EZEKIELA 1
1
PATHIAN INLARNA PAKHATNA
(1.1—7.27)
Pathian Lalṭhutthlêng
1Kum sawmthumna, thla lina, ni nganaah chuan, kei Ezekiela, puithiam Buzia fapa chu Babulon rama Kebar lui kama Juda sal tângte zîngah ka awm a, vân a lo inhawng a, Pathian inlârna ka hmu a.#Thup 19.11 2Lal Jehoiakina sala a tân kum ngana a ni.#2 Lal 24.10-16; 2 Chr 36.9-10 3Babulon rama Kebar lui kamah chuan Lalpa thusawi ka hria a, a thiltihtheihna chuan mi tuam a.
4Tin, ka han en a, hmâr lam ata thlipui nasa tak lo thawk ka hmu a. Chhûmpui nasa tak aṭang hian kâwl hi a lo phe zawr zawr a, a kiang vêlte chu a êng pup mai a. Kâwl a phêtnaah chuan êng eng emaw, dâr tle mi ang hi a awm a. 5Thlipui lai takah chuan thil nung pali ang, mihring ruangâm pu ka hmu a,#Thup 4.6 6hmai pali leh thla pali an nei ṭheuh va. 7An ke an thluang a, bâwng tin ang an nei a, dâr tle mi angin an êng a. 8Hmai pali leh thla pali bâkah chuan mihring kut ang pali an nei ṭheuh va, an thla hnuaiah zêl a awm a. 9Thil nungte chuan an thla pahnih an zâr pharh ṭheuh chuan an thla hmâwrte chu a intawk pha a. Kil li neiin an ding a, an chêt sawn pawhin an zain an taksa her chuang lovin an che sawn ṭhîn a ni.
10Thil nung palite chuan hmai pali an nei ṭheuh va, an hma lamah mihring hmêl an pu a; ding lamah sakeibaknei hmêl ang, vei lamah bâwngpa hmêl ang, hnung lamah mupui hmêl ang.#Ezek 10.14; Thup 4.7 11Thil nung paliten an thla pahnih ṭheuh chu a hmâwr intawk phain an zâr ṭheuh va, a dangte chu an taksa hrûlah an khup a. 12Thil nungte chuan khawi lam pawh an hawi sa vek a ni, inher lovin thlarauvin a duhna lam apiangah an kal ho thei. 13Thil nungte zîngah chuan, êng eng emaw, meichher alh deuh ang mai hi a awm a, eng lai pawhin a che a. Mei chu a alh êng pup a, kâwlphe angin a êng chhuak zuai zuai a.#Thup 4.5 14Thil nungte chu kâwlphe angin an vir tawn zawk zawk a.
15Thil nung palite chu ka en reng lai chuan, tawlailîr ke pali thil nung pali zâwn ṭheuhva awm, leia innghat ka hmu bawk a.#Ezek 10.9-13 16Tawlailîr ke palite chu inang vek a ni a, lunghlu angin an êng ṭheuh va, tawlailîr ke pakhat chhûnga tawlailîr ke dang awm ang a ni. 17Inher lovin khawi lam hawi pawhin an che sawn thei a ni. 18Tawlailîr ke bial tlângte chu kual kung mai, râpthlâk tak a ni a, mitin a khat a.#Thup 4.8 19Thil nungte chu an kal sawn apiangin tawlailîrte pawh chuan an zui ve zêl a. 20Thil nungte chu thlarau duhna lam lamah an kal a, tawlailîrte pawhin thil nungte tih ang chiahin an ti ve a, thil nungte thlarau chu tawlailîr keahte a awm si a. 21Tichuan, thil nungte chu an kalin emaw, an dinin emaw, boruaka chawikân an nihin emaw, tawlailîrte pawh chutiang bawk chuan an awm ṭhîn, thil nungte thlarau chu tawlailîr keahte chuan a awm si a. 22Tin, thil nungte lû chung chu thil eng emaw, krustal lung tle mia siam ang hian a khuh kulh mai a.#Thup 4.6 23Chu thil awm kulh hnuaiah chuan thil nungte chu an ding a; an dawta mite lamah chuan an thla pahnih an zâr a, an thla pahnih dangin an taksa an khuh a. 24An thlawh laia an thla zâp ri chu ka hria a, tuifinriat fâwn ri ang leh sipai rual thâwm anga mipui ri mur mur thâwm leh Engkimtithei Pathian aw ang a ni. An thlawh loh chuan an thlate an khup a.#Thup 1.15; 19.6 25An thlawh loh lai pawhin an lû chung zâwn chung lama thil awm aṭang khân thil ri hum hum a awm tho va.
26Tin, an lû chunga vân dum chungah khân lalṭhutthlêng ang tak, sapphir lung ang maia lang hi a awm a; tin, lalṭhutthlêng ang tak chungah chuan mihring ang taka lang hi a awm a.#Ezek 10.1; Thup 4.2-3 27Tin, a kâwng achin chung lam chu ṭhihna puak sur ang maiin ka hmu a, a kâwng ni âwm achin hnuai lam chu mei ang mai hi niin ka hmu a, a êng vêl pup mai a.#Ezek 8.2 28Ruah sûr nia chhûm chunga chhimbâl lan dân ang mai hi a vêla êng lan dân chu a ni a. Hei hi Lalpa ropuina lan dân chu a ni. Tin, ka hmuhin bawkkhupin ka tlu a, thusawitu aw chu ka hria a.
Currently Selected:
EZEKIELA 1: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.