1 SAMUELA 1
1
Elkana leh a chhûngte Silo khuaah an kal
1Ephraim tlâng ram Ramathaim-zophim khuaah chuan mi pakhat a awm a, a hming chu Elkana a ni; chu mi chu Jehorama fapa a ni a, chu mi chu Elihua fapa a ni a, chu mi chu Tohua fapa a ni a, chu mi chu Ephraim mi Zupha fapa a ni. 2Tin, nupui pahnih a nei a: a pakhata hming chu Hani a ni a, a pakhata hming chu Penini a ni a; tin, Penini chuan fate a nei a, Hani erawh chuan fate a nei ve lo va. 3Tin, chu mi chu an khua aṭangin Silo khuaah Sipaihote Lalpa be tûr leh inthawi tûrin kum tin a han kal ṭhîn a. Chutah chuan Elia fapate pahnih, Hophnia leh Phinehasa, Lalpa puithiamte an awm a. 4Tin, Elkana inthawi ni a lo thlen chuan, a nupui Penini leh a fapate leh a fanute zawng zawng chu chanvo a siam a; 5Hani chu hmangaih êm êm mah se, Lalpan fa nei thei lova a siam avângin chan khat chauh a siamsak a. 6Fa a neih theih loh avânga a lungngaihna tizual tûrin amah ertu Penini chuan a lo deusawh ṭhîn a. 7Tin, chutianga kum tin a tih avângin Lalpa ina a han kal apiang chuan a lungngaihna chu a lo chawh thawhsak ṭhîn a; chutichuan, a ṭap a ṭap a, chaw pawh a ei lo va. 8Tin, a pasal Elkana chuan a hnênah, “Hani, engati nge i ṭah? Engati nge chaw i ei loh? Engati nge i thin a nat? Fapa sâwm ai pawhin i tân ka ṭha zâwk lâwm ni?” a ti a.
Hani leh Elia
9Chutichuan, Silo khuaa chaw an eia an in zawh chuan Hani chu a tho va. Tin, puithiam Elia chu Lalpa biak in kawngka ban bula a ṭhutnaah chuan a ṭhu a. 10Tin, Hani chu a rilru a mangang êm êm mai a, Lalpa hnênah a ṭawngṭai a, lungchhe takin a ṭap a. 11Tin, thu a tiam a, “Aw Sipaihote Lalpa, i bâwihnu tlâwmzia hi min hriatsak takmeuhva, min hriat renga, i bâwihnu hi min theihnghilh lohva, i bâwihnu hi fapa i pêk chuan, a dam chhûng zawng Lalpa ka pe ve thung ang a, a lû pawh meh rêng rêng a ni lo vang,” a ti a.#Num 6.5.
12Tin, heti hi a ni a, Lalpa hmaa a ṭawngṭai reng lai chuan Elia chuan a hmui phun chu a lo chhinchhiah a. 13Hani chuan a rilruin a sawi a, a hmui chauh a phu a, a aw chu hriat a ni lo va. Chuvângin, Elia chuan zu a rui niin a ring a. 14Chutichuan, Elia chuan a hnênah, “Eng chen nge rui renga i awm dâwn le? I uain chu dah bo rawh khai,” a ti a. 15Tin, Hani chuan, “Ka rui lo asin ka pu, hmeichhe rilru lungngai tâwpkhâwk ka ni a; uain pawh, zupui pawh ka in hauh lo va, Lalpa hmaah ka rilru ka phawrh zâwk a ni. 16I bâwihnu hi Beliala fanuah puh lul suh ang che; ka rilrua khat liam ka lungnih lohna leh ka lungngaihna ka sawi a nih hi,” tiin a chhâng a. 17Tin, Elia chuan, “Thlamuang takin kal rawh khai, Israel-te Pathian chuan i thil dîl chu pe che rawh se,” tiin a chhâng a. 18Tin, ani chuan, “I chhiahhlawhnu hian i mit lo tlung rawh se,” a ti a. Chutichuan, hmeichhia chu a kal ta a, chaw te a ei a, lungngai hmêl a pu ta lo va.
Samuela pian thu leh hlan thu
19Tin, zîng takah an tho va, Lalpa chu an bia a, an haw a, Rama khuaa an in chu an thleng leh ta a. Tin, Elkana chuan a nupui Hani chu a pâwl a; tin, Lalpa chuan ani chu a hre reng a. 20Chutichuan, heti hi a ni a, Hani chuan nau a pai a; tin, a hun a lo thlen chuan fapa a hring a; “Lalpa ka dîl a ni,” tiin a hmingah Samuela a sa a. 21Tichuan, Elkana leh a chhûngte zawng zawng chu Lalpa hnêna an kum tin inthawina hlân tûr leh a thutiam hlen tûrin an kal chho va. 22Hani erawh chu a kal chho ve lo va; a pasal hnênah chuan, “Kei zawng naupangin hnute hnêk a bân hma loh chuan ka kal chho ve lo vang e; chumi hnuah chuan Lalpa hmaa a inlan theih nân ka hruai ang a, chutah chuan a awm reng tawh dâwn nia,” a ti a. 23Tin, a pasal Elkana chuan a hnênah, “Ṭha âwm i tih apiang chuan ti rawh, a hnute hnêk i bântîr thlengin awm rawh; amaherawhchu, Lalpa chuan a thu chu tinghet ngei rawh se,” a ti a. Chutichuan, a hnute hnêk bân hma loh chuan hmeichhia chu a awm ta a, a fapa chu hnutê a hnêktîr a.
24Tin, hnute hnêk a bântîr chuan, chhangphut epha khat leh uain saidawiûm khat kengin sebâwng pathum nên a han hruai a, Silo khuaa Lalpa inah chuan a kalpui a. Naupang chu a la naupang hle a. 25Tin, bâwngpa chu an talh a, naupang chu Elia hnênah an hruai a. 26Tin, ani chuan, “Aw ka pu, i nunna chhâlin ka sawi e, kei chu e ka pu, hemi hmuna i kianga dinga Lalpa hnêna ṭawngṭai hmeichhia kha ka ni ngei a. 27He naupang dîl hian ka ṭawngṭai a ni a; tin, Lalpa chuan ka dîl chu min pe ta a. 28Chuvângin, kei pawhin Lalpa hnênah ka hlân a ni; a dam chhûng zawnga Lalpa tâna hlan a ni,” a ti a. Tin, chutah chuan Lalpa chu an bia a.
Currently Selected:
1 SAMUELA 1: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.