Matew 2
2
Pê mehkrã kreti kwỳ Jeju pupun prãmte me cato
Matew 2.1-23
1Pê Juta jõ pjê kam, Pãw jõ krĩ kam Jeju ihpỳm. Pê caxuaw Heroti pê Juta jõ pjê to ihhimpej catê. Ne amcro ata kam me hũmre krã kreti te amji jahkre pejti kwỳ ajco me caxêre cunea te amji kam hapac xà to me hahkre to me ipa. Ne cute me pyt japôj xà rũm, Juta jõ pjê kam, Krĩpinkrên wỳr me caxêti pupun, ne ma ihkôat pyt cjêj xà wỳr me pra. Ne krĩ mã me cator. 2Ne curia amehkrĩ catêjê cukij ne me cumã:
— Jõ ri mõrmõ jũm krare pê Juta catêjê jõ pahhi ata pỳm? He wa ite ihmat ri pyt japôj xà rũm, me ijõ pjê pĩn, ite me hõ caxêti pupun, na wa ajpên ite amehkĩn, ne amji mã hũpahti to prãmte hỹrmã me pra — hane.
3Mã Heroti pê Juta jõ pjê jõ pahhi ata te me hũjarẽn xà ita par, ne ampeaj kam, jũm te hũhhyr ne haxà kam pahhi na hàr na, cumã hũpa. Mã curia mehkrĩ catêjê cunea mã, pahhi ata te me kam incryc cumã hũpa. 4Mã cute Pahpãm mã mehcajrẽn catêjê jõ pahhi me, me cumã Mojxe xwỳ te me hapackre xà to hahkre catêjê te me cuprõn, ne pahhi pỳm xà na me hàhcukjêr to:
— Jõ ri quê ha Crixtô pê pahhi na Pahpãm te capi ne ihkujahêc ita ihpỳm? — hajỹr. 5Mã cute me cumã harẽn to:
— Ita ri Juta jõ pjê kam, Pãw jõ krĩ kam ri ihpỳm xà. Ampo na? He pê ramã Pahpãm jarkwa to mehcakôc catêjê Pahpãm jõ kàhhôc kam ita na mehhôc to me hane he:
6“Pãw jõ krĩ, acrire cakrô,
krĩ cunea jirôa pê acati.
Ampo na?
He akaam ri me ijõ Pahhiti cator xà.
Ne quê ha cato,
ne me ikwỳ pê Ixaher catêjê cunea to ihhimpej,
ne me hamã” hane — hajỹr.
7Mã aracri Heroti te pyt japôj xà rũm me hũmre krã kreti me mõ atajê na hàhwỳr, ne cute me ajpẽn par, mã cute caxêti na mehcukij to:
— Jũ caxuw mã caxêti ata cator? — hajỹr. Mã me cumã:
— Caku pyxit jirôa pê ri ramã cator — hane. 8Jirô pê mã ri cute Pãw jõ krĩ wỳr mehkujahêc, ne me cumã harkwa hêj xia hyr to:
— Ca ha me pra ne jũm krare ita na me acato, ne me imã harẽn par peaj ne. Mãr wa hanea ne me acuxà hõmpu, ne itỳj amji mã hũpa, ne imã ihkĩnti ne — hajỹr.
9-10Mã cute me pjê jõ pahhi ata jarkwa par jirô pê mã ma me pra, ne pry kôt hipêr cute me pyt japôj xà rũm caxêti ata pupun. Ne cute me caxêti pupun xà ata pyrên ampeaj kam me hakry, ne me cumã amji kĩn. Mã caxêti ata me cumam tẽ, ne Marij ikre kam ihkra to hỹr xà ata cwỳrpê hàhhuc. 11Mã ikre mã me hàr, ne cute me Marij me ihkra ata pupun, ne cute amji mã me hũpahti na amji to me ipipẽ prãmte, cuna mã mehkõn krã na me hỹr. Ne me cumã mehkĩnti na me amji jarẽn jirô pê, cute me cumã ampo cjên xà jihê mẽn, ne me cumã me ampo pejti jõr xà atajê jõr. Atajê pê wakỳre prà tepti pê ôr me, ampo jacrô cuxwati ata me, ampo pê pĩhhôc pê ràm jĩn pyràc, ne cuxwati ata me. Ne ampo atajê cunea na hĩ jàhwỳar to hàhwỳr.
12Mã caxwa ata kam Pahpãm te me hõt kam me cumã hũjarẽn, ne me cumã:
— Me apê pyt japôj xà pĩn me acator catêjê, ca ha nee hacpỹ mã Heroti pê pjê jõ pahhi ata wỳr me amji jaxàr, ne me cumã ahkrare nõ ata jarẽn nare — hajỹr. Cwỳrjapê ri me hõ pjê wỳr, ma pry nõa kôt, cute me amji jaxàr.
Pê Ejit jõ pjê wỳr me cuto
13Mã me hõmpun catêjê, ma ramã memprar jirô pê, côjkwa pĩn Pahpãm mã memprar catê nõ te Joje jõt kam cumã ihkra to hũjarẽn to:
— To jỹ ne gĩxi me ihcãmter to atẽm pyrentu, ma Ejit jõ pjê wỳr, ne curia me ahtwỳ ne me akrĩ. Wa ha pa jũ caxuw ate me amji jaxàr xà to me amã awjarẽ! Ampo na? Nee mã ampo na nare. Pjê jõ pahhi pê Heroti ihtỳj apu ahkrare ita japê, cute ihcuran prãmte — hajỹr.
14Mã Joje jũjarêan kam hỹr ne cute ihkra impỳn, ne ma caxwaa ri inxi me, Ejit jõ pjê wỳr me to tẽ, ne amcro nõa na curi me cator. 15Ne curia me hàhhuc ne mehkrĩ, ne curi mehkrĩ ita na mã me ahnaa Heroti tyc, mã cormã hacpỹ mã, cute me amji jaxàr. Ne pê rỳ pêa mã ramã Pahpãm jarkwa to ihcakôc catêjê Jeju na, me hõ kàhhôc kam, mehhôc ata harẽn to hane he:
“Ite, por Ejit jõ pjê kam apu ikra mõ ata na, ijàhwỳr” hane.
Pê ihkàhhôc kam ahna mehhôc xà ata na pê hane.
Pê Heroti me ahkrare jipej
16Mã Heroti te pyt japôj xà rũm cute amji jahkre pejti te caxêti pupun catêjê te mempar nare na, me hahkre pej, ne ame kam incryac to me kam incryc. Ne cute hõ krãhtare mã ahkrare xũmre curan na harkwa hyr to:
— Ca ha Pãw jõ krĩ me, krĩ ajpẽn cahi na ihcuhhê atajê cunea kôt me ahkrare xũmre na caku pijakrut nare atajê cunea curan to me mõ — hajỹr. Mã harkwa kôt cute me hipej. 17Ne pê Jeremij pê Pahpãm jarkwa to ihcakôc catê ata ramã rỳ pea mã ita jarẽn to hane he:
18“Quê ha krĩ ata kam ame amrãhti.
Quê ha pyjê cunea amehkra japê xà to amencwỳr to me ipa kam me to incrà tu.
Ne tee ame hõhtỳj to prãm.
Ampo na?
Nee mã ampo na nare.
Quê ha me cupê mehkra xũmre cunea me ty,
cwỳrjapê quê ha cama amencwỳr to ame ipa” hane.
Mã hũjarẽn xà ata na cute hajỹr.
Pê Ejit pĩn me amji jaxà
19Mã Heroti tyc jirô pê mã, côjkwa pĩn Pahpãm mã memprar catê nõ te Joje jõt kam hỹrmã cator, Ejit jõ pjê kam, ne cute cumã hũjarẽn to:
20— To jỹ ne gĩxi me ihcãmter to ma hacpỹ mã me gõ pjê wỳr amji jaxà. Ampo na? He nee mã ampo na nare, ramã, por cute me akra curan prãm atajê tyc par — hajỹr.
21Mã Joje jỹr, ne cute ihkra impỳn, ne ma inxi me, hacpỹ mã me to amji jaxàr, ne me to mõ, Juta jõ pjê wỳr. 22Ne cute me Arquirãw pê Heroti xwỳ kra pê hũm jaxà kam pahhi na me harẽn par. Na ri curi me mehkrĩ na me cumã hũpaa to hũpa. Cwỳrjapê ri hipêr Pahpãm te Joje jõt kam Hĩpôjajo jõ pjê wỳr me hator. 23Mã ma harkwa kôt hacpỹ mã Hĩpôjajo jõ pjê wỳr cute me amji jaxàr. Ne curia hipêr Naxare jõ krĩ kam mehkrĩ. Ne pê Pahpãm jarkwa to ihcakôc catêjê nõ ramã rỳ pêa mã Pahpãm kra pê ahkrare ata jarẽn to hane he:
“Naxare jõ krĩ pĩn pê cato” hane.
Currently Selected:
Matew 2: ram
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.