JOHANA 6
6
Mipui sângnga hrai
(Mt 14.13-21; Mk 6.30-44; Lk 9.10-17)
1Chûng thil hnuah chuan, Isua chu Galili dîl, Tiberia dîl an tih râl lehlamah chuan a kal ta a. 2Tin, damlote chunga chhinchhiahna a tihte chu an hmuh avângin, mipui tam takin amah an zui a. 3Tin, Isua chu tlângah chuan a kal chho va, chutah chuan a zîrtîrte hnênah a ṭhu a. 4Tin, Kalhlên Kût (Juda-te kût chu) a hnai tawh a.
5Tin, Isua chu a dâk a, mipui tam takin a hnên lam rawn panin a hmu a, Philipa hnênah, “Hêngho ei tûr chhang khawi ata nge kan lei ang?” a ti a. 6Chûng thu chu amah fiah nân a sawi a ni, a tih tûr chu amahin a hre reng si a. 7Tin, Philipa chuan a hnênah, “Mi tinin tlêm têa an chan ṭheuh tûr pawh, duli zahnih man chhangin a daih lo vang,” a ti a, a chhâng a. 8Tin, a zirtîrte zînga pakhat, Simon Petera unau Andria chuan a hnênah, 9“Barli chhangpêr panga leh sangha pahnih nei mipa naupang pakhat hetah a awm; nimahsela, mi hêng zozai zîngah hian chûng chu eng tham nge ni ang?” a ti a. 10Tin, Isuan, “Mite chu ṭhuttîr rawh u,” a ti a. Tin, chumi hmunah chuan hlobet tam tak a awm. Chutichuan, patlingte chu an ṭhu a, an tam lam chu sângnga lai an ni a. 11Tin, Isuan chhangpêrte chu a la a, lâwmthu a sawi zawhin a ṭhuhote hnênah chuan a sem a, chutiang bawkin sanghate pawh chu an duh tâwkin a sem bawk a.
12Tin, an kham hnuin, a zirtîrte hnênah chuan, “Eng mah bo lo tûrin a bângnawite chhar rawh u,” a ti a. 13Chutichuan, an chhar a, barli chhangpêr panga eitute ei bângnawite chuan bâwmrâng sâwm leh pahnih an tikhat a.
14Tin, mite chuan chhinchhiahna a tih chu an hmuh veleh, “He mi hi zâwlnei, khawvêla lo kal tûr kha a lo nih ngei hi,” an ti a. 15Chutichuan, amah chu lala siam tûra man luih tumin an lo kal dâwn tih Isuan a hria a, tlângah amah chauhvin a kal hrang leh ta a.
Tui chunga kal
(Mt 14.22-33; Mk 6.45-52)
16Tin, khua a lo tlai lam chuan a zirtîrte chu dîlah chuan an zuk kal a; 17lawngah an chuang a, dîlah chuan Kapernaum khua an pan a. Tin, khua a thim ta a, Isua lah chu an hnên a la thleng si lo. 18Thlipui nasa tak a tleh avângin tui a fâwn sâng telh telh si a. 19Tin, fîng sawmhnih leh fîng nga emaw, fîng sawmthum emaw an kar chuan Isua chu dîl chungah chuan kea kala lawng rawn hnaihin an hmu a, an hlau va. 20Nimahsela, ani chuan an hnênah, “Keimah ka ni alâwm, hlau suh u,” a ti a. 21Chutichuan, lawngah chuan chuantîr an duh ta a; tin, chawplehchilhin lawng chuan an pan khawmual chu a thleng ta nghâl a.
Mipuiin Isua an zawng
22A tûkah chuan dîl râl lehlama mipui dingte chuan, lawng pakhat lo chu lawng dang a awm lo va, Isua chu a zirtîrte hnênah lawngah chuan a chuang ve lo va, a zirtîrte chu anmahni chauhvin an kal tih an hria a. 23(Nimahsela, Lalpan lâwmthu a sawi hnua chhang an eina hmun kiangah khân, Tiberia khua aṭangin lawng tête a lo thleng si a.) 24Chutichuan, mipui chuan Isua leh a zirtîrte chu an awm ta lo tih an hriatin, anni pawh lawng têahte chuan an chuang a, Isua zawngin Kapernaum khua an lo thleng a.
Isua-nunna chhang
25Tin, dîl râla an rawn hmuhin a hnênah, “Rabbi, eng tikah nge he lam i lo thlen?” an ti a. 26Tin, Isuan an hnênah, “Tihtak meuhvin, tihtak meuhvin ka hrilh a che u, chhinchhiahnate in hmuh avanga mi zawng in ni lo va, chhangpêr in ei puar avâng khân a nih zâwk hi. 27Chaw dangral mai ûmin phe phe suh u; chatuana nun thlenga awm reng tûr chaw, Mihring Fapain a pêk tûr che u chu, ûmin phe zâwk rawh u; Pa Pathian chuan ani chu a chhinchhiah tawh si a,” a ti a, a chhâng a.
28Tin, anni chuan a hnênah, “Pathian hna kan thawh theih nân thil eng nge kan tih tûr?” an ti a. 29Tin, Isuan an hnênah, “Pathian hnathawh chu hei hi a ni, a mi tirh hi ring ula,” a ti a, a chhâng a. 30Tin, anni chuan a hnênah, “Chhinchhiahna eng nge i tih ang, kan hmuha kan rin theihna tûr chein? Thil eng nge i tih ang? 31Kan thlahtuten thlalêrah manna kha an ei ṭhîn, ‘Vân aṭang chuan an hnênah chhang ei tûr a pe,’ tih ziak angin,” an ti a. #Ex 16.4,15; Sam 78.24
32Tin, Isuan an hnênah, “Tihtak meuhvin, tihtak meuhvin ka hrilh a che u, vân aṭanga chhang in hmuh kha Mosia pêk che u a ni lo; ka Pa erawh chuan vân aṭangin chhang tak a pe che u a nih hi. 33Pathian chhang chu vân aṭanga lo chhuka, khawvêl hnêna nun petu hi a ni,” a ti a. 34Tin, anni chuan a hnênah, “Lalpa, chu chhang chu kumkhuain min pe rawh,” an ti a.
35Tin, Isuan an hnênah, “Kei hi nunna chhang chu ka ni; tu pawh ka hnêna lo kal chu a ril a ṭâm lo vang, tu pawh mi ring chu eng tikah mah a tuihâl lo vang. 36Nimahsela, nangnin mi hmuh pawhin mi ring si lo tih ka hrilh che u kha. 37Pain mi pêk zawng zawng ka hnênah an lo kal vek ang; tu pawh ka hnêna lo kal chu ka hnawt chhuak tawp lo vang. 38Mahni duh zâwng ti tûra vân aṭanga lo chhuk ka ni lo va, mi tîrtu duh zâwng ti tûra lo chhuk ka ni zâwk e. 39Hei hi mi tîrtu duh zâwng chu a ni, anin mi pêk zawng zawng eng mah hloh lo ila, ni kin nîah chuan kai tho zâwk ila. 40Tin, hei hi ka Pa duh zâwng a ni, tu pawh Fa hmua, ring apiangin chatuana nunna nei sela; tin, keiin ni kin nîah chuan ani chu ka kai tho vang,” a ti a.
41Tin, “Vân aṭanga chhang lo chhuk chu ka ni,” a tih avângin Juda-te chu a chungah an phunnawi a. 42“He mi hi Josefa fa, Isua a ni lo vem ni, a nu leh pa pawh kan hriat hi? ‘Vân aṭanga lo chhuk ka ni,’ eng ti tiha ti nge ni le?” an ti a.
43Tin, Isuan an hnênah, “Phun phunnawi suh u. 44Pa mi tîrtuin a hîp loh chuan tu mah ka hnênah an lo kal thei lo vang; tin, keiin ni kin nîah chuan a lo kala chu ka kai tho vang. 45Zâwlneite lehkhabuah, ‘Pathian zirtîrin an awm vek ang,’ tih ziak a ni. Mi tin Pa thu hriaa zir apiang chu ka hnênah an lo kal ṭhîn. #Is 54.13 46Tu mahin Pa an hmu ngai ka ti lo, Pathian hnêna lo chhuaka chauh lo chuan; ani chuan Pa chu a hmu. 47Tihtak meuhvin, tihtak meuhvin ka hrilh a che u, tu pawh a ring chuan chatuana nunna an nei tawh a ni. 48Kei hi nunna chhang ka ni. 49In thlahtuten thlalêrah manna kha an ei na a, an thi a. 50Hei hi vân aṭanga chhang lo chhuk chu a ni, miin a eia a thih loh nân. 51Kei hi vân aṭanga chhang nung lo chhuk chu ka ni, tu pawhin he chhang hi a ei chuan chatuanin a nung reng ang; a ni, khawvêl nun nâna ka pêk tûr chhang chu ka tisa hi a ni,” a ti a.
52Chutichuan, Juda-te chu an inhnial a, “He mi hian engtin nge a tisa ei tûrin min pêk theih ang?” an ti a.
53Tin, Isuan an hnênah, “Tihtak meuhvin, tihtak meuhvin ka hrilh a che u, Mihring Fapa tisa in eia, a thisen in in bawk loh chuan, nangmahniin nunna nei hek lo che u. 54Tu pawh ka tisa eia ka thisen in chuan chatuana nunna a nei tawh; tin, ni kin nîah chuan ani chu ka kai tho vang. 55Ka tisa hi chaw tak a ni a, ka thisen hi in tûr tak a ni si a. 56Tu pawh ka tisa eia ka thisen in chu, keimahah a awm reng ṭhîn, kei pawh amahah ka awm reng ṭhîn. 57Pa nung chuan mi tîr a, Pa zâra nung ka ni ang bawkin, tu pawh mi ei chu keima zârah ani pawh a nung ang. 58Hei hi vân aṭanga chhang lo chhuk chu a ni; chi thlahtuten chhang an ei a, an thi ang kha a ni lo, tu pawh hemi chhang hi ei chu chatuanin a nung reng ang,” a ti a.
59Chûng thu chu inkhâwmna inah a sawi a, Kapernaum khuaa a zirtîr lai khân.
Chatuan nunna thu
60Chutichuan, a zirtîrte a ṭhen tam takin chu chu an hriatin, “Hei hi thu khirh tak a ni, tu nge dawngsawng thei ang?” an ti a.
61Chutichuan, chumi thûah chuan a zirtîrte an phunnawi tih Isuan a rilruin a hria a, an hnênah, “He thu hian a tilungni lo che u elo? 62Mihring Fapa hi hmâna a awmna ngaia lâwn chhova in hmuh chuan, engtin nge in tih ang le? 63Tinungtu chu thlarau a ni, tisa chu eng mahah a tlâktlai lo; in hnêna thu ka sawite hi thlarau a ni, nunna pawh a ni. 64Nimahsela, in zîngah a ṭhen ring lo in awm e,” a ti a. (Isuan amah ring lotute leh a mantîrtu tûr chu a tîr ata a hre reng si.) 65Tin, amah vêk chuan, “Chuvâng chuan a ni, in hnênah, ‘Pain a puih loh chuan tu mah ka hnênah an lo kal thei lo vang,’ ka tih kha ni,” a ti a.
66Chu veleh a zirtîrte zînga tam tak an kal bo va, amah an pâwl leh ta lo va. 67Chutichuan, Isuan sâwm leh pahnihte hnênah chuan, “Nangni pawhin kal bo in duh ve em?” a ti a. 68Tin, Simon Peteran a hnênah, “Lalpa, tu hnênah nge kan kal ang? Nangin chatuana nunna thu i nei alâwm. #Mt 16.16; Mk 8.29; Lk 9.20 69Nang Pathian Mi Thianghlima chu i ni tih kan âwih ta a, hriat pawh kan hria e,” a ti a, a chhâng a. 70Tin, Isuan an hnênah, “Nangni sâwm leh pahnihte hi keima thlan in ni lâwm ni? In zînga mi pakhat Diabola a ni lehnghâl vei nên,” a ti a. 71(Iskariot Simona fapa Juda, sâwm leh pahnihte zînga tel vea thu kha a sawi a ni, ani chu a mantîrtu tûr a ni si a.)
Currently Selected:
JOHANA 6: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.