2 Korintofɔ 9
9
Akristofɔá Bʋma Tɔtɔ Bʋa
1Imehian ánɩ́ nɔ́wanlɩn mlɩ ɔwʋlʋ tsu alɩá mlɩdɛ Bulu aha ánɩ́ bʋbʋ Yerusalem bʋa ɩwɩ. 2Tsufɛ nyin ánɩ́ mlɩhɩɛ mlɩdekleá mlɔ́bʋa amʋ́. Nagyi mlɩ ɩwɩ adansɩɛ suna amʋ́ mbɛɛ, tsu ofikʋ ɔpá Akristofɔá bʋbʋ Akaia ɔsʋlʋsʋ bɛda ɩwɩsʋ yaɩ ánɩ́ bɔ́bʋa. Mlɩ nsiwa laha ogya kʋ lawie amʋ́ ɔdʋdʋɔtɔ. Mʋ́ sʋ amʋ́ ɛ bafi mʋ́ asɩ. 3Tamɛ ndɛ apio anfɩ wa sɩsɩ mlɩ, isuna ánɩ́ megyi kpaalɩ negyi mlɩ ɩwɩ adansɩɛ suna amʋ́. Mlɩda ɩwɩsʋ, fɛ alɩá nɛbla mlɩ yaɩ, amlɩka mlɩ tswɩtswɩ fɛ́ɛ́. 4Tsufɛ nɩ Makedonia Akristofɔ amʋtɔ akʋ bobuo mɩ ba ɩnʋ, bowun ánɩ́ mlɩmɔkʋda ɩwɩsʋ fɛ alɩá nɛbla amʋ́ a, abɔ́sʋpa amʋ́ ansɩtɔ, tamɛ mlɔ́sʋpa dʋn mɩ. 5Mʋ́ sʋ nabwɛ agywɩɩn ánɩ́ nɛ́ha Tito mʋa mʋ aba amʋ abʋgyankpa ba mlɩ wa, ɩha amlɩdunka tɔá mlɩlɛhɩɛá mlɛ́ha yaɩ. Tamɛ mlɩha mʋ́ tsu mlɩ klʋntɔ, megyi ɔhɩɛ igyi.
6Mlɩkaɩn ánɩ́ ɔha ánɩ́ odu kpalobi a, kpalobi ɔtɔkpɔtɩ, tamɛ ɔha ánɩ́ odu tsɔtsɔ tɔkpɔtɩ tsɔtsɔ. 7Mlɩtɔ okugyiɔkʋ ɔhaa mʋ́á ɔbɛ́talɩ tsu mʋ klʋntɔ. Ɩmábwɛ ɔhɩɛ, tsufɛ ɔha ánɩ́ ɔtɔpʋ ɔdwɛ kie atɔ asʋn Bulu tekle. 8Bulu tɛha mlɩ tɔá mlɩdehian bregyibrɛ, dʋn alɩá ilehian mlɩ. Mʋ́ sʋ mlénya tɔá ɩdɛ mlɩ hian bregyibrɛ. Ɩbɔ́fʋn mlɩ sian, mlɔ́pʋbwɛ yile ha aha bamba. 9Fɛ alɩá bɔwanlɩn wa Bulu asʋn amʋtɔ bɛɛ,
“Bulu ɔha tɛlɛ ɩwɩtɔ kie ahianfɔ atɔ.
Mʋ yilebwɛ tamata.”
10Bulu tɛha adɔtɔpʋ atɔ-abi bʋtodu, ɔtɛha aha atogyihɛ. Mlɩgyi fɛ amʋ́. Ɔbɛ́ha mlɩ atɔ-abiá mlɔ́pʋ ɩkʋ kie aha, atogyihɛ tsɔtsɔɔtsɔ bɛ́dalɩ tsu mlɩ yilebwɛ amʋtɔ. 11Ɔbɛ́hɩɛ yula mlɩ ɔkpagyiɔkpasʋ, mɛnɩ mlɔ́wa awɩtɔlɛ ha aha bregyibrɛ. Ɩnɩ ɩbɛ́ha aha amʋ bɛ́da Bulu ɩpan, atɔ amʋʋ mlɩlapʋtsʋn anɩsʋ ha amʋ́ amʋ sʋ. 12Tsufɛ atoku anyɔ ɔbɛ́dalɩ tsu mlɩ atɔ hahɛ anfɩtɔ. Megyi atɔ amʋʋ mlɩlapʋha Bulu aha amʋʋ atɔ dɛ amʋ́ hian, bʋbʋ Yerusalem amʋ nkʋlɛ, mboun ɩbɛ́ha aha tsɔtsɔɔtsɔ bɛ́hɩɛ da Bulu ɩpan. 13Tsufɛ nɩ mlɛha amʋ́ a, ɩbɛ́ha bɛ́kanfʋ Bulu. Ibósuna ánɩ́ lɛlɛ mlɩdɛ Kristo asʋn wanklaan amʋʋ mlɩlɔhɔ amʋsʋ gyi, mlɩdɛ awɩtɔlɛ ɛ wa ha amʋ́a aha bamba. 14Bɛ́hɩɛ kaɩn mlɩsʋ, bɔ mpaɩ ha mlɩ, tsu awɩtɔlɛ kpɔnkpɔntɩ amʋʋ Bulu lapʋha mlɩ amʋ sʋ. 15Ada Bulu ɩpan ha mʋ atokiehɛ anfɩ ɩdʋn blɩ anfɩ!
Currently Selected:
2 Korintofɔ 9: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation