2 CHRONICLES 1
1
Lal Solomona finna dîlin a ṭawngṭai
(1 Lal 3.1-15)
1Tin, Davida fapa Solomona chu a ram chhûngah chuan tihchakin a awm a, Lalpa a Pathian chu a hnênah a awm a, nasa takin a tiropui a. 2Tin, Solomona chuan Israel-ho zawng zawng, sipai sâng hotu te, za hotu te, rorêltu te, Israel ram zawng zawnga mi lian, chhûngkaw puipa zawng zawng chu a bia a. 3Chutichuan, Solomona leh inkhâwmho zawng zawng chu Gibeon khuaa hmun sângah chuan an kal a; chutah chuan Lalpa chhiahhlawh Mosian thlalêra a siam Pathian biakna bûk kha a awm a ni. 4Pathian bâwm erawh chu Davidan a lo buatsaih tawhna hmunah Kiriath-jearim aṭangin Davida chuan a lo la chho tawh a; Jerusalem-ah a dahna tûr puan in a lo zâr sa tawh rêng a.#2 Sam 6.1-17; 1 Chr 13.5-14; 15.25—16.1 5Tin, Hura fa Uria fapa Bezalela siam dâr maichâm kha Lalpa biakna bûk bulah chuan a awm bawk a; tin, Solomona leh mipuihote chuan an va pan a.#Ex 38.1-7 6Solomona chu inbiakna puan in bula dâr maichâm awmna Lalpa hmaah chuan a han chho va, hâlral thilhlan sângkhat a han hlân a.
7Chumi zân chuan Solomona hnênah Pathian a inlâr a, a hnênah, “Eng nge ka pêk ang che, mi dîl rawh,” a ti a. 8Tin, Solomona chuan Pathian hnênah, “Ka pa Davida hnênah khân khawngaihna nasa tak i lantîr a, a aiawhin lalah mi lo siam ta a. 9Tichuan, aw Lalpa Pathian, ka pa Davida hnêna i thutiam kha tipuitling ang che; nangin vaivut zât zet mipuite lalah mi lo siam ta a.#Gen 13.16; 28.14 10Tichuan, hêng mipuiho hmaa lût leh chhuaka ka awm theih nân finna leh hriatna mi han pe ang che; i mi heti zozai hi tuin nge rorêlsak thei ang le?” a ti a. 11Tin, Pathianin Solomona hnênah, “Hetiang rilru i puta, sum leh pai te, hausakna te, chawimawina te, nangmah hawtu che nunna te dîl lova, dam reina te pawh dîl lova, an chunga lala ka siamna che ka mite ro i rêlsak theihna tûra finna leh hriatnate mi dîl zâwk avângin, 12finna leh hriatna chu pêk i ni tawh e; tin, i hmaa lalte pawhin an la neih ngai loh, i hnu pawha an neih hauh loh tûr sum leh pai te, hausakna te, chawimawinate ka pe bawk ang che,” a ti a.
Lal Solomona thuneihna leh a hausakzia
(1 Lal 10.26-29)
13Chutichuan, Solomona chu hmun sâng bula biak bûk awmna Gibeon khuaa a zin chu Jerusalem-ah a haw a, Israel-te chungah ro a rêl ta a. 14Tin, Solomona chuan tawlailîrte leh sakawr chung chuang mite a khâwm chiam a; tawlailîr sângkhat leh zali leh sakawr chung chuang mi sîngkhat leh sânghnih a nei a, chûng chu tawlailîr dahna khuaah te, Jerusalem khuaa lal awmnaah te chuan a dah a.#1 Lal 4.26 15Tin, lal chuan Jerusalem khuaah chuan rangkachak leh tangkaruate chu lung ang maia ngaih khawpin a dah ṭeuh va, sidar thingte chu phaia theipui thing ang leka ngaih khawpin a dah bawk a. 16Tin, Solomona neih sakawrte chu Aigupta ram ata rawn tawlh chhuah a ni a; lal sumdâwngtute chuan chûng chu a rual rualin an lo khâr ṭhîn a, a ruala lei zêl a ni.#Deut 17.16 17Aigupta rama mi tawlailîrte chu tangkarua sekel zaruk zêlin an tithleng ṭhîn a; tin, sakawrte chu tangkarua sekel za leh sawmnga zêlin; chutiang bawk chuan Hit-ho lal zawng zawng leh Suria lalte pawh an tihthlensak ṭhîn a ni.
Currently Selected:
2 CHRONICLES 1: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.