1 Yohane 5
5
Tsiatɔ Lalahɛsʋgyi
1Ɔhagyiɔha ánɩ́ olohogyi ɔbɛɛ, Yesu gyi Kristo, (ɔha ánɩ́ Bulu lada mʋ ofuli amʋ) a, Bulu mʋ Bi ogyi. Nɩ fʋtɔdwɛ ɔkwɩɩpʋ a, fɔ́dwɛ mʋ bi ɛ. 2Mʋ́ sʋ nɩ anɩdɛ Bulu dwɛ, anɩdɛ mʋ mblasʋ gyi a, mʋ́ abɔ́pʋbɩá anɩdɛ mʋ abi dwɛ nɩ. 3Nɩ anɩdɛ Bulu dwɛ a, abégyi mʋ mblasʋ. Mʋ mbla amʋsʋ gyi ɛ ɩma ɔnlɩn. 4Tsufɛ Bulu mʋ bi okugyiɔkʋ tɛtalɩ gyi tsiatɔ lalahɛsʋ. Anɩ hogyi anɩtɔpʋgyi mʋ́sʋ. 5Ma ɔbɛ́talɩ gyi tsiatɔ lalahɛsʋ? Ɔha ánɩ́ olohogyiá Yesu gyi Bulu mʋ Bi amʋ nkʋlɛ ɔbɛ́talɩ gyi mʋ́sʋ.
Yesu Kristo Ɩwɩ Adansɩɛgyi
6Yesu Kristo gyi ɔha ánɩ́ ɔlɔtsʋn ntsu mʋ́a obugyatɔ ba. Megyi ntsu nkʋlɛtɔ ɔlɔtsʋn. Ɔlɔtsʋn obugyatɔ ɛ. Ɔŋɛ Wankɩhɛ amʋ legyi asʋn anfɩ ɩwɩ adansɩɛá igyi ɔnɔkwalɩ. Ɔtamawa afunu. 7Atɔ asa legyi Yesu ɩwɩ adansɩɛ. 8Mʋ́gyi, Ɔŋɛ Wankɩhɛ, ntsu pʋ́ obugya. Atɔ asa anfɩ fɛ́ɛ́ lɛblɩ toku kʋlɛ. 9Nɩ aha begyi adansɩɛ suna anɩ, anɩtohogyi a, mʋmʋ ilehian ánɩ́ abɔ́hɔ Bulu klɛ dʋn. Tsufɛ mʋ onuto legyi mʋ Bi amʋ ɩwɩ adansɩɛ. 10Ɔhagyiɔha ánɩ́ ɔlɔhɔ Bulu mʋ Bi amʋ gyi lahɔ Bulu adansɩɛ anfɩsʋ gyi mʋ klʋntɔ. Alɩ kɛn ɔhagyiɔha ánɩ́ ɔmɔhɔ Bulu adansɩɛ anfɩsʋ gyi dɛ mʋ afunutɔ wa nɩ. Tsufɛ ɔmɔhɔ adansɩɛ amʋʋ Bulu legyi tsu mʋ Bi ɩwɩ amʋsʋ gyi. 11Adansɩɛ amʋ gyi, Bulu lapʋ nkpa ánɩ́ ɩtamata ha anɩ tsʋn mʋ Bi amʋsʋ. 12Ɔhagyiɔha ánɩ́ ɔbʋ Bulu mʋ Bi amʋ bʋ nkpa ánɩ́ ɩtamata. Alɩ kɛn ɔhagyiɔha ánɩ́ ɔma Bulu mʋ Bi amʋ má nkpa ánɩ́ ɩtamata nɩ.
Asʋn Trahɛ
13Mlɩlahɔ Bulu mʋ Bi amʋ gyi. Mʋ́ sʋ ndɛ ɔwʋlʋ anfɩ wanlɩn sɩsɩ mlɩ, mɛnɩ mlɛ́bɩá mlɩbʋ nkpa ánɩ́ ɩtamata. 14Tɔá ɩtɛha anɩtɔwa klʋn yɔ Bulu ansɩtɔ gyi, akʋlɩ mʋ togyitɔá igyi mʋ apɛ a, otonu anɩ ɔmɛ. 15Nɩ anɩyin ánɩ́ otonu anɩ ɔmɛ a, mʋmʋ akʋlɩ mʋ togyitɔ a, anɩyin ánɩ́ ɔbɛ́ha anɩ.
16Mʋ́ sʋ nɩ ɔkʋ owun mʋ ba Okristoyin dɛ lakpan bwɛ a, ɔbɔ mpaɩ ha mʋ. Bulu ɔbɛ́ha mʋ nkpa. Aha ánɩ́ amʋ́ lakpan mɛ́ɛkpa amʋ́ wa lowutɔ asʋn ndɛblɩ. Lakpan kʋ bʋ ɩnʋá ɩtɛkpa ɔha wa lowutɔ. Megyi ɔha ánɩ́ ɔbwɛ lakpan amʋ odu mbɛɛ, mlɩbɔ mpaɩ ha. 17Lalahɛ kugyikʋ igyi lakpan, tamɛ lakpan kʋ bʋ ɩnʋá ɩtamakpa ɔha wa lowutɔ.
18Anɩyin ánɩ́ ɔha ánɩ́ alabwɛ Bulu mʋ bi ɔkʋkʋ tamatsia bwɛ lakpan, tsufɛ Bulu mʋ Bi amʋ togyo mʋ ɩwɩ. Ɩnɩ sʋ Ɔbʋnsam tamatalɩ bwɛ mʋ tɔtɔ.
19Anɩyin ánɩ́ Bulu aha anɩgyi, tamɛ Ɔbʋnsam dɛ ɔyɩtɔ aha fɛ́ɛ́sʋ gyi.
20Anɩyin ánɩ́ Bulu mʋ Bi amʋ laba. Alaha anɩlanu asʋn asɩ, mɛnɩ abɛ́bɩ Bulu Ɔnɔkwalɩpʋ amʋ. Anɩa mʋnyɔ anɩlabwɛ kʋlɛ, anɩa mʋ Bi Yesu Kristo ɛ anɩlabwɛ kʋlɛ. Lɛlɛ a, mʋ nkʋlɛ pɛ gyi Bulu Ɔnɔkwalɩpʋ pʋ́ nkpa ánɩ́ ɩtamata amʋ nɩ.
21Mʋ́ sʋ mɩ abi adwɛpʋ, mlɩkɩ mlɩ ɩwɩ wanklaan ɩkpɩsumsʋ.
Currently Selected:
1 Yohane 5: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation