Yohane 18
18
Yesu Kɩta
(Mateo 26:47-56; Marko 14:43-50; Luka 22:47-53)
1Yesu lɔbɔ mpaɩ anfɩ ta a, mʋa mʋ akasɩpʋ amʋ bɛnatɩ yɔtsʋn Kidron tsonkolitɔ wie ndobi kʋtɔ. 2Yuda amʋʋ ɔlɛlɛ Yesu ha amʋ ɛ yin ndobi amʋtɔ, tsufɛ Yesu mʋa mʋ akasɩpʋ bʋtetsia yefia ɩnʋ. 3Mʋ́ sʋ Yuda lɛkpa Romafɔ ɩsa akɔpʋ pʋ́ Bulu ɔtswɛkpa agyopʋ akʋá Bulu igyi ahapʋ dɛhɛn pʋ́ Farisifɔ bɔwa, bɔyɔ ɩnʋ. Bʋdɛ mbia, nkandɩɛ pʋ́ akɔtɔ. 4Ɩnɩá Yesu yin tɔá ɩba mʋsʋ sʋ a, ɔlɛdalɩ fia amʋ́, fɩtɛ amʋ́ ɔbɛɛ, “Ma mlɩdedunka?”
5Bɛlɛ mʋ́ ɔnɔ bɛɛ, “Yesu Nasaretyin amʋ.”
Yesu lɛbla amʋ́ ɔbɛɛ, “Mɩ nɩ.”
(Yuda amʋʋ ɔdɛ mʋ lɛ ha amʋ ɛ lɩɩ amʋ́ wa ɩnʋ.) 6Brɛá Yesu lɛbla amʋ́ ɔbɛɛ, “Mɩ nɩ!” a, bɛsanki yɛdɩda lala kpla. 7Yesu lɛlafɩtɛ amʋ́ ɔbɛɛ, “Mbɛɛ, ma mlɩdedunka?”
Bɛbla mʋ bɛɛ, “Yesu Nasaretyin amʋ.”
8Yesu lɛbla amʋ́ ɔbɛɛ, “Nakʋ bla mlɩ mbɛɛ, mɩ nɩ. Mʋ́ sʋ nɩ mɩ mlɩdedunka mʋ́ a, mlɩha aha anfɩ abʋnatɩ.” 9(Ɔlɛbla amʋ́ alɩ, mɛnɩ asʋn amʋʋ ɔlɛblɩ amʋ ɩbɛ́ba mʋ́tɔ. Ɔbɛɛ, “Aha amʋʋ fɔpʋha mɩ amʋtɔ ɔkʋkʋ mɔfwɩ.”)
10Ɩnʋ a, Simon Petro dɛ ɔdayi ɩya anyɔ. Ɔlɛbɩtɩ mʋ́ lɛ, kpa Bulu igyi ɔhapʋ dɛhɛn osumpʋ gyɔpɩ ɩsʋ. Osumpʋ amʋ ɩda gyi Malkus. 11Yesu lɛbla Petro ɔbɛɛ, “Sankia fʋ ɔdayi wa mʋ́ ɔflɛtɔ! Imehian ánɩ́ nówun ɩwɩɔsɩn ánɩ́ mɩ Sɩ laha mɩ ɔbɛɛ nwun loo?”
Yesu Kpa Ya Hana
(Mateo 26:57-58; Marko 14:53-54; Luka 22:54)
12Ɩnʋ ɩsa akɔpʋ amʋ, amʋ́ ɔhandɛ pʋ́ Bulu ɔtswɛkpa agyopʋ amʋ bɛkɩta Yesu, klɩ mʋ ɩbɩ. 13Begyankpa kpa mʋ ya Kaiafa mʋ sia Hana. Kaiafa gyi Bulu igyi ɔhapʋ dɛhɛn ofi amʋtɔ nɩ. 14Mʋlɛbla Yudafɔ ahandɛ amʋ ɔbɛɛ, ɩbʋ alɛá ɔbakʋlɛ obówu aha fɛ́ɛ́ nwunsʋ nɩ.
Petro Lekina Yesu
(Mateo 26:69-70; Marko 14:66-68; Luka 22:55-57)
15Simon Petro mʋa ɔkasɩpʋ bamba bobuo Yesu. Bulu igyi ɔhapʋ dɛhɛn amʋ yin ɔkasɩpʋ bamba anfɩ wanklaan. Mʋ́ sʋ olobuo Yesu bitiwie Bulu igyi ɔhapʋ dɛhɛn amʋ woyitɔ. 16Tamɛ Petro mʋ́ lesi ɔlɩɩ woyi amʋ ɔnɔ. Ɔkasɩpʋ bamba anfɩ oyin Bulu igyi ɔhapʋ dɛhɛn anfɩ lɛdalɩ yɛbla otsibi ɔkʋá ɔdɛ woyi amʋ ɔnɔ gyo, ɔlɛkpa Petro ba woyi amʋtɔ. 17Otsibi amʋ lɛfɩtɛ Petro ɔbɛɛ, “Megyi oyin amʋ akasɩpʋ amʋtɔ ɔkʋ fʋgyi?”
Petro lɛlɛ mʋ́ ɔnɔ ɔbɛɛ, “Ɛkɛkɛɛkɛ. Mma amʋ́tɔ.”
18Atsalɩ bʋ ɩnʋ. Mʋ́ sʋ asumpʋ pʋ́ agyopʋ amʋ bɔdʋda ogya, bʋlɩɩ mʋ́ asɩ. Petro ɛ lɛyɛlɩɩ amʋ́ wa, ɔdɛ ogya amʋ nun.
Bulu Igyi Ɔhapʋ Dɛhɛn Lɛfɩtɛ Yesu Asʋn
(Mateo 26:59-66; Marko 14:55-64; Luka 22:66-71)
19Bulu igyi ɔhapʋ dɛhɛn amʋ lɛfɩtɛ Yesu asʋn, tsu mʋ akasɩpʋ pʋ́ mʋ́ atosunahɛ ɩwɩ. 20Yesu lɛlɛ mʋ́ ɔnɔ ɔbɛɛ, “Aha ansɩtɔ nɛlɩɩ blɩ mɩ asʋn fɛ́ɛ́. Netsia suna atɔ Yudafɔ ofiakpa pʋ́ Bulu ɔtswɛkpa, ɔtɩnɛá aha fɛ́ɛ́ bʋtefia. Mmɛblɩ asʋansʋ ŋaintɔ. 21Ntogyi sʋ fʋdɛ mɩ asʋn anfɩ fɩtɛ. Fɩtɛ aha ánɩ́ bonu asʋn ánɩ́ nɛblɩ. Amʋ́yin asʋn ánɩ́ nɛblɩ.”
22Brɛá Yesu lɛblɩ asʋn anfɩ a, ɩnʋ agyopʋ amʋtɔ ɔkʋlɛá ɔlɩɩ manta mʋ lɛda mʋ ɩsʋtɔ, fɩtɛ mʋ ɔbɛɛ, “Alɩ fɛ́lɛ Bulu igyi ɔhapʋ dɛhɛn asʋn ɔnɔ nɩ?”
23Yesu lɛbla mʋ ɔbɛɛ, “Nɩ nablɩ asʋkpan a, lɛ mʋ́ blɩ ɔhagyiɔha onu. Tamɛ nɩ ɔnɔkwalɩ nablɩ a, ntogyi sʋ fʋdɛ mɩ da?”
24Yesu tra ɔda ɔfɛtɔ, ɔhandɛ Hana lɔpʋ mʋ sɩsɩ Bulu igyi ɔhapʋ dɛhɛn Kaiafa.
Petro Lɛtra Kina Yesu
(Mateo 26:71-75; Marko 14:69-72; Luka 22:58-62)
25Simon Petro tra ɔlɩɩ ogya amʋ asɩ, ɔkʋ lɛfɩtɛ mʋ ɔbɛɛ, “Megyi oyin anfɩ akasɩpʋ amʋtɔ ɔkʋlɛ fʋgyi?”
Petro lɔswɩɩ ɔbɛɛ, “Ɛkɛkɛɛkɛ. Mma amʋ́tɔ!”
26Bulu igyi ɔhapʋ dɛhɛn amʋ osumpʋ ɔkʋ, ogyi ɔha amʋʋ Petro lɛkpa mʋ ɩsʋ kʋlɛ amʋ mʋ pio lɛfɩtɛ Petro ɔbɛɛ, “Megyi fʋa mʋnyɔ nowun ndobi amʋtɔ nɩ?”
27Petro lɛtra swɩɩ pʋ ɩbɩ wa ogya. Ɩnʋnʋ batɛ lɔbɔn.
Yesu Kpa Ya Pilato
(Mateo 27:1-2, 11-14; Marko 15:1-5; Luka 23:1-5)
28Ɔyɩkɛhɛ bakɛ-bakɛ a, bɛkpa Yesu tsu Kaiafa woyitɔ ya Roma ɔhandɛá ɔdɛ Yudea ɔmásʋ gyi woyitɔ. Yudafɔ ahandɛ amʋ bʋmedekleá bɔ́pʋ ifin da ɩwɩ. Mʋ́ sʋ bʋmebitiwie woyitɔ ɩnʋ. Tsufɛ bʋdekleá bɛ́kɩ ánɩ́ amʋ́ ɩwɩ lɛtɩn, mɛnɩ bɛ́talɩ gyi Israelfɔsʋ Katsʋn Nkɛ amʋ.#18:28 Nɩ fowie ɔha ánɩ́ omegyi Yudayin woyitɔ a, ifin lada fʋ. 29Mʋ́ alɩ sʋ Pilato lɛdalɩ ba kpankpa bɛfɩtɛ amʋ́ ɔbɛɛ, “Amansʋ mlɩbʋ blɩ tsu oyin anfɩ ɩwɩ?”
30Bɛbla mʋ bɛɛ, “Nɩ ɔha anfɩ mɔkʋbwɛ lakpan a, tɛkɩ anɩmɛkpa mʋ ba fʋ.”
31Pilato lɛbla amʋ́ ɔbɛɛ, “Mʋmʋ mlɩkpa mʋ ya, amlɩyegyi mʋ asʋn mlɩ mbla ɔnɔ.”
Yudafɔ ahandɛ amʋ bɛlɛ mʋ́ ɔnɔ bɛɛ, “Anɩmá ɔkpa mɔ ɔha.” 32(Asʋn anfɩ lɛba mʋ́tɔ, mɛnɩ asʋn amʋʋ Yesu lɛblɩ tsu mʋ lowuá obówu ɩwɩ amʋ ɩbɛ́ba mʋ́tɔ.)
33Ɩnʋ Pilato leyinki wie woyitɔ. Mʋʋ ɔlɛtɩ Yesu, fɩtɛ mʋ ɔbɛɛ, “Fʋgyi Yudafɔ owie amʋ nɩ?”
34Yesu lɛlɛ mʋ́ ɔnɔ ɔbɛɛ, “Fʋ onuto asʋn fɩtɛhɛ igyi, ntɛ akʋ labla fʋ mɩ ɩwɩ asʋn?”
35Pilato lɛlɛ mʋ́ ɔnɔ ɔbɛɛ, “Yudayin ngyi? Fʋ onuto aha pʋ́ Bulu igyi ahapʋ dɛhɛn lɛkpa fʋ ba mɩ. Ntɔ fabwɛ?”
36Yesu lɛbla mʋ ɔbɛɛ, “Megyi ɔyɩ anfɩtɔ ndɛ iwie gyi. Nɩ ɔyɩ anfɩtɔ a, tɛkɩ mɩ abuopʋ bɔ́kɔ hɔ mɩ, bʋmɛ́ɛha bʋmɔ́ɔpʋ mɩ wa Yudafɔ ahandɛ ɩbɩtɔ. Tamɛ megyi ɔyɩ anfɩtɔ ndɛ iwie gyi!”
37Pilato lɛfɩtɛ mʋ ɔbɛɛ, “Mʋmʋ yɛɛ owie fʋgyi a?”
Yesu lɛlɛ mʋ́ ɔnɔ ɔbɛɛ, “Ɔnɔkwalɩ fablɩ fɛɛ, Owie ngyi. Mɩ a, bɔkwɩɩ mɩ nɛba ɔyɩ anfɩtɔá mba ambegyi ɔnɔkwalɩ amʋ ɩwɩ adansɩɛ. Ɔhagyiɔha ánɩ́ ogyi Ɔnɔkwalɩ amʋ klɛ tɛyaa asʋ nu mɩ ɔmɛ.”
38Pilato lɛfɩtɛ mʋ ɔbɛɛ, “Ntɔ gyi ɔnɔkwalɩ amʋ?”
Pilato Ɔkpaha Ánɩ́ Bʋmɔ Yesu
(Mateo 27:15-31; Marko 15:6-20; Luka 23:13-25)
Pilato lɛblɩ asʋn anfɩ ta a, ɔlɛtra dalɩ yɔ Yudafɔ amʋ wa woyi-ɔnɔ ɩnʋ. Ɔlɛbla amʋ́ ɔbɛɛ, “Mmɔkʋwun lalahɛ kʋkʋʋkʋá nɔ́pʋha oyin anfɩ ɩpɔn. 39Tamɛ mlɩ amandɩɛ ɔnɔ a, ntesi obu ɔdɩpʋ ɔkʋlɛ ha mlɩ Katsʋn Nkɛ kugyikʋtɔ. Mlɩdekle mlɩaa, nsi Yudafɔ Owie anfɩ ha mlɩ?”
40Bɔkplʋn lɛ mʋ́ ɔnɔ bɛɛ, “Ɛkɛkɛɛkɛ! Megyi mʋ. Si Baraba ha anɩ.” (Ogyo otswapʋ Baraba ɛ gyi).
Currently Selected:
Yohane 18: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation