2 Korintofɔ 10
10
Paulo Gyumagyihɛ Ɔnɔlɛ
1Ɩbʋ mʋ́tɔá mlɩtɔ akʋ mlɩtɛblɩ mlɩaa, nɩ mbʋ mlɩ wa a, mɩ asʋn lolwii, tamɛ ntɔwanlɩn mɩ nwʋlʋ tumisʋ. Tamɛ mɩ Paulo ndɛ mlɩ kokoli mbɛɛ, mlɩpʋkɩ alɩá Kristo asʋn lolwii, ɔlɛba ɩwɩasɩ. 2Mlɩtɔ akʋ bʋdɛblɩ bɛɛ, mɩ bwɛhɛ lalɩan ɔyɩtɔ aha. Mʋ́ sʋ nɩ nɛtra ba ɩnʋ a, nawun ánɩ́ ilehian ánɩ́ mɩ ansɩtɔ bɔ́wa ɔnlɩn. Kokoli, mlɩmáha ampʋ tsiatɔ anfɩ odu ba ɩnʋ. 3Ɩbʋ mʋ́tɔá ɔyɩ anfɩtɔ anɩbʋ, tamɛ megyi ɔyɩ anfɩtɔ agywɩɩn anɩdɛpʋkɔ ɩsa. 4-5Megyi ɔyɩtɔ akɔtɔ anɩdɛpʋkɔ. Bulu akɔtɔá ɩbʋ tumi anɩdɛpʋbwie okpikplikpa kugyikʋá ɩtɔkʋsʋ lɩɩ Bulusʋ. Anɩtɔpʋyinta afunu asʋn kugyikʋá aha bʋtɔpʋtsu ɩwɩ, ɩtɛha amʋ́ bʋtamabɩ Bulu. Anɩtɔpʋdamli agywɩɩn lalahɛ kugyikʋ, ha itobu Kristo. 6Nɩ mlɩ aha trahɛ amʋ mlɩlapʋ ɩwɩ ha Kristo, mlɩdɛ mʋ asʋnsʋ gyi a, abɛ́bɩtɩ aha amʋʋ bʋdɛ asʋtɔ-ɔnlɩn wa amʋ ɛ asʋ.
7Mlɩkɩ ɔnɔkwalɩ amʋʋ ɩda mlɩ ansɩtɔ amʋ. Nɩ mlɩdɛkɩá Kristo bʋ mlɩ a, mʋmʋ mlɩkɩ mʋ́ wanklaan, amlɩbɩá mʋbʋ anɩ ɛ. 8Nɩ ndɛ ɩwɩ tsu tumi amʋʋ anɩ Wie lapʋha anɩ amʋ sʋ dʋbɩ a, ɩma mɩ pɛlɩ. Tsufɛ ɔlɔpʋha anɩ ɔbɛɛ, apʋbʋa mlɩ amlɩdan. Megyi ɔbɛɛ, apʋyinta mlɩ. 9Ɩmábwɛ mlɩ fɛ ndɛ nwʋlʋ wanlɩn, pʋwa mlɩ ifu. 10Tsufɛ akʋ bɛɛ, “Mákpla Paulo. Mʋ asʋn wanlɩnhɛ bʋ odwin, ɔtɔpʋhɩɛ aha. Tamɛ nɩ mʋ onuto ɔbʋ anɩ wa a, ololwii, mʋ asʋn blɩhɛ ɛ ɩma ibia!” 11Ɩwankɩ amʋ́á asʋn ánɩ́ anɩtɔwanlɩn sɩsɩ aha kɛn anɩtɔbwɛ nɩ anɩbʋ amʋ́ wa nɩ.
12Lɛlɛ mʋ́ a, amɛndɩ anɩgyiá abɔ́pʋ ɩwɩ kapʋ aha anfɩ bʋdɛ ɩwɩ kanfʋ anfɩ? Amʋ́ wʋlɛwʋlɛ dɛpʋ ɩwɩ kapʋ aba, bʋdɛ ansɩ pʋdɩnka abasʋ. Mimla igyi amʋ́. 13Anɩ mʋ́ anɩmóotsu ɩwɩ dafa, mboun ɔkpa amʋʋ Bulu lɛhɩɛ ha anɩ amʋ ɔnɔ abótsu ɩwɩ fʋn. Mʋ́gyi agyʋma ánɩ́ anɩlabwɛ bɔtʋ mlɩ nɩ. 14Anɩlegyankpa pʋ Kristo asʋn wanklaan amʋ ba mlɩ. Mʋ́ sʋ nɩ anɩdɛ mlɩ asʋn bla a, anɩmɔkʋtɔɩ dafa. 15Anɩmɛdɛpʋ ɔhaa agyʋma ɛ tsu ɩwɩ. Mboun anɩdɛ ɔkpa kɩ ánɩ́ mlɩ hogyi bɛ́dan. Agyʋma amʋʋ anɩdɛyɔ mlɩtɔ amʋ ɛ ɩbɛ́klɛɩ tsɩa. 16Mʋmʋ abɛ́talɩ dafa mlɩsʋ yɛda asʋn wanklaan amʋ ɔkan ɔmá bamba ɛsʋ, mɛnɩ ɩmɔ́ɔbwɛ fɛ anɩlapʋ ɔtɩnɛá ɔkʋ lagyankpa yɔ agyʋma tsu ɩwɩ.
17Tamɛ Bulu asʋn wanlɩnhɛ amʋ lɛblɩ ɔbɛɛ, “Ɔhagyiɔha ánɩ́ ɔbɛɛ, mótsu ɩwɩ a, ɔpʋ tɔá anɩ Wie labwɛ tsu ɩwɩ.” 18Tsufɛ nɩ Bulu ɔkanfʋ fʋ gyi asʋn, ɩwɩ kanfʋ mʋ́ kpaalɩ igyi.
Currently Selected:
2 Korintofɔ 10: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation