1 Tesalonikafɔ 5
5
Ɩwɩsʋda Gyo Anɩ Wie Ɩba
1Apio, imehian ánɩ́ abɔ́wanlɩn brɛ pʋ́ ɛkɛá asʋn anfɩ ɩbɛ́ba sɩsɩ mlɩ. 2Tsufɛ mlɩ onuto mlɩyin ánɩ́ anɩ Wie ɔbakɛ amʋ ɩbɛ́ba bofwie anɩtɔ, fɛ alɩá owikplu tɛba onye. 3Brɛá aha bɛɛ, “Owi lata; asʋn lata.” a, alɩ brɛ amʋtɔ bɛ́hɩ nɩ. Ibófwie amʋ́tɔ fɛ alɩá ɩkwɩɩ tɛkan ɔtsɩ ɔtsawʋlɛ pɛ. Ɔhaa mɛ́ɛdalɩ mʋ́tɔ. 4Tamɛ apio, mlɩ mʋ́ mlɩyin asʋn anfɩ. Mʋ́ sʋ mlɩmétsie okluntɔ, mɛnɩ ɛkɛ amʋ mɛ́ɛba bofwie mlɩtɔ fɛ owikplu. 5Wankɩ mʋ́a ɔyɩkɛhɛtɔ abi mlɩ fɛ́ɛ́ mlɩgyi. Megyi onye ntɛ okluntɔ abi anɩgyi. 6Mʋ́ sʋ mlɩha agyo, anɩmádɩdɩ fɛ aha bamba. Mlɩha adɩnka ansɩ ɩwɩsʋ, akɩ ɩwɩsʋ wanklaan. 7Onye adɩdɩpʋ bʋtɛdɩdɩ. Onye nta abʋpʋ ɛ bʋtɔbʋ nta. 8Tamɛ anɩ mʋ́ a, wankɩtɔ abi anɩgyi. Mʋ́ sʋ mlɩha agyi ɩwɩsʋ. Mlɩha Kristo hogyi pʋ́ anɩ abadwɛ ɩbwɛ kantɔ-atintɔ tin anɩ kantɔ. Mʋ ɔkpakɩá ɔbɔ́hɔ anɩ nkpa ɩbwɛ kʋtʋpa ánɩ́ ibun anɩ nwun. 9Megyi alɩá Bulu obénya ɔblɔ wa anɩ, bɩtɩ anɩ ɩsʋ sʋ ɔlɛlɛ anɩ. Mboun alɩá ɔbɔtsʋn anɩ Wie Yesu Kristosʋ hɔ anɩ nkpa sʋ. 10Kristo lowu ha anɩ, mɛnɩ mʋ babɩ a, nɩ anɩlawu o, anɩbʋ nkpa o, anɩa mʋnyɔ abétsia. 11Mlɩpʋ asʋn anfɩ kɩta klʋn wa aba ɩwɩtɔ, pʋwa aba ɔwʋnlɩn, fɛ alɩá mlɩdɛ mʋ́ bwɛ dodo.
Ɩkla
12Apio, abwii ɩpa ha mlɩ, mlɩbu mlɩ ɔnɔ alɩɩpʋá bʋhɩɛ bʋdɛ agyʋma yɔ mlɩtɔ, bʋdɛ mlɩ anɩ Wie tsiatɔ suna. 13Gyʋma amʋʋ bʋdegyi amʋ sʋ mlɩhɩɛ bu amʋ́, amlɩdwɛ amʋ́. Iwilwii itsia mlɩa mlɩ aba nsɩnɛ.
14Apio, anɩdɛ mlɩ ɔla da anɩaa, mlɩtɔɩ kpla awʋlɩyɔpʋ. Mlɩwa afupʋ atɛtɔ-ɔnlɩn. Mlɩbʋa amʋ́á bapɔn, amlɩnya klʋn ha ɔhagyiɔha. 15Mlɩkɩá ɔha mɔ́ɔpʋ lalahɛ ka mʋ ba ɩkɔ. Mboun mlɩbwɛ yile ha aba pʋ́ aha fɛ́ɛ́.
16Ansɩ igyi mlɩ, 17amlɩbɔ mpaɩ bregyibrɛ. 18Mlɩda Bulu ɩpan togyitɔtɔ. Mʋ́gyi tɔá Bulu dedunka tsu mlɩ wa mlɩ nkpatɔ, brɛ anfɩ mlɩa Kristo Yesunyɔ mlɩlabwɛ ɩkʋlɛ anfɩ nɩ.
19Mlɩmákina tɔá Ɔŋɛ Wankɩhɛ amʋ tekle bwɛ.#5:19 Ntɛ Mlɩmádun Ɔŋɛ Wankɩhɛ ogya amʋ. 20Mlɩmábu Bulu ɔnɔsʋ atɔɩpʋ asʋn amʋ tɔkʋ odu. 21Mlɩsɔ togyitɔ kɩ, amlɩkɩta mʋ́á ɩbʋ alɛtɔ kinkiinkin. 22Mlɩkina lalahɛ kugyikʋ.
23Bulu tɛha anɩ iwilwii. Ɔtɩn mlɩ ɩwɩ ɔkpagyiɔkpasʋ. Ɔkɩ mlɩ nyankpʋsa-oyi, mlɩ ɔŋɛ pʋ́ mlɩ ɔklasʋ tsu lalahɛ kugyikʋtɔ, mɛnɩ ɔlala méetsia mlɩ ɩwɩ anɩ Wie Yesu Kristo ɔbakɛ amʋ. 24Bulu lɛtɩ mlɩ. Ɔnɔkwalɩpʋ ogyi, ɔbɔ́bwɛ mʋ́.
25Apio, mlɩbɔ mpaɩ ha anɩ ɛ.
26Aha ahogyipʋ amʋ fɛ́ɛ́ itsia gyagyagya. Mlɩlata aba puta ɔdwɛsʋ.
27Ndɛ mlɩ bla anɩ Wie ɩdatɔ mbɛɛ, mlɩkla ɔwʋlʋ anfɩ suna ahogyipʋ amʋ fɛ́ɛ́.
28Anɩ Wie Yesu Kristo ogyi mlɩ bʋalɛ.
Currently Selected:
1 Tesalonikafɔ 5: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation