2 Korintofɔ 5
5
1Anɩ ɔyʋlʋ anfɩ igyi fɛ kantankpa ánɩ́ anɩtsie mʋ́tɔ. Nɩ bobwie mʋ́ a, Bulu ɔbɛ́ha anɩ obu bamba ɔsʋsʋ. Mʋmʋ a, megyi nyankpʋsa leyi mʋ́. Mʋ onuto leyi mʋ́, imóobwie ɛkɛkɛɛkɛ. 2Tsufɛ sei kʋraa ɩdɛ anɩ ipian ɔsʋlʋsʋ-ɔyʋlʋ anfɩtɔ. Anɩhɩɛ anɩgyo ɛkɛá ɔbɔ́pʋ anɩ ɔsʋsʋ-ɔyʋlʋ wa anɩ fɛ atadɩɛ. 3Mʋmʋ anɩmɔ́ɔbwɛ fɛ ɔŋɛá ɩma ɔyʋlʋ, anɩna yaya. 4Ɩdɛ anɩ pian, anɩdɛkɩmɩ brɛ anfɩ anɩtra anɩbʋ anɩ ɔyʋlʋ dada anfɩtɔ. Megyi bɛɛ anɩdekleá awu, adalɩ ɔyʋlʋ anfɩtɔ. Mboun anɩdekleá Bulu ɔwa anɩ ɔsʋsʋ klɛ amʋʋ ɩtamawu plɔ amʋ, mɛnɩ ibégyi mʋ́ anfɩ itowu plɔ anfɩsʋ. 5Bulu onuto lɛla anɩ yaɩ ha mʋ́, ɔlɔpʋ Ɔŋɛ Wankɩhɛ amʋ wa anɩtɔ. Mʋ́gyi ibwiá ɔlɛdɩnka mʋ́sʋ nɩ.
6Mʋ́ sʋ anɩtɔwa klʋn bregyibrɛ. Ɩbʋ mʋ́tɔá brɛ anfɩ anɩbʋ ɔsʋlʋsʋ-ɔyʋlʋ anfɩtɔ a, anɩbʋ ɩfɔ anɩ Wie wa. 7Ɩnɩ sʋ hogyi anɩlapʋ anɩtsie nkpa, megyi tɔá ansibi dewun. 8Ee! Anɩhɩɛ anɩdɛ klʋn wa, tsufɛ tɔá anɩhɩɛ anɩdedunka gyi abɔ́wa ɩfɔ ɔsʋlʋsʋ-ɔyʋlʋ anfɩ wa, ayetsia anɩ Wie wa. 9Mʋ́ sʋ nɩ anɩbʋ ɔsʋlʋsʋ nfɩ o, ɔtɩnɛ bamba o, tɔá ɩdɩn anɩ klʋnsʋ brɛ fɛ́ɛ́ gyi, abɔ́bwɛ tɔá ibégyi anɩ Wie ansɩ. 10Tsufɛ anɩ fɛ́ɛ́ abɛ́yɛlɩɩ Kristo ansɩtɔ, obégyi anɩtɔ okugyiɔkʋ asʋn, ka mʋ ɩkɔ anɩ ɔsʋlʋsʋ-ɔyʋlʋ anfɩ bwɛhɛ ɔnɔ. Yile igyi o, lalahɛ igyi o.
Bulu Onyawielɛ
11Anɩhɩɛ anɩyin ánɩ́ ilehian ánɩ́ abénya anɩ Wie ifu. Mʋ́ sʋ anɩdɛtɔɩ kpla aha anɩaa, amʋ́ ɛ bʋnya mʋ ifu. Bulu hɩɛ oyin anɩ. Nahogyiá mlɩ ɛ mlɩyin anɩ mlɩ klʋntɔ. 12Megyi ɩwɩ anɩtra anɩdetsu suna mlɩ. Mboun anɩdɛ mlɩ ɔkpa suna, mɛnɩ mlótsu ɩwɩ anɩ sʋ. Fówun nɩ aha bʋdɛ ɩwɩ tsu tɔá ɔha tɔpʋ ansibi wun sʋ, imegyi tɔá ɩbʋ ɔha klʋntɔ sʋ a, mlénya ɩkʋ bla amʋ́. 13Tsufɛ nɩ bɛɛ anɩ nwun layinta kʋraa a, Bulu asʋn igyi. Tamɛ nɩ bɛɛ anɩ ansɩtɔ da mʋ́ a, ɩda ha mlɩ. 14Ɔdwɛ amʋʋ Kristo bʋ ha anɩ amʋ dɛ anɩ kpa, tsufɛ anɩlanu ɩwɩasɩá mʋ nkʋlɛ lowu ha aha fɛ́ɛ́. Mʋ́ sʋ mʋa aha fɛ́ɛ́ bawu. 15Olowu ha aha fɛ́ɛ́ lɛlɛ, mɛnɩ aha ánɩ́ bénya nkpa pɔpwɛ amʋ bʋmɛ́ɛtra tsia nkpa alɩá bʋdekle. Mboun bétsia nkpa ha Kristo amʋʋ olowu, Bulu lɔkʋsʋa mʋ ha amʋ́ amʋ.
16Ɩnɩ sʋ anɩtra anɩmɛdɛ ɔhaa kɩ fɛ alɩá ɔyɩtɔ aha bʋtɛkɩ mʋ. Ɩbʋ mʋ́tɔá brɛ amʋ anɩletsia kɩ Kristo fɛ alɩá ɔyɩtɔ aha bʋtɛkɩ mʋ, tamɛ anɩtra anɩmɛdɛ mʋ kɩ alɩ. 17Mʋ́ sʋ nɩ ɔha mʋa Kristo bɔbwɛ ɩkʋlɛ a, alabwɛ ɔha pɔpwɛ. Mʋ tsiatɔ dada amʋ fɛ́ɛ́ ɩlatsʋn. Mʋ tsiatɔ labwɛ pɔpwɛ! 18Nkpa pɔpwɛ anfɩ itsu Bulu wa. Mʋlɔtsʋn Kristosʋ bwɛ anɩ anfɩ anɩgyi mʋ alupʋ anfɩ mʋ anyawie. Alapʋ agyʋma anfɩ wa anɩ ɩbɩtɔ, ɔbɛɛ alɛ aha bamba ɛ anyawie ha mʋ. 19Tsufɛ Bulu lɔtsʋn Kristosʋ ɔdɛ ɔyɩtɔ aha damli bwɛ mʋ anyawie. Ɔtra ɔmɛdɛ amʋ́ lakpan ɩwɩ akunta bu ha amʋ́. Ɩnɩ ɔlɔpʋwa anɩ ɩbɩtɔ ɔbɛɛ, abla aha nɩ.
20Kristo atsɩamɩ anɩgyi, Bulu dɛtɔɩ tsʋn anɩsʋ ha mlɩ. Mʋ́ sʋ anɩlɩɩ Kristo ɔlɩɩkpa anɩdɛ mlɩ kokoli anɩaa, “Mlɩha Bulu ɔbwɛ mlɩ mʋ anyawie!” 21Tsufɛ Kristo mɔbwɛ lakpan kʋkʋ! Tamɛ Bulu lɔpʋ mʋ bɔ afɔdɩɛ anɩ lakpan sʋ, mɛnɩ ɔbɔ́tsʋn anɩa mʋnyɔ ɩkʋlɛbwɛsʋ tsu anɩ ánɩ́ anɩ asʋn da ɔkpa mʋ ansɩtɔ.
Currently Selected:
2 Korintofɔ 5: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation