Yohane 8
8
Ɔtsɩ Ɔkʋ Mbʋatɔ Pʋ́ Mʋ Kɩta
1Brɛá aha amʋ bɛdasaɩn a, Yesu lɔdʋ yɔ Olif ɩbʋ amʋsʋ. 2Mʋ́ ɔyɩkɛhɛ bakɛ a, oleyinki ba Bulu ɔtswɛkpa wunsɩnɛsʋ ɩnʋ. Aha amʋ fɛ́ɛ́ bɛba mʋ wa. Mʋ́ sʋ oletsia asɩ, olefi asɩ ɔdɛ amʋ́ atɔ suna. 3Brɛá ɔdɛtɔɩ a, Farisifɔ pʋ́ Mose mbla asunapʋ amʋ bɛkpa ɔtsɩ ɔkʋá bakɩta mʋ, ɔdɛ mbʋa tɔ ba bɛlɩɩ amʋ́ ansɩtɔ. 4Mʋʋ bɛbla Yesu bɛɛ, “Osunapʋ, bakɩta ɔtsɩ anfɩ mbʋa ɔtɔkpa. 5Mose Mbla amʋ lɛblɩ ɔbɛɛ, ada atsɩ anfɩ odu abwi mɔ. Nkalɩ fʋdɛblɩ tsu asʋn anfɩ ɩwɩ?” 6Asʋnkle sʋ bɛfɩtɛ mʋ asʋn anfɩ, abʋyɛtɔ mʋ ha ahandɛ. Ɩnʋ Yesu lobun, pʋ osrebi ɔdɛ atɔ wanlɩn ɔsʋlʋtɔ.
7Brɛá bʋtra bʋdɛ asʋn amʋ fɩtɛ pla a, olobwii tsia, bla amʋ́ ɔbɛɛ, “Mlɩtɔ ɔha ánɩ́ ɔmɔkʋbwɛ lakpan kɩ ogyankpa da ɔtsɩ anfɩ ibwi.” 8Ɔlɛblɩ mʋ́ alɩ a, oleyinki bun ɔdɛ mʋ atɔ wanlɩn ɔsʋlʋtɔ. 9Brɛá aha amʋ bonu mʋ asʋn anfɩ a, bɔwa natɩ ɩkʋlɛ-kʋlɛ bɩ, tsu ahandɛsʋ bɔtʋ nyebisʋ. Ilebesi Yesu mʋa ɔtsɩ amʋ nkʋlɛ ɔbʋn nsɩnɛ ɩnʋ. 10Yesu lobwii tsia, ɔlɛfɩtɛ ɔtsɩ amʋ ɔbɛɛ, “Ɔtsɩ, nkɩ aha amʋ mɛ? Ɔkʋkʋ mesian ánɩ́ ɔbɛ́ha fʋ ɩpɔn?”
11Ɔtsɩ amʋ lɛlɛ mʋ́ ɔnɔ ɔbɛɛ, “Owie! Ɔkʋkʋ mɛha mɩ ɩpɔn o!” Mʋʋ Yesu lɛbla mʋ ɔbɛɛ, “Ɩbʋ alɛ! Mɩ ɛ mmɛ́ɛha fʋ ɩpɔn! Natɩ, mátra bwɛ lakpan.”]#7:53--8:11 Ɩma Grikifɔ nwʋlʋ dada amʋ akʋtɔ.
Ɔyɩtɔ Wankɩ
12Ɩnɩ ɔma a, Yesu leyinki bla Farisifɔ amʋ ɔbɛɛ, “Mɩgyi ɔyɩtɔ wankɩ nɩ. Ɔhagyiɔha ánɩ́ obuo mɩ obénya wankɩá ɩbɛ́ha mʋ nkpa, oméesin okluntɔ ɛkɛkɛɛkɛ.”
13Ɩnʋ a, Farisifɔ amʋ bɛbla mʋ bɛɛ, “Nfɔlɩ tamakanfʋ mʋ ɩwɩ. Fʋmɔkʋblɩ tɔtɔ.”
14Yesu lɛbla amʋ́ ɔbɛɛ, “Nɩ mɩ onuto ndɛ mɩ ɩwɩ adansɩɛ gyi o a, ɔnɔkwalɩ igyi. Tsufɛ mɩ mʋ́ nyin ɔtɩnɛá notsu pʋ́ ɔtɩnɛá nɔyɔ. Tamɛ mlɩmeyin ɔtɩnɛá notsu pʋ́ ɔtɩnɛá nɔyɔ. 15Anyankpʋsa asʋngyi ɔkpasʋ mlɩtegyi asʋn tsʋn, tamɛ mɩ mʋ́ ntamagyi ɔhaa asʋn. 16Nɩ negyi asʋn o a, ɔnɔkwalɩ ɔkpasʋ negyi mʋ́ tsʋn. Tsufɛ megyi mɩ nkʋlɛ tegyi mʋ́. Mɩa mɩ Sɩ amʋʋ ɔlɔwa mɩ sɩsɩ amʋ nyɔ tegyi mʋ́. 17Bɔwanlɩn wa mlɩ onuto Mbla amʋtɔ bɛɛ, ‘Nɩ adansɩfɔ abanyɔ bɛblɩ asʋn kuakʋlɛ a, amʋ́ asʋn ɩbʋ mʋ́tɔ.> 18Mɩ onuto ntegyi mɩ ɩwɩ adansɩɛ. Mɩ Sɩ lɔwa mɩ sɩsɩ. Mʋ ɛ otegyi mɩ ɩwɩ adansɩɛ.”
19Bɛfɩtɛ mʋ bɛɛ, “Nkʋnʋ fʋ sɩ bʋ?”
Yesu lɛlɛ mʋ́ ɔnɔ ɔbɛɛ, “Mlɩmeyin mɩ wanklaan, mlɩmeyin mɩ Sɩ amʋ ɛ. Nɩ mlɩyin mɩ wanklaan a, tɛkɩ mlɛ́bɩ mɩ Sɩ amʋ ɛ.”
20Yesu lɛblɩ asʋn anfɩ brɛá ɔdɛ atɔ suna Bulu ɔtswɛkpa tswɩtswɩ-adaka otsiakpa. Tamɛ ɔhaa mɛkɩta mʋ, tsufɛ mʋ brɛ mɔkʋnya fʋn.
Yesu Ɔsʋsʋyɔ
21Yesu lɛtra bla amʋ́ ɔbɛɛ, “Mɩ mʋ́ nɔyɔ. Mlódunka mɩ. Mlówu wa mlɩ lakpantɔ. Mlɩmɛ́ɛtalɩ ba ɔtɩnɛá nɔyɔ.”
22Yudafɔ ahandɛ amʋ bɛfɩtɛ bɛɛ, “Mɔ ɔbɔ́mɔ mʋ ɩwɩ, sʋ ɔdɛblɩ ɔbɛɛ, mlɩmɛ́ɛtalɩ ba ɔtɩnɛá nɔyɔ?”
23Yesu lɛlɛ mʋ́ ɔnɔ ɔbɛɛ, “Mlɩ mʋ́ mlotsu ɔyɩ anfɩtɔ, tamɛ mɩ mʋ́ notsu ɔsʋsʋ. Ɔyɩ anfɩtɔfɔ mlɩgyi. Mmegyi ɔyɩ anfɩtɔyin mɩ mʋ́ ngyi. 24Mʋ́ sʋ ndɛ mlɩ bla mbɛɛ, mlówu wa mlɩ lakpantɔ nɩ. Mlówu wa mlɩ lakpantɔ, nɩ mlɩmohogyi ánɩ́ ‘Mɩgyi ɔha amʋʋ mbɛɛ ngyi amʋ.> ”
25Bɛfɩtɛ mʋ bɛɛ, “Fʋgyi ma?”
Yesu lɛbla amʋ́ ɔbɛɛ, “Ɔha amʋʋ ntɛbla mlɩ yaɩ mbɛɛ, ngyi amʋ kɛn ntra ndɛ mlɩ bla a. 26Mbʋ asʋn tsɔtsɔɔtsɔá nɛblɩ tsu mlɩ ɩwɩ pʋha mlɩ pɔn. Tamɛ ɔnɔkwalɩpʋ ɔha amʋʋ ɔlɔwa mɩ sɩsɩ amʋ gyi. Asʋn ánɩ́ nonu tsu mʋ wa ndɛ mlɩ ɔyɩtɔfɔ bla.”
27Ɩmɔwankɩ amʋ́á mʋ Sɩ amʋʋ ɔbʋ ɔsʋsʋ amʋ ɩwɩ asʋn ɔdɛ amʋ́ bla. 28Mʋ́ sʋ Yesu lɛbla amʋ́ ɔbɛɛ, “Nɩ mlɛda Nyankpʋsa-Mʋ-Bi amʋ manta oyikpalihɛsʋ, tsu mʋ lɩɩ a, mlówun ánɩ́ ‘Mɩgyi ɔha amʋʋ mbɛɛ ngyi> amʋ. Mlɛ́bɩá ntamabwɛ tɔtɔɔtɔ mɩ onuto tumitɔ. Mʋ́á mɩ Sɩ lɔpʋwa mɩ ɔnɔ ntɛblɩ. 29Ɔha amʋʋ ɔlɔwa mɩ sɩsɩ amʋ buo mɩ. Ɔmɔkʋyinki mɩ ɔma, tsufɛ tɔá itegyi mʋ ansɩ ntɔbwɛ bregyibrɛ.”
30Ɩnʋ aha amʋʋ bonu mʋ asʋn anfɩtɔ tsɔtsɔɔtsɔ bɔhɔ mʋ gyi.
Abraham Abi-aná
31Yesu lɛbla Yudafɔ amʋʋ bɔhɔ mʋ gyi amʋ ɔbɛɛ, “Nɩ mlobuo mɩ atosunahɛ a, mlɩgyi mɩ akasɩpʋ lɛlɛ. 32Mlɛ́bɩ ɔnɔkwalɩ amʋ. Ɔnɔkwalɩ amʋ ɩbɛ́ha mlégyi ɩwɩ.”
33Bɛblɩ bɛɛ, “Abraham abi-aná anɩgyi. Anɩmɔkʋbwɛ ɔhaa nkpábi kɩ. Mʋ́ ntogyi sʋ fʋdɛ anɩ bla fɛɛ, ‘Mlégyi ɩwɩ?> ”
34Yesu lɛlɛ mʋ́ ɔnɔ ɔbɛɛ, “Ɔnɔkwalɩ ndɛ mlɩ bla. Ɔhagyiɔha ánɩ́ ɔtɔbwɛ lakpan a, ogyi lakpan ɔkpábi. 35Ɔkpábi tamatsia mʋ wie woyitɔ yɔ, obi tetsia mʋ sɩ woyitɔ yɔ. 36Mʋ́ sʋ nɩ Bulu mʋ Bi amʋ ɔha mlegyi ɩwɩ a, mʋmʋ mlɩlagyi ɩwɩ fɛ́ɛ́. 37Nyin ánɩ́ Abraham abi-aná mlɩgyi, tamɛ mlɩdekleá mlɔ́mɔ mɩ, tsufɛ mlɩmɔhɔ mɩ atosunahɛ. 38Tɔá nowun tsu mɩ Sɩ wa ndɛblɩ. Mlɩ ɛ asʋn ánɩ́ mlɩlonu tsu mlɩ sɩ wasʋ mlɩdegyi.”
39Bɛbla mʋ bɛɛ, “Anɩ sɩ gyi Abraham.”
Yesu lɛbla amʋ́ ɔbɛɛ, “Nɩ Abraham abi mlɩgyi a, tɛkɩ mlɩ bwɛhɛ lɛlɩan Abraham. 40Mlɩdekleá mlɔ́mɔ mɩ, tsufɛ ndɛ mlɩ ɔnɔkwalɩá nonu tsu Bulu wa bla. Abraham mɔbwɛ alɩ! 41Mlɩ sɩ bwɛhɛ mlɩdɛbwɛ.”
Bɛbla Yesu bɛɛ, “Megyi mbʋa bɔtɔ kwɩɩ anɩ. Bulu onuto gyi anɩ Sɩ. Anɩmá ɔsɩ ɔkʋkʋ tsɩa mʋtɔ.”
42Yesu lɛbla amʋ́ ɔbɛɛ, “Nɩ mlɩ Sɩ gyi Bulu a, tɛkɩ mlɩtɔdwɛ mɩ, tsufɛ mʋ wa notsu ba. Mʋlɔwa mɩ sɩsɩ. Megyi mɩ onuto tumitɔ nɛba. 43Ntogyi sʋ mlɩmɛdɛ mɩ asʋn blɩhɛ asɩ nu? Mlɩmɛdɛ mʋ́ asɩ nu, tsufɛ mɩ asʋn dɛ mlɩ asʋtɔ wɔ. 44Ɔbʋnsam gyi mlɩ sɩ. Mʋ́ sʋ mlɩtekleá mlɔ́bwɛ tɔá mlɩ sɩ tekle. Aha ɔmɔpʋ ogyi tsu nfiasɩ. Ɔtamabuo ɔnɔkwalɩ. Mʋ́ sʋ ɔnɔkwalɩ kʋkʋ ɩma mʋtɔ. Nɩ ɔwa afunu a, mʋ tsiatɔ ɔwan ɔdɛlɛ, tsufɛ ofunupʋ ogyi. Mʋgyi afunupʋ fɛ́ɛ́ ɔsɩ nɩ. 45Tamɛ ntɛblɩ ɔnɔkwalɩ. Mʋ́ sʋ mlɩtamahɔ mɩ asʋnsʋ gyi nɩ. 46Mlɩtɔ ma ɔbɛ́talɩ suna ánɩ́ lakpan ɔbwɛpʋ ngyi? Nɩ ndɛ ɔnɔkwalɩ blɩ a, mʋ́ ntogyi mlɩmɔ́ɔhɔ mɩ gyi? 47Ɔha ánɩ́ otsu Bulu wa tɛyaa asʋ nu mʋ asʋn. Mlɩ mʋ́ mlɩmotsu mʋ wa. Mʋ́ sʋ mlɩtamayaa asʋ nu mʋ asʋn nɩ.”
Yesu Mʋa Nanain Abraham
48Yudafɔ amʋ bɛbla mʋ bɛɛ, “Nɩ ablɩ anɩaa, Samariayin fʋgyi, ɔŋɛ lalahɛ bʋ fʋtɔ a, anɩlawa afunu?”
49Yesu lɛbla amʋ́ ɔbɛɛ, “Ɔŋɛ lalahɛ ma mɩtɔ. Ntobu mɩ Sɩ, tamɛ mlɩ mʋ́ mlɩtamabu mɩ. 50Mmɛdɛ mɩ ɩwɩ numnyam wa. Ɔha ɔkʋ bʋ ɩnʋá ɔdɛ mʋ́ dunka ha mɩ. Mʋgyi asʋn ogyipʋ wanklaan amʋ nɩ. 51Ɔnɔkwalɩ ndɛ mlɩ bla. Ɔhagyiɔha ánɩ́ otegyi mɩ atosunahɛsʋ omóowu ɛkɛkɛɛkɛ.”
52Ɩnʋ Yudafɔ amʋ bɛbla mʋ bɛɛ, “Sei anfɩ mʋ́ a, anɩlawun ánɩ́ lɛlɛ ɔŋɛ lalahɛ bʋ fʋtɔ! Abraham mʋa Bulu ɔnɔsʋ atɔɩpʋ amʋ bawu. Tamɛ fʋ mʋ́ fʋdɛblɩ fɛɛ, ɔhagyiɔha ánɩ́ otegyi fʋ atosunahɛsʋ omóowu ɛkɛkɛɛkɛ. 53Anɩ nain Abraham lowu. Fʋkɩ fɛɛ fʋdʋn mʋ? Bulu ɔnɔsʋ atɔɩpʋ amʋ ɛ bowu. Nkalɩ fʋdɛ fʋ ɩwɩ kɩ?”
54Yesu lɛlɛ mʋ́ ɔnɔ ɔbɛɛ, “Nɩ nɔwa mɩ ɩwɩ numnyam a, kpaalɩ igyi. Mɩ Sɩ gyi ɔha ánɩ́ ɔtɔwa mɩ numnyam. Mʋ mlɩdɛblɩ mlɩaa, ogyi mlɩ Bulu nɩ. 55Ɩbʋ mʋ́tɔá mlɩmeyin mʋ, tamɛ mɩ mʋ́ nyin mʋ. Nɩ nɛblɩ mbɛɛ mmeyin mʋ a, nabwɛ ofunupʋ fɛ mlɩ. Mɩ mʋ́ nyin mʋ, ntegyi mʋ asʋnsʋ. 56Mlɩ nain Abraham lenya ansigyi ánɩ́ mówun mɩ babɩ. Olowun mʋ́ ɛ, ansɩ legyi mʋ.”
57Yudafɔ amʋ bɛbla mʋ bɛɛ, “Fʋmɔkʋhɔ nfi aduenu (50) kʋraa, mʋ́ fɛɛ fɔtʋ Abraham?”
58Yesu lɛbla amʋ́ ɔbɛɛ, “Ɔnɔkwalɩ ndɛ mlɩ bla. Mbʋ ɩnʋ asa bɔkwɩɩ Abraham.”
59Yesu lenya blɩ alɩ pɛ, aha amʋ bɔkʋla abwi bɛɛ abʋtswɩ da mʋ mɔ. Tamɛ Yesu lɔbwɛ hɩɛɛ, dalɩ Bulu ɔtswɛkpa wunsɩnɛsʋ ɩnʋ.
Currently Selected:
Yohane 8: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation