Mateo 28
28
Yesu Kʋsʋ Tsu Afulitɔ
(Marko 16:1-10; Luka 24:1-12; Yohane 20:1-10)
1Yudafɔ ɔkpʋnʋ ɔdakɛ ɔyɩkɛhɛ, igyi Kwasieda bakɛ a, Magdalayintse Maria mʋa Maria nyɔsɩ amʋ bɔkʋsʋ yɔ Yesu ntsan amʋ ɔkɩkpa. 2Ɩnʋnʋ a, ɔsʋlʋ lɛkpɩnkɩ kʋklʋkʋʋ, Bulu-ɔbɔpʋ lɛkplɩ tsu ɔsʋsʋ bemina ibwi yile amʋ lɛ ɔbɔ amʋ ɔnɔ, tsia mʋ́sʋ. 3Mʋ ansɩtɔ lɛhɩɛ wankɩ, ɩdɛ ogya kpa. Mʋ atadɩɛ ɛ lofuli fututuutu fɛ opuli-mputɔ. 4Brɛá bowun mʋ a, ifu lɛhɩɛ kɩta ɩnʋ agyopʋ amʋ, bɛ́kpɩnkɩ kpakpakpakpa, dɩda, lwii fɛ afuli.
5Bulu-ɔbɔpʋ amʋ lɛbla atsɩ amʋ ɔbɛɛ, “Mlɩmánya ifu! Nawun ánɩ́ Yesu amʋʋ bɛda manta oyikpalihɛsʋ amʋ mlɩdedunka. 6Ɔma nfɩ. Bulu lakʋsʋa mʋ fɛ alɩá ɔlɛblɩ yaɩ. Mlɩbɛkɩ ɔtɩnɛ amʋʋ bɔpʋ mʋ tswɩ amʋ. 7Mlɩwa ɔsa yɛbla mʋ akasɩpʋ amʋ mlɩaa, Bulu lakʋsʋa mʋ tsu afulitɔ. Alagya mlɩ nkpa ɔyɔ Galilea ɔmátɔ. Ɩnʋ mlówun mʋ nɩ. Asʋn ánɩ́ mbʋ ha mlɩ nɩ.”
8Ifu lɛkɩta atsɩ amʋ, tamɛ bɔpʋ ansigyi tsii ɔsrɩɩ tsu opulakpa ɩnʋ bɔyɔ yɛbla akasɩpʋ amʋ tɔá bawun.
9Ɩmɔwa ɔpá kʋkʋ Yesu lefia amʋ́, ha amʋ́ ɩtɛ. Ɩnʋ bɛda akpawunu kɩta mʋ ayabi, sum mʋ. 10Yesu lɛbla amʋ́ ɔbɛɛ, “Mlɩmánya ifu. Mlɩyɛbla mɩ apio amʋ mlɩaa, bʋyɔ Galilea ɔmátɔ. Ɩnʋ bówun mɩ nɩ.”
Ntsan Agyopʋ Amʋ Asʋn Klahɛ
11Brɛá atsɩ amʋ bɔpʋ bɔyɔ a, ntsan agyopʋ amʋ akʋ ɛ bɔyɔ wulutɔ yɛbla Bulu igyi ahapʋ dɛhɛn amʋ tɔá ɩlaba fɛ́ɛ́. 12Ɩnɩ sʋ Bulu igyi ahapʋ dɛhɛn amʋ bɛtɩ Yudafɔ ahandɛ amʋ fɛ́ɛ́ fia, kɩta agywɩɩn. Bɛha ntsan agyopʋ amʋ kɔba tsɔtsɔɔtsɔ. 13Bɛha amʋ́ ɔnɔ bɛɛ, “Mlɩblɩ mlɩaa, ‘Onye, brɛá anɩdɛdɩdɩ a, Yesu akasɩpʋ amʋ bɛba bowi mʋ natɩ.> 14Nɩ Roma ɔhandɛ onu a, anɩa mʋnyɔ abɛ́blɩ mʋ́, mɛnɩ mlɩmóowie asʋntɔ.”
15Mʋ́ sʋ ntsan agyopʋ amʋ botsula hɔ kɔba amʋ. Begyi dɩnka Bulu igyi ahapʋ dɛhɛn amʋ asʋn blɩhɛ anfɩsʋ. Ɔnɔ anfɩ bɛha amʋ́ anfɩ lobwie wa Yudafɔ ɔmá amʋ fɛ́ɛ́tɔ bɔtʋ ɔwʋlʋ anfɩ wanlɩnbɩ.
Yesu Ɩwɩɔwanlɛ Suna Mʋ Akasɩpʋ
(Marko 16:14-18; Luka 24:36-49; Yohane 20:19-23; Gyumagyihɛ 1:6-8)
16Akasɩpʋ duɔkʋn amʋ bɛnatɩ yɔ Galilea ɔmátɔ, ɩbʋ amʋʋ Yesu losuna amʋ́ ɔbɛɛ bʋfia mʋ mʋ́sʋ amʋsʋ. 17Brɛá bowun mʋ a, bɛda akpawunu sum mʋ, tamɛ ɩmɔwankɩ amʋ́tɔ akʋ ánɩ́ mʋ nɩ. 18Mʋʋ Yesu lɔkpʋkpɛ ba amʋ́ wa, blɩ ɔbɛɛ, “Bulu lapʋ ɔsʋ mʋ́a asɩ tumi fɛ́ɛ́ wa mɩ ɩbɩtɔ. 19Mʋ́ sʋ mlɩyɔ ɔyɩtɔ fɛ́ɛ́, amlɩbwɛ aha fɛ́ɛ́ mɩ akasɩpʋ. Mlɩbɔ amʋ́ asu Ɔsɩ, Obi pʋ́ Ɔŋɛ Wankɩhɛ ɩdatɔ. 20Mlɩsuna amʋ́ abʋgyi mbla amʋʋ nɔwa ha mlɩ amʋ fɛ́ɛ́sʋ. Mlɩbɩ ánɩ́ mbʋ mlɩ wa bregyibrɛ, yɔfʋn ɔyɩ ɔnɔmɔ.”
Currently Selected:
Mateo 28: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation