ndekle. Mboun tɔá ɔha amʋʋ ɔlɔwa mɩ sɩsɩ amʋ dekle ɔbwɛkpa nɛba. 39Tɔá ɔha amʋʋ ɔlɔwa mɩ sɩsɩ amʋ dekle gyi, aha amʋʋ ɔlɔpʋha mɩ amʋtɔ ɔkʋkʋ madalɩ mɩ ɩbɩ. Mboun nkʋsʋa amʋ́ fɛ́ɛ́ tsu afulitɔ ɛkɛ trahɛ amʋ. 40Tɔá mɩ Sɩ amʋ tekle gyi, ɔhagyiɔha ánɩ́ olowun mɩ, mʋ Bi anfɩ, hɔ mɩ gyi obénya nkpa ánɩ́ ɩtamata. Nɔ́kʋsʋa mʋ tsu afulitɔ ɛkɛ trahɛ amʋ.”
41-42Ɩnɩá Yesu lɛblɩ ɔbɛɛ, “Mɩgyi bodobodo amʋʋ notsu ɔsʋsʋ ba amʋ nɩ” sʋ a, Yudafɔ amʋ bɔwa mʋ wunti bɩ. Bɛɛ, “Megyi Yosef mʋ bi Yesu amʋ nɩ? Anɩmeyin mʋ sɩ mʋa mʋ yin? Ɔkpa mɔmʋ sʋ ɔdɛblɩ ɔbɛɛ, ‘Ɔsʋsʋ notsu nɛba?> ”
43Yesu lɛbla amʋ́ ɔbɛɛ, “Mlɩsi wunti mlɩ wʋlɛwʋlɛ. 44Ɔhaa mɛ́ɛtalɩ ba mɩ wa, nkɛtɩ mɩ Sɩ amʋʋ ɔlɔwa mɩ sɩsɩ amʋ lakpa mʋ ba mɩ. Mɩ ɛ nɔ́kʋsʋa mʋ tsu afulitɔ ɛkɛ trahɛ amʋ. 45Bulu ɔnɔsʋ atɔɩpʋ amʋtɔ ɔkʋ lɔwanlɩn tswɩ ɔbɛɛ, ‘Bulu obósuna aha fɛ́ɛ́ atɔ.> Ɔhagyiɔha ánɩ́ alanu mɩ Sɩ asʋn, kasɩ mʋ́ tsu mʋ wa tɛba mɩ wa. 46Ɔhaa mɔkʋwun Ɔsɩ amʋ kɩ. Mɩ anfɩ notsu mʋ wa ba anfɩ nkʋlɛ lawun mʋ kɩ. 47Ɔnɔkwalɩ ndɛ mlɩ bla. Ɔhagyiɔha ánɩ́ ɔlɔhɔ mɩ gyi bʋ nkpa ánɩ́ ɩtamata. 48Mɩgyi bodobodoá ɩtɛha nkpa nɩ. 49Ɩnɩá mlɩ anain begyi mana ɔsʋlʋkpansʋ o a, amʋ́ fɛ́ɛ́ bowu. 50Tamɛ bodobodo anfɩ gyi mʋ́á ɩlatsu ɔsʋsʋ ba, mɛnɩ ɔhagyiɔha ánɩ́ obégyi mʋ́ móowu nɩ. 51Mɩgyi bodobodo amʋʋ ntɛha nkpa, natsu ɔsʋsʋ ba amʋ nɩ. Ɔhagyiɔha ánɩ́ ogyi bodobodo anfɩ obétsia nkpa, omóowu ɛkɛkɛɛkɛ. Mɩ ɔyʋlʋ gyi bodobodo amʋ. Mʋ́ nési ha, mɛnɩ ɔyɩtɔfɔ bénya nkpa nɩ.”
52Ɩnʋ Yudafɔ amʋ benya asʋn anfɩ Yesu lablɩ anfɩ ɩwɩ ɔblɔ. Amʋ́ wʋlɛwʋlɛ begyi aba nwɛn bɛɛ, “Nkalɩ oyin anfɩ ɔbɛ́talɩ pʋ mʋ ɔyʋlʋ ha anɩ ɔbɛɛ, agyi?”
53Yesu lɛbla amʋ́ ɔbɛɛ, “Ɔnɔkwalɩ ndɛ mlɩ bla. Nɩ mlɩmegyi mɩ, Nyankpʋsa-Mʋ-Bi anfɩ ɔyʋlʋ, nun mɩ obugya a, mlɩmá nkpa ánɩ́ ɩtamata kʋkʋʋkʋ mlɩtɔ. 54Ɔha ánɩ́ olegyi mɩ ɔyʋlʋ, nun mɩ obugya bʋ nkpa ánɩ́ ɩtamata. Nɔ́kʋsʋa mʋ tsu afulitɔ ɛkɛ trahɛ amʋ. 55Tsufɛ mɩ ɔyʋlʋ igyi atogyihɛ onuto, mɩ obugya ɛ igyi atonunhɛ onuto. 56Ɔha ánɩ́ ogyi mɩ ɔyʋlʋ, nun mɩ obugya tsie mɩtɔ, mɩ ɛ ntsie mʋtɔ. 57Mɩ Sɩ Ɔkɩankpapʋ amʋ lɔwa mɩ sɩsɩ. Mʋ sʋ mbʋ nkpa. Mʋ́ sʋ fʋá fegyi mɩ a, mɩ sʋ fʋ ɛ fʋbʋ nkpa. 58Mɩgyi bodobodo onutoá notsu ɔsʋsʋ ba nɩ. Mlɩ anain begyi mana, tamɛ bowu. Ɔha ánɩ́ ogyi bodobodo anfɩ mʋ́ obétsia nkpa ánɩ́ ɩtamata.”
59Yesu lɛblɩ asʋn anfɩ brɛá ɔdɛ atɔ suna Kapernaum, Yudafɔ ofiakpa.
Nkpa Ánɩ́ Ɩtamata Asʋn
60Yesu abuopʋ tsɔtsɔɔtsɔ amʋtɔ akʋ bonu asʋn anfɩ a, bɛblɩ bɛɛ, “Atosunahɛ anfɩ mʋ́ bʋ ɔnlɩn o! Ma ɔbɛ́talɩ hɔ mʋ́?”
61Yesu lowun ánɩ́ mʋ abuopʋ amʋtɔ akʋ bʋdɛwunti ánɩ́ alablɩ alɩ sʋ a, ɔlɛfɩtɛ amʋ́ ɔbɛɛ, “Asʋn anfɩ lahan mlɩ? 62Mʋmʋ nɩ mlowun Nyankpʋsa-Mʋ-Bi amʋ ɔyɔ ɔtɩnɛá olotsu ba mɛ, nkalɩ mlɔ́bwɛ? 63Bulu Ɔŋɛ amʋ tɛha nkpa. Nyankpʋsa ɔwʋnlɩn mʋ́ a, kpaalɩ igyi. Asʋn anfɩ ndɛ mlɩ bla anfɩ itsu Ɔŋɛ amʋʋ ɔtɛha nkpa amʋ wa, 64tamɛ mlɩtɔ akʋ bʋmɔhɔ mʋ gyi.” Yesu lowun amʋ́á bʋmɔhɔ mʋ gyi pʋ́ ɔha ánɩ́ ɔbɛ́lɛ mʋ ha yaɩ dodoodo. 65Ɔlɛtra bla amʋ́ ɔbɛɛ, “Ɩnɩ sʋ nɛbla mlɩ mbɛɛ, ɔhaa mɛ́ɛtalɩ ba mɩ wa, nkɛtɩ mɩ Sɩ lakpa mʋ ba mɩ” nɩ.
66Tsu ɛkɛ amʋ a, Yesu abuopʋ amʋ tsɔtsɔɔtsɔ beyinki mʋ ɔma, bʋmɛtra buo mʋ. 67Mʋ́ sʋ Yesu lɛfɩtɛ mʋ akasɩpʋ duanyɔ amʋ ɔbɛɛ, “Mlɩ ɛ mlɩdekleá mléyinki mɩ ɔma loo?”
68Simon Petro lɛbla mʋ ɔbɛɛ, “Owie, ma wa abɔ́yɔ? Fʋ wa asʋn ánɩ́ ɩtɛha nkpa ánɩ́ ɩtamata bʋ. 69Anɩlahogyi, anɩlabɩ ánɩ́ fʋgyi Ɔha Wankɩhɛ amʋʋ fotsu Bulu wa amʋ nɩ.”
70Ɩnʋ Yesu lɛbla amʋ́ ɔbɛɛ, “Mlɩ aha duanyɔ nɛlɛ, tamɛ mlɩtɔ ɔkʋ gyi ɔbʋnsam!” 71(Simon Iskariot mʋ bi Yuda ɔdɛ a. Tsufɛ ogyi akasɩpʋ duanyɔ amʋtɔ ɔkʋlɛ. Mʋ ɔbɛ́lɛ mʋ ha nɩ.)
Currently Selected:
Yohane 6: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation