Marko 9
9
1Yesu lɔyɔ mʋ tɔɩsʋ ɔbɛɛ, “Ɔnɔkwalɩ ndɛ mlɩ bla. Akʋ bʋbʋ mlɩtɔ nfɩ bʋmóowu, yɔfʋn brɛá bawun ánɩ́ Bulu iwiegyi amʋ ɩna tumisʋ ɩba.”
Yesu Ɩwɩtsɛ
(Mateo 17:1-13; Luka 9:28-36)
2Nkensie ɔma a, Yesu lɛkpa Petro, Yakobo mʋa Yohane. Mʋa amʋ́nyɔ bɔdʋ yɔ ɩbʋ kʋsʋ amʋ́ nkʋlɛ. Ɩnʋ Yesu lɛtsɛ amʋ́ ansɩtɔ. 3Mʋ atadɩɛ lɛdamli fututuutu, ɩdɛ ogya kpa. Tɔtɔ ma ɔsʋlʋ anfɩsʋá ɩbɛ́talɩ bwɛ mʋ́ ibófuli alɩ. 4Ɩnʋ Elia mʋa Mose bɛlɛ ɩwɩ ɔwan, amʋ́a Yesu bʋdɛtɔɩ. 5Mʋʋ Petro lɛbla Yesu ɔbɛɛ, “Osunapʋ, ɩbʋ alɛá abétsia nfɩ. Ha ada abu asa. Fʋ klɛ kʋlɛ, Mose klɛ kʋlɛ, Elia ɛ klɛ kʋlɛ.” 6Ifu lɛhɩɛ kɩta Petro mʋa mʋ aba amʋ dʋbɩ. Mʋ́ sʋ omowun asʋn ánɩ́ ɔblɩ.
7Ɩnʋ agyinde kʋ lobobun amʋ́sʋ, ɔmɛ kʋ lɛdalɩ tsu mʋ́tɔ ɔbɛɛ, “Ɔ́nɩ gyi mɩ Bi ɔdwɛpʋ nɩ! Mlɩyaa asʋ amlɩnu mʋ asʋn!” 8Ɩnʋ bɛlakɩ, tamɛ bʋmɛtra wun ɔhaa dʋn Yesu nkʋlɛ.
9Brɛá bʋdɛ ɩbʋ amʋ kplɩ a, Yesu lɛda amʋ́ ɔla ɔbɛɛ, “Mlɩmábla ɔhaa tɔá mlɩlayowun, yɔfʋn ɛkɛá Bulu ɔbɔ́kʋsʋa mɩ, Nyankpʋsa-Mʋ-Bi anfɩ tsu afulitɔ.”
10Asʋn anfɩ lesin amʋ́ nwuntɔ, betsia fɩtɛ aba bɛɛ, “Kʋsʋ tsu afulitɔ anfɩ asɩ mɛ?” 11Ɩnʋ bɛfɩtɛ Yesu bɛɛ, “Ntogyi sʋ Mose mbla asunapʋ amʋ bɛɛ, ilehian ánɩ́ Elia obéyinki ba asa Kristo amʋ ɔbɛ́ba?”
12Ɔlɛlɛ mʋ́ ɔnɔ ɔbɛɛ, “Ɔnɔkwalɩ igyiá Elia obégyankpa bɛla togyitɔ yaɩ wanklaan. Mʋ́ ntogyi sʋ Bulu asʋn wanlɩnhɛ amʋ kɛn lɛblɩ tsu mɩ ɩwɩ ɔbɛɛ, mɩ, Nyankpʋsa-Mʋ-Bi anfɩ nɛ́hɩɛ wun ipian, aha bɔ́sʋpa mɩ? 13Ndɛ mlɩ bla mbɛɛ, Elia layinki ba dodo. Aha bɔbwɛ mʋ alɩá bʋdekle, fɛ alɩá bɔwanlɩn wa Bulu asʋn amʋtɔ.”
Ɩlɔ Dɩdahɛ Ɔlɔpʋ Tsa
(Mateo 17:14-21; Luka 9:37-43a)
14Brɛá beyinki bowie akasɩpʋ atrahɛ amʋ wa a, bowun ánɩ́ ɔdɔm kpɔnkpɔɔnkpɔntɩ bafia bomli amʋ́, Mose mbla asunapʋ akʋ bʋdɛ akasɩpʋ amʋ nwɛn gyi. 15Brɛá ɔdɔm amʋ bowun Yesu a, ɩlɔwa amʋ́ wanwan, bɛsrɩ yefia mʋ, ha mʋ ayɛ. 16Yesu lɛfɩtɛ mʋ akasɩpʋ amʋ ɔbɛɛ, “Amansʋ mlɩa amʋ́nyɔ mlɩdɛbɩtɩ?”
17Ɔdɔm amʋtɔ ɔkʋ lɛlɛ mʋ́ ɔnɔ ɔbɛɛ, “Osunapʋ, nɛkpa mɩ bi yinhɛ ba fʋ mbɛɛ, afʋtsa mʋ ɩlɔ. Ɔŋɛ lalahɛ laha ɔtamatɔɩ. 18Bregyibrɛá ɔŋɛ lalahɛ amʋ ɩba mʋsʋ a, ɩtɔwʋsʋ mʋ, fɩn mʋ da ɔsʋlʋtɔ. Mʋ ɔnɔ tɔbwɛ afu, ɔtɔwɩ ayin, ɔtɛsɩnsɩn. Nɛ́bla fʋ akasɩpʋ mbɛɛ, bʋgya ɔŋɛ amʋ lɛ mʋtɔ ha mɩ, tamɛ bʋmɛtalɩ.”
19Yesu lɛbla amʋ́ ɔbɛɛ, “Ndɛmba-abiá mlɩmá hogyi, alɩ nétsia mlɩ wa yɔ nɩ? Yɔfʋn ɔmɛnkɛ nnya klʋn ha mlɩ? Mlɩkpa kebi amʋ ba mɩ!” 20Bɛkpa kebi amʋ ba Yesu.
Ɔŋɛ lalahɛ amʋ lenya wun Yesu alɩ, ɩlɔwʋsʋ kebi amʋ, fɩn mʋ da. Odemina, mʋ ɔnɔ ɛ ɩdɛ afu. 21Yesu lɛfɩtɛ obi mʋ sɩ amʋ ɔbɛɛ, “Tsu brɛ mɔmʋtɔ ɩlɔ anfɩ lefi asɩ?”
Ɔlɛlɛ mʋ́ ɔnɔ ɔbɛɛ, “Tsu mʋ nyebitɔ ɔpá. 22Ɩtɔtswɩ mʋ wa ogya mʋ́a ntsu aná fɛ́ɛ́tɔ, itekleá ɩbɔ́mɔ mʋ, tamɛ nɩ fɛ́talɩ bwɛ tɔkʋ tsu mʋ́ ɩwɩ a, wun anɩ nwɛ afʋgyi anɩ bʋalɛ.”
23Yesu lɛfɩtɛ mʋ ɔbɛɛ, “Blɩ fʋdɛ fɛɛ, nɩ nɛ́talɩ? Togyitɔ lɔpɔn ha ohogyipʋ.”
24Ɩnʋ obi mʋ sɩ amʋ lɔkplʋn blɩ ɔbɛɛ, “Nohogyi, tamɛ mɩ hogyi mɔtsɔ. Gyi mɩ bʋalɛ, mɩ hogyi imoni!”
25Brɛá Yesu lowun ánɩ́ ɔdɔm amʋ bʋtra bʋsrɩ bɛba a, ɔlɔkplʋn wa ɔŋɛ lalahɛ amʋ ɔbɛɛ, “Fʋ ɔdandʋbiabia mʋ́a ɩsʋtin ɔŋɛ, dalɩ kebi amʋtɔ. Mátra wie mʋtɔ ɛkɛkɛɛkɛ!”
26Ɔŋɛ lalahɛ amʋ lɔsʋra okitikiti kʋklʋkʋʋ, ɩlɛtra wʋsʋ mʋ nyanyanyanya, ɩlɛdalɩ mʋtɔ. Ɔŋɛ lɛta mʋ. Mʋ́ sʋ aha amʋtɔ akʋ bɛblɩ bɛɛ, “Alawu.” 27Tamɛ Yesu lɛkɩta mʋ ɩbɩ tsu mʋ fʋa, ɔlɔkʋsʋ lɩɩ.
28Mʋ́ ɔma, brɛá Yesu mʋa mʋ akasɩpʋ amʋ nkʋlɛ bʋbʋ woyitɔ a, bɛfɩtɛ mʋ bɛɛ, “Ntogyi sʋ anɩ mʋ́ anɩmɛtalɩ gya ɔŋɛ lalahɛ amʋ dalɩ kebi amʋtɔ?”
29Mʋʋ ɔlɛbla amʋ́ ɔbɛɛ, “Ɩnɩ odu mʋ́ a, nkɛtɩ mpaɩ#9:29 Mpaɩ mʋ́a ɔnɔklɩ bʋ nwʋlʋ dada amʋ akʋtɔ. pɛ mlɛtalɩ pʋgya mʋ́.”
Yesu Lowu Ɩwɩ Asʋn Blɩ Otse Nyɔsɩ
(Mateo 17:22-23; Luka 9:43b-45)
30Brɛá Yesu mʋa mʋ akasɩpʋ amʋ bɛnatɩ ɩnʋ a, bɔtsʋn Galilea ɔsʋlʋsʋ, tamɛ Yesu mekleá ɔhaa ɔbɩ ɔtɩnɛá mʋbʋ. 31Tsufɛ ɔdɛ akasɩpʋ amʋ atɔ suna ɔbɛɛ, “Bɛ́lɛ mɩ, Nyankpʋsa-Mʋ-Bi anfɩ ha adʋn bɔ́mɔ mɩ. Tamɛ Bulu ɔbɛ́lakʋsʋa mɩ ɛkɛ sasɩ.”
32Akasɩpʋ amʋ bʋmonu mʋ́ asɩ. Ifu ɛ dɛ amʋ́ ánɩ́ bɛfɩtɛ mʋ.
Ma Ɔbɔ́bwɛ Ɔhandɛ?
(Mateo 18:1-5; Luka 9:46-48)
33Bɛba Kapernaum wulutɔ. Brɛá bowie-woyitɔ a, Yesu lɛfɩtɛ amʋ́ ɔbɛɛ, “Ntɔ nwɛn mlɩdegyi ɔkpatɔ?”
34Bɛkpa ɔnɔ bun mʋ́sʋ, tsufɛ ɩhandɛ bʋdɛprɩ. 35Yesu letsia asɩ, ɔlɛtɩ akasɩpʋ duanyɔ amʋ, ɔlɛbla amʋ́ ɔbɛɛ, “Nɩ mlɩtɔ ɔkʋ dekleá ɔbɔ́bwɛ mlɩ nkpa ogyapʋ a, ɔbwɛ mʋ ɩwɩ ɔma ogyapʋ pʋ́ mlɩ fɛ́ɛ́ osumpʋ.” 36Ɩnʋ ɔlɛkpa kebi ɔkʋ bɛlɩɩ amʋ́ ansɩtɔ, lata mʋ puta, ɔlɛbla amʋ́ ɔbɛɛ, 37“Ɔhagyiɔha ánɩ́ ɔlɔhɔ kebiá ogyi alɩ mɩ ɩdatɔ lahɔ mɩ. Ɔhagyiɔha ánɩ́ ɔhɔ mɩ a, megyi mɩ ɔlɔhɔ, mboun ɔha amʋʋ ɔlɔwa mɩ amʋ.”
Anɩ Obuopʋ
(Luka 9:49-50)
38Yohane lɛbla Yesu ɔbɛɛ, “Osunapʋ, anɩlowun oyin ɔkʋ dɛpʋ fʋ da gya ɔŋɛ lalahɛ, anɩlɛka mʋ tin, tsufɛ ɔma anɩtɔ.”
39Tamɛ Yesu lɛbla amʋ́ ɔbɛɛ, “Mlɩmáka mʋ tin! Tsufɛ ɔhaa má ɩnʋá ɔbɔ́bwɛ ofula mɩ ɩdatɔ, lablɩ mɩ ɩwɩ asʋn lalahɛ. 40Tsufɛ ɔha ánɩ́ ɔmɔkʋsʋ lɩɩ anɩsʋ buo anɩ. 41Ɔnɔkwalɩ ndɛ mlɩ bla mbɛɛ, nɩ ɔkʋ ɔha mlɩ ntsu-owebi mlonun mɩ ɩda ánɩ́ ɩdɩn mlɩsʋ sʋ a, ɔmɔ́ɔhʋlɩ mʋ ɩpan.
Ɔha Kpa Wa Lakpantɔ
(Mateo 18:6-9; Luka 17:1-2)
42“Nɩ ɔkʋ lɛha aha anfɩ bʋmɔkʋdan mɩsʋ hogyitɔ anfɩtɔ ɔkʋ lɔbwɛ lakpan a, nɩ bɛda nfuokwɛbʋ sian mʋ ɔmɛtɔ, tswɩ mʋ wa ɔpʋtɔ po a, ɩbʋ alɛ dʋn. 43-44Nɩ fʋ ɩbɩ kʋlɛ tɛha fʋtɔbwɛ lakpan a, ka mʋ́ lɛ! Ɩbʋ alɛá fɔ́pʋ ɩbɩ kʋlɛ nya nkpa ánɩ́ ɩtamata, dʋn ánɩ́ fɔ́pʋ ɩbɩ anyɔ wie ɩsʋbɩtɩ ogya ánɩ́ ɩtamaduntɔ.#9:44 Mʋ́tɔ ye 44 mʋ́a 46 bɛlɩan 48, tamɛ ɩma nwʋlʋ dada amʋ akʋtɔ. 45-46Nɩ fʋ yabi kʋlɛ tɛha fʋtɔbwɛ lakpan a, ka mʋ́ tswɩ tsalɩfwɩ! Ɩbʋ alɛá fɔ́pʋ yabi kʋlɛ nya nkpa ánɩ́ ɩtamata, dʋn ánɩ́ fɔ́pʋ ayabi anyɔ wie ɩsʋbɩtɩ ogya ánɩ́ ɩtamaduntɔ.#9:46 Mʋ́tɔ ye 44 mʋ́a 46 bɛlɩan 48, tamɛ ɩma nwʋlʋ dada amʋ akʋtɔ. 47Nɩ fʋ nsibi tɛha fʋtɔbwɛ lakpan a, loti mʋ́ lɛ. Ɩbʋ alɛá fɔ́pʋ nsibi kʋlɛ wie Bulu iwiegyi amʋtɔ, dʋn ánɩ́ fɔ́pʋ ansibi anyɔ wie ɩsʋbɩtɩ ogya ánɩ́ ɩtamaduntɔ. 48Ɔtɩnɛá ɩnʋ anyambi bʋtamawu, ɩnʋ ogya ɛ ɩtamadun.
49“Tsufɛ bɔ́pʋ ogya tɩn ɔhagyiɔha ɩwɩ, fɛ alɩá bʋtɔpʋ nfɔlɩ tɩn afɔdɩɛ ɩwɩ.
50“Nfɔlɩ bʋ ɔdwɛ, tamɛ nɩ ɩta ɔdwɛ a, ntɔ bɛlapʋwa mʋ́ ɔdwɛ?
“Mlɩha ɔdwɛ itsia mlɩtɔ fɛ nfɔlɩ, iwilwii itsia mlɩa mlɩ aba nsɩnɛ.”
Currently Selected:
Marko 9: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation